Aalandithi yomEenhana ya hala omatala taga kalelele

Aalandithi yomomapandaenda nooyene yoongeshefa ooshona mEenhana otaya indile kungoloneya gwOshitopolwa shaHangwena Kadiva Hamutumwa a kuthe ombinga mokulundululilwa kwawo komatala gopokathimbo, e taya indile ehala lyomalandithilo tali kalelele nokuningilwa ookundathana manga inaaku ningwa elunduluko lya sha.

Omukanda gwomanyenyeto ngoka wa gandjwa kungoloneya Hamutumwa mEtiyali ogwa leshwa kuEvelina Mwetufa, amushanga gwiiniwe gOongeshefa Ooshona mEenhana, ngoka a ti aalandithi oya hala omatala ga yakulwa nawa, ookundathana dhi shi okunuwa omeya nomulandu gwelunduluko gwa yela ngoka tagu gamene iiyemo yawo manga inaa lundululwa.

Aalandithi otaya pula wo ngoloneya a gongele aalandithi, Elelo lyOndoolopa lyaEenhana naakwateliko yooveta noondjokoma opo ya potokonone oshikumungu shika. 

Aalandithi otaya popi kutya oyendji yomuyo oya kala taya longele pehala lyawo konima yomauvathano ngoka ga li ga ningwa nale nelelo lyoshitopolwa naakwatelipo yooveta.    

Mombapila ndjika yomanyenyeto, otaya popi kutya elunduluko kehe olya pumbwa okuningwa konima yoonkundathana dhi na euvathano nomulandu ngoka gwa ziminwa ku ayehe. 

“Otwa indila wu longithe uuleli woye okukwathela epotokonono lyopauyuuki, lyombili nondjila ndjoka tayi gamene iiyemo nesimaneko lyaakwashigwana yaNamibia mboka ya ikolelela koongeshefa ooshona nokomalandithilo gomomapandaenda opo ya hupithe yo naakwanegumbo yawo,” ombapila yomanyenyeto osho tayi lesha ngaaka.

Otaya pula wo euvathano negandjo lyuuyelele wa yela metunguluko, elelo, etopolo nekoko lyomatala, mwa kwatelwa omatokolo ga pita ngoka dha guma aalandithi. Ombapila yomanyenyeto otayi indile wo epotokonono lyombili nolyopaveta kaa pu na elongitho lyoonkondo kaalandithi yombili.

“Omusimanekwa Ngoloneya, ina tu pula ekwatho lyuuwanawa wiikalekelwa. Otwa hala owala uuyuuki, esimaneko, euvathano lya yela, nekandulopo lyomupondo lyopambili,” aalandithi taya ti.

Otaya popi kutya oongeshefa dhomomapandaenda odha simana molwaashoka ota dhi gandja iipumbiwa ya simana, otadhi kwathele aakwanegumbo nodha kwata ko eliko lyokoshitopolwa, opo omaipulo gawo ga pulakenwe okupitila moonkundathana.

Mokutaamba ombapila yomanyenyeto, Hamutumwa okwa ti aalandithi mbaka oyo omugongo gweliko lyondoolopa, ihe okwa indile ya vulike kooveta dha tulwa po.

Okwa uvaneke okukonakona ombapila yomanyenyeto nokukundathana naakwatimeke ayehe opo ku monike ekandulopo lyomukundu lyombili komalimbililo gaalandithi. - [email protected]