Efundja lya nayipaleka onkalo kOnooli

Efundja konooli yoshilongo, ndjoka lya nayipaleka onkalo sho lya teyagula po oopate nomagumbo nolya thiminika woo aantu ya tembukile komutunda. Olya patitha woo oskola 87, nonkalo ndjika oya guma elongo lyaalongwa ya konda 30 000.Iitopolwa Ohangwena, Omusati nOshana oyo ya dhengwa ya lila kefundja, oshoka omatungo gamwe pooskola oga mona iihuna komeya gefundja.Pokati mpoka, omunambelewa omukuluntu nomunawino miipambele yomeya muuministeli wuunamapya Leonard Hango okwa lombwele oshifo shoNamibian Sun kutya efundja ndjoka lya ziilile moAngola kuyele omwedhi nguka olya thika ngashingeyi mOshakati nopondingandinga yiishana yoCuvelai, shoka sha ningitha omeya ga kale omale momilonga noshowo koombinga noombinga. Hango okwa ti kutya lwopoongamba dhAngola naNamibia, omeya gefundja otaga ende taga ningi omafupi sho taga kunguluka okuza kuumbugantu gu uka kEtosha – naandika efano ewanawa, kutya sho omeya taga kunguluka ngeyi nokupwina kashona nakashona, ooskola otadhi patuluka masiku dhi tsikile elongo lyaalongwa.“Natango otatu kumagidha kehe gumwe e li popepi nomeya opo a kale a lungundja aluhe shampa ta taaguluka omeya opo ku yandwe okusa omeya,” okwa ti, okwa gwedha po woo kutya aakalimo yomomidhingoloko ndhoka dhi na iishana oyindji naya kale uupathi aluhe.Hango okwa ti kutya moshitopolwa shaMusati natango omeya gefundja otaga kunguluka lela, nomikunda ndhoka dha dhengwa lela kefundja odhi li miikandjohogololo ngaashi Ogongo, Elim, Outapi nAnamulenge.Okupatelwa pondjeOmunambelewa Omukuluntupithi gwehangano lyoRoads Authority Conrad Lutombi okwa yile e ki italele ko mwene konkalo, nokwa totha mo omunangeshefa David Sheehama David gwongeshefa yedhina Kambwa Construction opo a longulule opate yOnamutuku–Onkani road (DR3643).Kamunsela gwaElim Gerhard Shiimi okwa ti kutya opate yaShoni–Onaanda–Omapopo (DR3619), ndjoka yi li kohi yomeya, oya patela pondje oshigwana nongashingeyi itashi mono omayakulo ga simana.Lutombi okwa kwashilipaleke aakalimo yaahoka kutya ehangano lyoRoads Authority olya tula ombunda moshihwa opo li kwashilipaleke kutya oondjila otadhi vulu okulongithwa pethimbo lyoshituthi shaPaasa.Sigo opo mpaka, okwa ti kutya momukunda Onamhinda omagumbo 12 oga tembukiwa kooyene yago, moka mwa kwatelwa aakuluntu 59 nuunona 49.Omiyalu dha gandjwa komukuluntuwiliki gwelongo moshitopolwa shaShana Pauline Shapumba otadhi holola kutya aalongwa ayehe kumwe 5 371 iihakanwa yefundja moshitopolwa.Ngoloneya gwoshitopolwa shaHangwena Sebastian Ndeitunga okwa ti kutya ooskola 302 odhi li muudhigu molwefundja, nooskola 16 odha pata pakathimbo omanga ooskola hamano odha kaleka ootundi dhuunona womoondondo dhopevi (uunona womoshikunino sigo ondondo ontitatu).Okwa ti kutya okupata huka kwooskola moshitopolwa okwa guma aalongwa ya konda 7 221.

Efundja lya nayipaleka onkalo kOnooli

Comments

Namibian Sun 2025-05-02

Please login to leave a comment

Efundja lya nayipaleka onkalo kOnooli

Comments

Namibian Sun 2025-05-02

Please login to leave a comment

Login