Ehangano lyoRA olyo lya kateke etungo lyoopate dhimwe moKavango - Lutombi

Omukuluntupitithi gwehangano lyOkulonga oopate Conrad Lutombi okwa koleke kutya sho oopate dhimwe inadhi pwa hamolwa aanakontalaka taya ende kashona ihe omolwashoka ehangano olya ndopa okuya futa pethimbo ngaashi yu uvathana.Ta popi moshiwike sha zi ko sho a talele po opate ndjoka tayi longwa, Lutombi okwa ti aanakontalaka oyendji mboka taya longo oopate ndhika oyo aanangeshefa aashona noyopokati mboka yaa na naana shoka tashi pumbiwa opo ya tsikile niilonga yawo ngele inaya futwa pethimbo kepangelo. “Mbaka aanangeshefa opo ye ya mowela. Kaye na iimaliwa yi li owala koombanga ya tegelela. Ohaya longa iilonga yawo opo ya futwr nziyanziya shampa ya mana,” Lutombi a fatulula. "Onkene ngele itatu ya futu pethimbo, ombedhi oyetu. Otse natu popiwe. Natu hokololithwe.”Okwa popi oohapu ndhoka pethimbo lyokutalela po oopoloyeka ne dhetungo lyoondjila miitopolwa iyali yaKavango, oopoloyeka dhimwe ndhika odha mwena po manga shaashi inaya futwa nenge iikwaniipangitho oyo yaa po.Opoloyeka yimwe ya gumwa koshinima shika oyepalekululo lyopate yoteya yaRundu–Divundu yuule wookilometa 27, otendela ndjika oya gandjelwe muFebuluali.Omunakontalaka okwa eta po nale iilongitho ye, ihe okwa mwena po manga molwoomakateko mokumona omamanya taga ka longithwa, ngoka ga simana unene. Lutombi okwa ti uudhigu mboka otau kandulwa po, nolopota otayi ka tumwa kuuministeli wiilonga niiyenditho.Lutombi okwa gwedha po kutya ehangano lyoRA oli li moonkundathana nooyene yomalambo ngoka taga fulwa evi moDivundu noKangongo.“Inatu hala omunakontalaka ngoka i ilongekidha, a kale a mwena kee na sho ta ningi nokonima te tu futitha oshimaliwa sho a kala a pugulula nonande iilonga inayi longwa.”Oshimaliwa sha kateke opoloyekaPokati mpoka, iilonga otayi ende kashona ketungo lyopate yaNdiyona–Djaradjrara yuule wookilometa 53 omolwoshimaliwa inashi gandjwa kuRA.“Iimaliwa yomomumvo gwoshimaliwa gwa zi ko oya pu po, nomunakontalaka oku na mwena po manga. Ashike ngashingeyi iilonga oya tsikila notayi pula komeho,” Lutombi okwa ti, okwa gwedha po woo kutya elala lyookilometa 18 olya kokolwa omiti niihwa, ashike okatopolwa kopate owala kookilometa 5 ka tulwa omamanya.Oshikwawo, okwa koleke kutya ope na sha tashi kateke okutembuka kwaantu ya yapukile ehumokomeho. Oshimaliwa, shoka hashi zi kuuministeli, inashi longekidhwa natango.Aantu yamwe oya tinda okutembuka manga inaya futwa oshimaliwa shawo.Okushonopaleka omakateko, Ehangano lyoRA otali kwathele aantu mbaka mokuya tungila uupeleki komahala nomahala, oshikwawo otali ka futa natango oshimaliwa shokuya tembudha po. Inaya futwa okuza mu FebulualiOkapate kaAndara–Shamaturu kaya pokaklinika, hoka ka tamekelwe muFebuluali, iilonga yako otayi ende kashona, niilonga mbyoka ya longwa po oyi li owala poopelesenda 11% peha lyoopelesenda 30% . dhoka dha li dha dhiladhilwa pethimbo ndika.“Hela omunakontalaka a tamekele a futwe, ina futwa sha nandenande. Shika oshe etwa ketopolo lyiimaliwa,” Lutombi e shi zimine. “Ashike oshimaliwa osha tameka nokugandjwa, nomunakontalaka na tale sho ka taka longa opo a vule okugwedha ko kondapo ye opo a mana mbala.”Okwa gwedha po kutya epangelo olya tokola kutya evi lya kola olyo nali tungithwe oopate opo ku yandwe nokushonopalekwe oopate dha tya omalambo olundji nopendji. Elunduluko ndika otali ka gwedhelitha ethimbo lyokumana opoloyeka noomwedhi hamano lyaa kale we Febuluali 2026.She enda nawaOpate owala yimwe yomoopate ne, yaDivundu–Muhembo oyo tayi longo nethimbo.Omunakontalaka a li e na oshinakugwanithwa shokulonga Oshitopolwa shOtango – shuule wookilometa ntano – okwa longa ko nale oshititatu shimwe shiilonga ye, e endelela lela a longa ko nale niilonga yoomwedhi mbali dhokomeho.Oshimaliwa shopoloyeka ndjika osha zi mehangano lyoRA nolyoRoad Fund Administration.“Ndjika opate yopashitopolwa, noitatu vulu okwiidhidhimikila iilonga yi hulile ondjilakati. Otatu ka tsikila sigo twa adha koongamba dhaMuhembo Border Post,” Lutombi a ti.Kakele komashongo ngoka, Omukuluntupitithi gwoRA ota ti kutya oopoloyeka adhihe odhi li meni lyoshimaliwa sha gandjwa. Okwa kolekulula kutya ehangano lyoRA oli itula mo lela mokutunga oopate ndhika. “Ashike natu hulithii po okugandja ombedhi kaanakontalaka nonande otse tatu ya ndopitha. Ngele otwa hala iilonga ya longwa, natu ya fute tango pethimbo," Lutombi okwa dhenge omuthindo.

Ehangano lyoRA olyo lya kateke etungo lyoopate dhimwe moKavango - Lutombi

Comments

Namibian Sun 2025-10-15

Please login to leave a comment

Ehangano lyoRA olyo lya kateke etungo lyoopate dhimwe moKavango - Lutombi

Comments

Namibian Sun 2025-10-15

Please login to leave a comment

Login