Aapangi inaya nyanyukilwa Olutu ndoka halu kondolola omiti dhaavu

Ehangano lyAapangi moNamibia olya hala olutu ndoka halu kondolola omiti (oopela) ndhoka tadhi pangithwa aavu opo aanambelewa yalyo ya ze miilonga, nokukonakonwe nokutalula nkene halu longitha oshimliwa shalyo.

Aapangi oya hala woo Presidente Netumbo Nandi-Ndaitwah a gandje elombwelo ku ningwe omapekapeko gomuule miinyangadhalwa yuuministeli wuundjolowele.

Shi ikolela kEhangano lyaapangi, okakomisi haka taka ka ninga omapekapeko ngaka naka kale nomukutuumbithi ngoka omupanguli omukuluntu kee na olwaamambinga, okakomisi naka tungwe po woo kaakalelipo ayehe yomahangano gaaniilonga yomoshikondo shuundjolowele, opo ku kwashilipaleke kutya iizemo oyi li pauyuuki noya yela nawa.

Eindilo ndika olya ningwa konima sho olutu nduka lwa kaleke manga enduluko lyomuti ngoka gwomeya gwa longwa kehangano lyoFabupharm, nomatompelo kutya olya ndopa okulandula omilandu dhokukaleka po egameno, konima sho aanambelewa yolutu nduka ya talele po oFabupharma pomathimbo mpaka.

Fabupharm oya kwatwa mo kutya oya kala tayi nduluka omiti okuza muJanuali nonande kayi na olisensa yokushi ninga.

Uuministeli wuundjolowele owa gandja elombwelo lye endelela kiipangelo opo yaa gandje we omuti nguka gwomeya ngoka hagu longwa kehangano lyoFabupharm Namibia, konima sho uuministeli wa mono iizemo mbyoka ya gongelwa kolutu nduka.

Uuministeli wuundjolowele owa tseyithile iipangelo nuuklinika moshilongo ashihe kutye nau itulile omiti ndhoka, nokudhi nyola kutya “Itadhi longo we”, niipangelo nuuklinika nayi tume omisholondondo dhomiti ndhoka ya li ye na, ye dhi tume mule womasiku gaali komunambelwa omukuluntu gwopashitopolwa omunawino miikwamiti.



Omayalululo gopambelewa

Nonande olutu nduka otalu ti osha li sha pumbiwa opo omuti gu tulwe pevi molwuuwanwa woshigwana, ehangano lyaapangi olya ponekele olutu nduka tali ti ihali longa naanaa nawa.

Momukanda ngoka gwa nyolwa kaapangi nogwa pitithwa mEtine, ehangano lyaapangi olya ti kutya olya kundana “neyemato enene nononkumwe onene” kwaashoka tali ti “omapuko omanene ” golutu nduka lwa taaguluka Oveta hayi kondolola elongitho lyomiti nayilwe ye yi pamba, Oveta yomo2003.

Ehangano lyaapangi olya ti kutya olutu nduka otalu gandja uuthemba nuupitilo wokulongitha omiti inadhi pitikwa oshikwawo olutu nduka otalu pe omahangano haga nduluka omiti uuthemba ga nduluke omiti nonande kage na oolisensa dhoku shi ninga.

“Iilonga mbyoka oyo etaaguluko enene lyooveta nomilandu dhopambelewa, naashika osha tula oomwenyo nuundjolowele waakwashigwana moshiponga oshinene,” Junias Shilunga amushanga ndjai gwehangano lyaapangi, a ti

Shilunga okwa gwedha po kutya oshigwana otashi ende tashi kanitha lela omukumo neinekelo moshikondo shuundjolowele molwuulingilingi wa vuka, aantu itaya hokololithwa nokugeyelwa nokwaa na esimaneko nongushu yuuntu womuntu.



OFabupharm inayi landula omilandu anuwa

Ehangano lyoFabupharm olya kala lya talika ko tali dhana onkandangala onene mokunduluka nokutopola omiti dha simana moshilongo, nomuFebuluali 2023, olya li lya pewa otendela yoshimaliwa shoomiliona N$458 sha zi kolutuwiliki okua koCentral Procurement Board.

Ehangano lyoCPBN olya li lye shi popile pethimbo ndiyaka, tali ti oFabupharm oyi na olisensa yonduluka omiti—oshinima shoka tashi ipulwa nasho molwomahokololo ngoka ge li po ngashingeyi.

Ehangano lyoFabupharm inali tya ko manga pambelewa kombinga yoshikumungu shika. Nonande ongawo, sho ehangano inali landula omalandulathano gwokunduluka omiti, nonande lya pewa ootendela kepangelo, osha kakeka edhina lyalyo noshi inyengitha oosystema dhekondololo nodhomambestelo ndhoka hadhi wilike ehangano lyoFabupharm.

Omunambelewa omukuluntupithi muuministeli wuundjolowele, Penda Iithindi ina vula okukoleka ngele epangelo oli na oondjo dhoFabupharm, nongele osho ongawo, ina koleka ngele epangelo otali ka futa iimaliwa mbyoka oku shi talela ketaaguluko lyomilandu ndika.

“Itatu vulu okuumbila iimaliwa yepangelo momeya molwiipindi yaa li nawa,” okwa ti, nonande inaya muule washo.





Okutokola

Olutu lwokundolola, inalu yamukula ko komahokololo gehangano lyaapangi.

Olutu nduka olwa tegelelwa lu ka fatulule nokuhokolola nkene ehangano lyoFabupharm lya kala nokunduluka nokutopola omiti dhomeya uule woomwedhi hamano nonande kali na uuthemba woku shi ninga.

Aapangi noondohotola moshilongo ashihe otaya ka taalelwa keshongo lyomiti tadhi kala dhaa ko kuuklinika, unenenene mboka wu li kiitopolwa yokuushayi nenge uuklinika mboka hau udha noonkondo.

Okukuthwa mo huka kwoombadhilila kwomiti dhomeya dha longwa kehangano lyoFabupharm otashi ka nayipika onkalo ndjoka yiipangelo tayi nana nondatu nale molwiikwaniipangitho tayi nyangwanyangwa.

Einekelo lyoshigwana moshikondo shuundjolowele sho tali ende tali shuna pevi, ehangano lyaapangi otali uvaneke kutya otali ka tsikila nomahwahwameko galyo opo ooveta dhi lunduluke nodhi landulwe.

“Oonkalamwenyo dhetu inadhi pumbwa okudhanwa nadho molwuulingilingi nokwaaitula mo miilonga,” Shilunga a ti.

“Uukalinawa negameno lyetu olya pumbwa omatokolo taga ningwa meendelelo noga kindja.”

Sho olutu nduka inalu tya ko sha natango koshikumungu shika opamwe nongeyo yoshigwana tayi lundu pombanda, oshiningwanima shika otashi ka kala oshilongwa koshilongo nekondjo enene okugalula einekelo lyoshigwana nokulonga nawa moshikondo shuundjolowele.