Ehangano lyoFIC itali yolo noongeleka

Oongeleka nomahangano galwe kaage shi gontanitho taga longele moNamibia naga holole nokugandja uumbangi waa mpoka hapu zi omakwatho gawo gopashimaliwa, ishewe naya tume omishangwahokololo dhopashimaliwa dhokomumvo aluhe konima yomvula yimwe( oomwedhi 12 )– ngele hasho Ehangano lyoFinancial Intelligence Centre (FIC) otali ya katukile onkatu.Mokutula miilonga Oveta yElongitho lyIiniwe yomo2012, Ehangano lyoFIC otali pumbwa wo uumbangi kutya iiniwe yoongeleka nomahangano galwe kaage shi gontanitho otayi kalelwa po meudhililo, noya longithwa momukalo gumwe tagu iyutha komalalakano golela gomahangano ngaka. Omahangano oga tegelela gu ulike omawilikongundu nenge uukomitiye wewiliko, shi ikolela kuunene wago, kiitayi, koonzo nokiinyangadhalwa yago. Mboka taya ka pewa oshigwanakugwanithwa shoka naya kale ye na uulongelwe nowino tayi pumbiwa miilonga mbyoka, aanashili nohaya iyutha komifango dhomondjila. Naya etelele wo omanyala ga za kopolisi. Onzapo yepitikilo nenge olisensa yehangano nayi gandjwe uuna tayi pulwa nomahangano naga kale nomiyelo dhe egulukila aakonakoni mboka taya konakona olunza lwiiyemo opo aayambidhidhi yawo, oonakumona omauwanawa nooyene yomahangano ya tseyike. Shika osho oshitopolwa shoonkambadhala dhehangano lyoFIC okukondjitha ekengelelo lyiimaliwa nokuyambidhidha uukulo moshilongo.Elongitho nayi lyoonkondoEtaandelo lyoongeleka oompe moNamibia olye eta elimbililo moshigwana nomaatotiveta, oyendji yendji otaya pula ekondololo lya kwata miiti li kale po uuna tapu totwa nokushangithwa ongeleka ompe noshowo miinyangadhalwa yawo yesiku nesiku. Okwaapo kwokondolola ombwanawa nehokololitho lyomahangano gopambepo oshe eta aasita naawiliki yamwe yopambepo ya kale noonkondo dha pitilila. Moompito odhindji, oonkondo ndhika ihaa dhi kondololwa odha vala ehepeko lyaakwanegongalo – taya hepekwa pamadhiladhilo, painiwe nokolutu wo. Omahokololo oga ha kombinga yaasita taya thiminike aakwanegongalo ya lye omikuli dhi kaleke aasita monkalamwenyo ya fa yomukengeli. Omalimbililo oge ya sho aakwanegongalo haya vulu nookuli okuya ponkatu sigo ya landitha po omagumbo niihauto yawo, ashihe shoka otashi ningwa nelalakano opo aakwanegongalo ya mone omayambeko( omauvaneko) okupitila maasita yawo, uuna taya uvanekelwa omauyamba nenge oondjokana.Dha yelaOkuhwepopaleka oprosesa, Ehangano lyoFIC olya ndjandjukununa kondandalunde iipumbiwanima yi na okugwanithwa po, oshiholelwa, okugandja uumutse woshilongo waayambidhidhi pashimaliwa, ombapila yeziminino lyokukala ongeleka, omikanda dhewiliko nomilandu adhihe dhokuungaunga niiniwe. Oongeleka nomahangano galwe kaage shi gontanitho oga tegelelwa ga kale nomishangwa dha yela dhi na sha nolunza lwiiyemo yawo nolwiinyangadhalwa yayo.“Okwiishangitha nEhangano lyoFIC kashi shi owala oshinakugwanithwa shopaveta, osho onkatu ya simana yokukwashilipaleka eyambidhidho lyaamboka ya pumbwa omakwatho moNamibia oli li paushili,” Ehangano lya holola metumwalaka lyalyo lya piti miikundaneki oshiwike shika.Omahangano gi ishangitha nale nehangano lyoFIC naga gandje omauyelele gago gopethimbo sha landulula omalunduluko mOveta yElongitho lyIiniwe, ndjoka ya tulwa miilonga mu Juni 2023. Esiku lyahugunina lyokutuma omishangwahokololo dhopashimaliwa dhomumvo 2024 olyo eti-31 Januali 2025.Omunashipundi gwehangano lyoAlliance of Christian Churches in Namibia Reverend Dolly Nengushe okwa holola elimbililo lye molwa oolisensa dhoongeleka dhi ishangitha noFIC dha lata.Okwa lombwele oshifo shoNamibian Sun ohela kutya omanga oongeleka odhindji odhi ishangitha, odha tegelela natango oolisensa tadhi zi koFIC. “Ondi itaala shika oshe etwa koosystema dhawo tadhi ende kashona nenge dha vulwa, tashi vulika she etwa komaindilo ogendji inaashi tegelelwa. Ehangano lyoFIC olya ungaunga naashika ethimbo ele. Otwa kala moonkundathana nayo, sigo oponkatu yokuhiya oshigongi tu kundathane oshikumungu shika,” okwa ti.“Hakutya oongeleka kashi dhi shi Oveta yElongitho lyIiniwe. Ando dhaa na na uuyelele, tse ongehangano, otatu kambadhala okweeta po opolohalama moshitopolwa kehe yokulonga oshigwana kombinga yelelo ewanawa. Otatu tala wo komaishangitho gIiniwe nokokwiiyutha kOveta,” okwa gwedha po.Pateni omayalulilombaanga gawoMumvogu, oongeleka odha yemata sho taku hokololwa ehangano lyoFIC lya tseyithile oombanga dhi pate pakathimbo omayalulilombaanga yoongeleka dhimwe, ihe etokolo ndika olya lunduluka lwanima nomayalulilombaanga oga tsikile nokulonga ngoshito. Esiku lyahugunina lyokwiishangitha kohi yOveta yalundululwa yIiniwe yomo2023 olya gwedhelwa sigo eti- 31 Kotoba 2023, konima sho esiku lyahugunina lya li 29 Septemba 2022.Onkatu ndjika petameko oya li ya tegelela omahangano agehe kaage shi gontanitho moNamibia gi ishangitha nokwiiyutha komikalo tadhi dhengele dhokungaunga nomishangwa dhiiniwe, naakwambepo yamwe oya lulilwa.Mokuyamukula ketaandelo enene lyoongeleka, Ongongahangano yOongeleka moNamibia (CCN) oyi indile opo ekondololo lyoongeleka opo li kale lya kindja.Omwedhi gwa zi ko, Omupresidente gwoCCN Pastoli Enoch Sakama okwi indile ku landulwe iipumbiwanima yoPambiimbeli uuna taku totwa ongeleka, ta dhenge omuthindo kutya aawiliki yopambepo naya hokololithwe kolutuwiliki lwooitaali lu li pambelewa.nikanor@erongo.com.na

Ehangano lyoFIC itali yolo noongeleka

Comments

Namibian Sun 2025-05-07

Please login to leave a comment

Ehangano lyoFIC itali yolo noongeleka

Comments

Namibian Sun 2025-05-07

Please login to leave a comment

Login