Amadhila a taalela okukuthwa omaliko omolwiihohela yoveta yomayovi N$471

Omukalelipoveta okwa pewa elombwelo lyoku kwata po omaliko gaOnesmus Amadhila opo ku monike oshimaliwa shomayovi N$471 dhoondjo dhiinyangadhalwa yoveta konima sho a ndopa moompata dhopaHofa yoPombanda noyoPombandambanda kombinga yomutungilwa gwoOshoto Pension Hotel.

Omukalelipoveta moshitopolwa Omusati okwa pewa elombwelo lyomeendelelo oku tulitha miilonga omalombwelo gaali gompangu ge li ompinge nomunangeshefa gwomonooli nokuli omusamane gwOmupopiliko gwOshigongi shOpashigwana, Onesmus "Tona" Amadhila, opo kwu futile po oondjo dhiihohela yopaveta dho-N$471 535.69 dha zi mehekelitho lyoHofa yoPombanda noyoPombandambanda.

Montumwafo yomomasiku 21 Juuli 2026, ya shangelwa Omukalelipoveta John Adriaan Puleston kehangano lyoohahende WKH Incorporated, otayi mu lumbile a tule miilonga omalombwelo gaali meendelelo gopetameko ga zi kompangu ngoka ga gandjwa moshipotha sha kwatela mo Amadhila naTobias Mundjele nayatatu yalwe.  

Ehangano ndyoka, tali kalele po Tobias Mundjele, Josef Mundjele no-erf 1784 Ondangwa mboka ya li aagameni moompata dhOmpangu yoPombanda noyo aayamukuli yotango sigo aatitatu momaindilo gOmpangu yoPombandambanda, otali popi kutya iifuta mbyoka oya gandjwa kaayakulwa taya popilwa konima sho Amadhila a ndopa montamanana ye kombinga yongeshefa ya kondjelwa mOndangwa. 

Shiikolelela kontumwafo ndjika, Omukalelipoveta okwa pulwa a gandje omalombwelo ngaka gompangu kuAmadhila noku kwata po omaliko omakwainyenga ga gwana, mwa kwatelwa iihauto noshimaliwa sho moombanga, opo ku futwe omwaalu aguhe gwa thika po-N$471 535.69. 

Oshimaliwa shika osha kwatela mo N$395 272.29 dhoondjoo dha yelithwa dhoHofa yoPombanda osho wo o-N$76 263.40 dhoondjo dha yelithwa dhoHofa yoPombandambanda. Taya hokolola oshinima shika kutya oshomeendelelo, WKH Inc. okwa pula Omukalelipoveta a tule miilonga omalombwelo ngaka "meendelelo tali vulika" noku gandja uumbangi welumbilo uuna ayihe ya manithwa.

Omatokolo ngoka gahugunina oge ya konima yoomwedhi hetatu sho Ompangu yoPombandambanda ya dhenge po Amadhila moompata dhomompangu, sho ya tokola kutya ehala lya tungilwa ohotela yOshoto Pension kalya li lye.

Mompangulo yopaziminathano, ompangu yo pombandambanda moshilongo oya mona kutya uuthemba kehe wa zi meuvathano lya popiwa kombinga yO-Erf 1784, Extension 5, mOndangwa, owa li wewiliko lyehanagano enene (close corporation) ha kuAmadhila momukalo gwe gwopaumwene. 

Oompata dhi li po odha zi meuvathano lyokokana ndyoka Amadhila a popi kutya okwa li a hulitha naTobias Mundjele mo-2007, moka kutya ehala otali ka lundululilwa mehangano moka aalumentu ayehe yaali taya ka kala ye na oshipambu shoopelesenda omi-50 kehe gumwe. 

Nando ongawo, Ompangu yoPombandambanda oya tokola kutya nando euvathano lya tya ngaaka olili po, olya li etokolo lyokuyakula omuntu omutitatu (stipulatio alteri)—euvathano lyokweetela ehangano lyomutitatu uuwanawa noshitopolwa shoka shomutitatu oshehangano lyopaumwene ndyoka lya li lya shangithwa nedhina Mouse Properties No. 24 CC nolwanima lya lukululwa lyi ninge Oshoto Guesthouse CC.

Molwaashoka ehangano lyopaumwene, ndele haAmadhila a li e na okumona uuwanawa wopaveta, ompangu oya totha mo kutya ina kala e na uuthemba wopaveta wokupula elundululo lyehala nenge okupataneka omatokolo ga landula ko ngoka ga kwatela mo evi ndyoka.  

Amadhila okwa patulula oshipotha shopaveta konima sho a dhimbulula mo-2019 kutya Mundjele okwa lundululila ehala ndyoka medhina lyomwanamati, Josef Penda Mundjele, momukalo gwomagano mo-2017. Okwa pataneke kutya elundululo ndyoka olya li kaali li paveta nokwa li a hala li teywe po. 

Ompangu yoPombandambanda oya tindi omatompelo ngoka, sho ya mono kutya Amadhila okwa ndopa okulundila omwananmati nenge okukoleka kutya okwa li e na uunongo kombinga yeuvathano lya tetekela. Aapanguli oya hulitha muukolele kutya kaku na ekankameno lyopaveta lyokushuna omagano ngoka monima. 

Ompangu oya tindi wo etokolo lyaAmadhila kutya oshipambu she sho-50% mehangano osho tashi mu pe uuthemba wokumona eyambidhidho, sho ya popi kutya uuthemba kehe wa zi meuvathano owu na okutulwa miilonga kehangano lyooyene okupitila momakwatho ngoka ge li meuvathano lyOmoveta yEhangano.

Sho ya hulitha oshinima shika koonkondo ndhoka, Ompangu yoPombandambanda oya mona kaashi li pampumbwe okutala komatompelo gomakondjitho gaayamukuli kombinga yethimbo lya pita.  

Eindilo lyelundululotokolo olya tindwa niifutila oya futithwa, mwa kwatelwa iifuta yohahende yoku taamba omalombwelo nayimwe yoku ninga omalombwelo.

[email protected]