Aapambele yaShiweda oye li ompinge negandjo lyobooloha komufekelwa medhipago lyomunona gwawo

Aapambele yanakusa Justine Shiweda oya tindi opo omufekelwa Petrus Shikwaya opamwen naafekelwa yalwe yaa pewe ompito yokiifutila mo mondjedhililo, taa ti uuna ya mangululwa otashi tula oombangi moshiponga, tashi holola ondhino yuuyuuki notashi lulumike unene iilalo yaakwanezimo noyoshigwana mbyoka ya etwa koshiningwanima shika.

Momukandakemo gwa gandjwa kompangu yamagestrata mOndangwa Omaandaha, aapambele meyambidhidho lyaanalukeno pamwe nayo oya ti uunene nuudhudhu woshipotha shika sha longwa owa gwana okukaleka oonakufekelwa mondjedhililo osigo tuu okesiku lyepangulo lyawo.

Omukalelipo gwaapambele Elizabeth Nankala okwa gandja omukandakemo komweeti gwiihokolola, ta totha mo omatompelo gawo gokukala ye li ompinge nombooloha, aakwanezimo oya popi kondandalunde kutya omukalo omunyanyalithi ngoka gwa longithwa okudhipanga Shiweda yo taa kunkilile kutya okumangulula aafekelwa itashi tula oombangi moshiponga, moka nayo ya kwatelwa mo osho wo aanona yaShiweda.

Nankala okwa holola kutya edhipago ndika “olyuukwaanahenda no li nyanyalitha noonkondo”, ta ti Shiweda okwa li a yahwa iikando oyindji nokonima okwa li a ponokelwa nuuzigo nyanyagula olutu.

Okwa ti shika osha ningwa nelalakano okuholola okululumika nakuninga oshihakanwa onkene oshipotha ina shi gwana aafekelwa yap ewe ompito yokwiifutila mo.

Nankala okwa ti wo: “ Eponokelo ndika ka lya li lyondiihaluka ihe olya li lya longekidhwa nawa nomwa kwatelwa aantu yevule pugumwe, shika she tu etela omaipulo kombinga yoompangela nelongelokumwe mokati kaafekelwa onkene okuna uutile ya idhope mo moshipotha shika uuna ya mangululwa.”

Aakwanezimo oya gandja wo ekunkililo kutya uuna aafekelwa ya pewa oobooloha nena oshigwana otashi kanitha einekelo moshikondo shuuyuuki. Shiweda, ngoka a li omweeti gwiihokolola mOndangwa okwa li omuniilonga gwepangelo ha itula mo miilonga ye neso lye olya li lya uvithanayi unene oshikondo shiikwaveta osho wo oshigwana ashihe.

Nankala okwa holola ishewe omaipulo kombinga yomambandameko tashi vulika ga ningilwe oombangi, ta ti yamwe yomoombangi oye shiwike komufekelwa. Okwa ti uuna omufekelwa a mangululwa otashi ka gu ma nayi uuyuuki neyokomeho lyompangu.

Aapambelo oya holola kutya oya kala nuumbanda osho wo edhigupalelo lyomadhiladhilo konima yedhipago lyomunona gwawo, taa ti okugandja ombooloha komufekelwa otashi ya etele uumbanda unene, unene tuu maapambele naapopepi yomomudhiingoloko.

Omukandakemo ogwa tsu wo omuthindo ku nkene eso lyaShiweda lya thiga aanona ye yaana yina. Aapembele oyu uvite kutya uuna aafekelwa ya mangululwa otashi nayipaleke onkalo yaanona mboka ya ehamekwa unene keso lyameme gwawo notashi ya etele uumbanda nomaipulo omadhigu kombinga yegameno lyawo osho onkalonawa yawo.

Emono lyiihuna pamadhiladhilo

Mokukwatakanitha kumwe nuukwatya woshikoya shika, oompangela dheponokelo osho wo uutile wokumbandameka oombangi omudhingoloko negameno lyawo, aapambele oya tindi nokukala lela ye li ompinge negandjo lyombooloha kaafekelwa.

“Nesimaneko enene otatu indile opo ompangu ndjika yaa gandje ompito yokwiifutila mo kaafekelwa osigo tuu oshinima shika sha pulakenwa nosha manithwa”, Nankala ta ti ngaaka.

Aapambele oye shi holola wo kutya yo oya simaneka oonkondo dhomapngu ihe oata indile ngaa ompangu yi tale egameno lyawo, onkalonawa yoombangi osho wo uuwehame wopamadhiladhilo mboka ya etelwa kedhipago lyomwana.

Shiweda okwa li a yahwa momasiku o-17 Kotoba 2025 nokwa li a mana oondjenda dhe mu Febuluali 2026 omolwa uuwehame weetwa keponokelo lye. Aakonakoni oyi itaala kutya eponokelo lye olya li lyuunganekelwa owina omolwa iilonga ye yuuhahende wepangelo. Oshipotha shika osha li sha landulwa koyednji moshigwana omolwa eponokelo li kenyeneka naashoka ta li ti kombinga yegameno lyaanambelewa moshikondo shuuyuuki.

Shikwaya gumwe gomaafekelwa ya tango ya mangwa po shikana nedhipago lyaShiweda. Aafekelwa oya taalela iipotha ya yooloka ngaashi shedhipago, okudhipaga omuntu pamukalo gwaa li meukililo, onkambadhala yokuya uuyuuki moshipala. Ota ku fekelwa kutya aafekelwa oya kala nokangundu kawo taya iyunganeke nawa, naafekelwa yamwe okwiitaala ya kutha ombinga melongekidho nometulo miilonga lyoompangela dheponokelo lyaShiweda.

Epulakeno lyeindilo lyobooloha yaShikwaya olya li lya tameke Omaandaha komeho yomupanguli Kaeren Kleopas. Shikwaya okwa kalelwa po kuhahende Murray Shikongo, omanga epangelo lya kalelwa po kuYeukai Kangira.