Aayuli yoohi yatatu shaa li paveta ya mangwa po mOshakati

Opolisi yaShana oya manga po omufekelwa gumwe nokufutitha yalwe yaali konima sho ya li taya kwata oohi dhomankende shaa li paveta mondama yohanya yi li popepi nokamba yaakwiita mOshakati. Komanda gwopolisi moshitopolwa shaShana, Komufala Naftal Lungameni Sakaria, okwa ti oshipotha osha patululilwa omulumentu gwoomvula 55 ngoka ta tamanekelwa okukwata oohi shaa li paveta. Omufekelwa ota tamanekwa nOveta yOohi dhomOmilonga, Oveta 1 yomo2003, ndjoka hayi kondolola ekwato nawa lyoohi dhomomilonga. Aafekelwa yalwe yaali, gumwe gwoomvula 41 nomukwawo gwoomvula 39, oya futithwa molwiikoya ya pamba okuyula oohi shaa li paveta. Omufekelwa gwoomvula 41okwa futithwa molwokuyula oohi nonete ndjoka yaa na uunene mboka wa uthwa paveta, omanga omufekelwa gwoomvula 39 okwa futithwa oshoka okwa kwata oohi nonete hayi kookoloka pevi. Nonande oohi ohadhi kwatwa miishana, omuyuli gwoohi okwa pumbwa okukala e na olisensa ya za kuuministeli woohi. Osha nika oshiponga Sakaria okwa ti okukwata oohi miishana osha nika oshiponga noonkondo nopolisi oya ti itayi ki idhidhimikila mboka taye shi ningile owina. “Osha fa owala to pe omuntu uuzigo. Aalandi otaya landa oohi dhoye ihe ngoye oto ya dhipaga po. Aawe! Itatu ke shi idhidhimikila nande. Otaku kala nokupatrola piishana mpoka opo tu kwathele aanambelewa yuuministeli woohi. Otu uvite omahokololo getukuko lyomukithi gwocholera kiitopolwa yimwe moshilongo paife ope na ishewe aantu taya landitha oohi ye dhi kwata momeya gohanya,” Sakaria a nyenyeta. Okwa kunkilile kehe gumwe ta dhiladhila okukwata oohi dhomankende kutya otaka mangwa po. “Ongaanambelewa ohatu shi popi aluhe kutya otwa tula ombunda moshihwa mokutula miilonga ooveta dha pamaba eyulo lyoohi, uunene tuu ndhoka tadhi kwatwa miishana mwa kungulukila omeya gohanya ,” Sakaria a ti. Okwi indile oshigwana shi tseye ooveta dhokukwata oohi opo shaa pogole.Eteto lyondhalate yondama yohanya Mayola gwoondolopa yaShakati Leonard Hango okwa ti ondama yohanya oyi li mondhalate yoshipa, ashike aantu mboka haya kwata oohi shaa li paveta ohaya tete ondhalate opo ya ka kwate oohi dhawo. Hango okwa ti kakele kokuteta ondhalate, ohaya teyagula po oontuni dhondama opo ya vule okutula ko oonete dhawo. “Omeya ngaka oga kaka nayi, oshoka oga za shaampoka. Oohi ndhoka inadhi pumbiwa okuliwa. Okuteyagula po oontuni dhondama osho eyonagulo lyomaliko. "Otaya etele oshigwana omikithi oshoka omeya gohanya otashi vulika ga kungulukile mumwe nomeya gomiishana nomukuthi gwocholera tagu tukuka. Otatu ya tula miipandeko,” okwa ti. Hango okwa gwedha po kutya oya ningile iigongi aakalimo yokoShimbangu mOshakati nokOkaku Kiipupu noshowo yomondoolopa dhopuushinda, taya fatulula oshiponga shoka twa taalela; ashike, aantu itaya landula nande. Okwa ti kutya aayuli yoohi ohaya kwata oohi nokudhi landitha pooha dhopate onene yOkahao-Endola. Ookastoma dhimwe ohadhi dhiladhila kutya oohi odha za momeya omawanawa, ashike hasho ngaaka. “Naya nyangadhale pauyuuki ashike haku tula moshiponga aantu noohi dhawo dha za momatale gohanya. Onda pandula eitulo mo lyopolisi yaNamibian notatu tsikile nokukambadhala opo okukwata oohi huka ku kale kwa hulithwa po,” Hango a ti.

Aayuli yoohi yatatu shaa li paveta ya mangwa po mOshakati

Comments

Namibian Sun 2025-07-01

Please login to leave a comment

Aayuli yoohi yatatu shaa li paveta ya mangwa po mOshakati

Comments

Namibian Sun 2025-07-01

Please login to leave a comment

Login