Aalongwa 67 ya pangwa molwuuzigo koKavango Uuzigo

Uuzigo mboka wa liwa mehuliloshiwike kaalongwa poskola Maria Mwengere moshitopolwa shaKavango Uuzilo owa falitha aalongwa 67 koshipangelo, mwa kwatelwa nokamati kokambolo hoka ka li mesiloshimpwiyu lya kwata miiti manga inaa ka tya po hwepo.

Uuzigo mbuka wa liwa kaanaskola oyendji owa halutha aavali nowe etitha omakonakono gomeendelelo ga ningwe kuuministeli wuundjolowele noshowo kuuministeli welongo. Omutaleliskola moshikandjolongo shaShambyu Blasius Haita okwa koleke kutya oshiningwanima shika osha holoka mOlyomakaya sho aalongwa ya li omwiha gwomacaroni nomuhaka gwowors, nokonima oya ka lya omboloto nomuhaka. Mbalambala konima yokulya, aalongwa oya tameke taya ehama mepunda, taya kungu nokupwatuka omutse.

“Aalongwa oya falwa mbala nombesa yoskola koshipangelo shepangelo shaRundu,” Haita a lombwele oshikundaneki shoNamibian Sun. “Omulongwa gumwe okwa kambuka sho a thiki moshipangelo nokwa taambelwa moombete metonatelo lya kwata miiti.”

Lwopokati komutenya mOmaandaha, aalongwa 67 oya pangwa molwuuzigo mbuka. Mokati kawo aalongwa 33 oya taambelwa moombete, omangwa yalwe oya pangwa nokushuna komagumbo. Haita okwa holola woo kutya hasho oshikando shotango aalongwa ya lya uuzigo. “Konima yoomvula mbali ndatu ngashingeyi, aalongwa yatatu oya lile uuzigo, ashike oya pangwa mbala nuuzigo mbuka kawa li wa dhiginina unene,” okwa ti.



Aalongwa otayi ti po hwepo

Omukuluntuwiliki gwelongo moshitopolwa shaKavango Uuzilo Christine Shilima, ngoka a talele po aanaskola mbaka moshipangelo, okwa ti okwa adha okamati kokambolo ka kuutumba mosaala yesiloshimpwiyu lya kwata miiti taka li oshuumbululwa. “Pakulongitha elaka lyoshimbolo, oka holola kutya oka tya po hwepo hewa, nonande otaka ehama natango mepunda,” okwa ti.

Lwoposhitumbetango, uukadhona owundji mboka wa li moombete owa lalekwa, nuukwawo owundji wa tegelelwa wu ka lalekwe koondohotola shampa ya konakono onkalo yawo.



Osheetithi kashi shiwike manga

Shilima okwa dhenge omuthindo kutya omakonakono oga pumbwa okweeeta puuyelele kutya oshike naanaa sha liwa kuunona mbuka. “Olopota yoskola otayi hokolola kutya aalongwa inaya telekelwa iikulya ya felefala. Ngashingeyi otwa hala okukonakona kutya oshike naanaa sha longelwa ( shi li) miikulya moka osho sha puka,” okwa ti.

Uuministeli wUundjolowele nOnkalonawa owa tuma aakonakoni naanambelwa yegameno, opo ya ka konakone nokumona kutya oshike she ta uuzigo mbuka nohakwatonayi nenge uuhasha.



Aavali ya hala okuyelelwa

Aavali oya tumbula kutya oya lulilwa sho itaya lombwelwa sha kombinga yoshinima shika. “Natu ningilwe oshigongi, alikana?” omuvali gumwe a pula. “Uunona wetu inau pitikwa okukala noongodhi momuhandjo, aalongi itaye tu yamukula, katu shi monkalo moka uunona wetu wu li. Otwa limbililwa noonkondo.”

Matrona gwoshipangelo shaRundu Martina Hausiku okwa koleke kutya aalongwa ayehe ya li taya ehama oya li ya tya po hwepo ohela lwokomatango, nonande onkalo yawo tayi talika ngaa natango.

Omukuluntuwiliki gwuundjolowele moshitopolwa ina monika, opo a tye ko sha manga oshifo inashi nyanyangidhwa. [email protected]