Aaniilonga mofaalama yepangwe taya lili oluhepo

Okutulwa miipandeko komunafaalama omunamimvo 43, ngoka mofaalama ye - yili moHochfeld moshitopolwa shaOtjozondjupa - omwa adhika oshikunino oshinene shepangwe nehala mpoka epangwe hali pakelwa, okwa thigi aaniilonga mofaalama ndjika inaya futwa molwashoka omuhona gwawo okuli mondholongo. Aaniilonga mofaalama otaya ti sho omuhona gwawo David Strauss van der Linden (43), a mangwa po oshe ya tula muudhigu. Van der Linden nomukwashigwana gwaSouth Africa Armand Carel Schultz (27), ngoka a li omukuluntu gwofaalama ndjika yepangwe, oya mangwa po petameko lyomwedhi gwa zi ko konima sho opolisi yaOtjozondjupa yi itsu oshikunino oshinene shepangwe, shoka opolisi tayi tengeneke kutya oshongushu yoomiliona N$52, tashi adhika mofaalama yopaipindi yi li momudhingoloko gwaHochfeld moshitopolwa shaTjozondjupa. Omuniilonga gumwe mofaalama ndjika, ngoka a popi nehangano lyoNetwork Media Hub (NMH) mOlyomakaya nokwa li i indile opo kaa tumbulwe kedhina, okwa ti kutya okwa longela aalumentu mboka yaali uule woomvula 18, opamwe naaniilonga pamwe naye yalwe 15 noshowo nomaluvalo gawo. Okwa ti kutya okwa li ha kwata N$6 500 komwedhi, oshikwawo okwa li ha landelwa iikulya noku na ehala lyokuza. Oondjambi“’ dhaaniilonga odha yooloka, aaniilonga yamwe ohaya kwata ondjambi yoN$650 sigo N$2 500, N$5 500, noN$6 500 kaaniilonga mboka ya longa mofaalama ndjoka ethimbo ele,” okwa ti. “Onda li puuwanawa; atuhe otwa li hatu silwa nawa oshimpwiyu. Okuza Omaandaha sigo Etitano, ohatu pewa onyama ontalala nokashoka kepungu kookilohalama 10 esiku kehe. Otandi shi endulula kutya: esiku kehe”. Taya nana nondatu Omuniilonga gumwe ishewe mofaalama ndjika, okwa koleke shoka sha popiwa kumbushe miilonga, okwa li a hukula ehodhi mokudhimbulukwa nkene taya nana nondatu ngashingeyi. “Otwa yile koombelewa dhaaniilonga kOkahandja tu ka gandje omakemo nuudhigu wetu, ashike oye tu tidha ko noye tu lombwele tu thige po ofaalama yaantu, ngele hasho otatu ka futithwa ngele omwa yonuka sha nenge mwa kana sha,” okwa ti. “Otu na uunona tau tameke oskola mOmaandaha. Otu na okuninga po shike? Oshinima shika oshe tu guma noonkondo." Otaku hokololwa kutya ofaalama ndjika yopaipindi oya landwa po kuVan der Linden konima yoomvula 28, nomwa li mwa kala aantu pethimbo ndjoka ya landwa. Shi ikolela kaaniilonga yomofaalama ndjika, peha lyokuya tidha mo, Van der Linden okwa tokola a tsikile naaniilonga aakulu oshowo aakalimo mboka ya kala mofaalama ndjika. “Aantu mbano aantu aawanawa, oye tu kwathela lela noonkondo,” omuniilonga mofaalama a hokolola. Oshikunino shepangwe Schultz naVan der Linden, oya mangwa po pamwe nomuhingi Johannes Kamati (61) noshowo omunamimvo 43 Jakob Ganai, ngoka a mangelwa popepi nofaalama ndjika a humbata epangwe olindji – ndjoka tali tengenekwa kutya olyongushu yoN$100 000 – nolya adhika mondjato ye. Shi ikolela koolopta dhopolisi odhindji, mofaalama ndjika omwa li mu na epangwe etalala nekukutu, uupeleki utano ohau longithwa moku li kukutika, oku li pakela (tula muunayilona) noku li londeka li wape li ka landithwe. Oshikwawo, epya lyoohekta 1.55 olya longwa, nepangwe olya mena nolya koka nawa. Aalumentu yane oya holokele mompangu muJuni koshipala shomupanguli Kito Paulus taya tamanekelwa okukala niingangamithi noku yi landitha, uumbudhi wa longekidhwa nuulingilingi. Aafekelwa mbaka ayehe oya holola kutya otaya ka kalelwa po koohahende yopaumwene pethimbo lyeindilo lyawo lyokwiifutila mo mondholongo. - rita@nmh-hub.com.na

Aaniilonga mofaalama yepangwe taya lili oluhepo

Comments

Namibian Sun 2025-07-18

Please login to leave a comment

Aaniilonga mofaalama yepangwe taya lili oluhepo

Comments

Namibian Sun 2025-07-18

Please login to leave a comment

Login