Aakalimo yomEshii ya pewa omboola yomeya

Aakalimo yomomukunda Eshii moshikandjohogololo shaPembe moshitopolwa shaHangwena oya talelwa po kungoloneya omukulu Sebastian Ndeitunga noshowo kungoloneya omupe Kadiva Hamutumwa. Oya pandula Ndeitunga sho a kwatele komeho opo ya pewe omboola yomeya, nongashengeyi enota ndjoka ya lili ethimbo nuule olya za po.Ndeitunga, oku ulikwa kunakusa presidente Hage Geingob muNovemba 2023 nokwa kala ngoloneya sigo omuJuni 2025. Ndeitunga okwa ti okwa nongele nokukundana kombinga yenota okupitila miikundaneki nosha li she mu yemateke noonkondo, sho pe na omahala gamwe ge na oomboola omanga omahala omakwawo kaa ge na omeya.“Ondu uvu nayi sho uuyuni auhe tau lesha miifo kombinga yaantu yetu taya mono iihuna taya nu omeya ga luudha,” okwa ti.“Omolwashike iitopolwa yimwe ya huma yi vule iikwawo? Aantu mbaka oyo (ha)ya hogolola – omwa hala ya tonde epangelo?”Omboola, ya tsuwa po mo2024 mOhangwena Aquifer II, ngashingeyi otayi tekwa omeya ga yela kaakalimo yomEshii noyomikunda ne ndhoka dhe egama omukunda Eshii, nomeya ngaka otaga longithwa kaantu, taga nuwa kiimuna nokutekelithwa muukunino.Onkalo ya hwepopalaOmukalimo gomEshii Matheus Nghiweni okwa pandula oongoloneya mOsoondaha molwelongelokumwe lyawo ndjoka lye ya kandulitha po enota.Okwa ti aanamukunda oya kala nokunana nondatu mokumona omeya ga yela, nolundji ohaya ende iinano iile (ookilometa 10) okuka teka omeya nomandini goolitela 25. “Aanelago oomboka ye na oondongi ndhoka hadhi ya humbatitha ko komandini gawo,” okwa ti.“Oto adha uunona wa lala megumbo, wa sa enota nondjala. Pomathimbo gamwe otwa li hatu teke momuthima, ashike omeya oga li ga luudha tho oshoka niimuna omo hayi nu momuthima ngoka. Omathimbo gamwe shampa wa nu omeya ngoka, oto kwata koshimela. Ashike katu na nkene; omeya ngoka ogo owala twa li tu shi,” okwa ti.Nghiweni okwa holola olupandu lwe olunene shili, ta ti itaya ka enda we iinano iile ya ka teke nongashingeyi otaya ki ipyakidhila nokuhwepopaleka oonkalamwenyo dhawo.Uunona owo wu li monomola yotango Hamutumwa, ngoka a longele koNamWater, okwa pandula oshigwana sho shi wete shoka epangelo lya longa, ta ti onzo yomeya yi shi okwiinekelwa oyo natango oshinenenima momukandauvaneko gwongundu yoSwapo noshowo mEthaneko lyoPashigwana Etihamano (NDP6).Ngoloneya oku uvaneke kutya ombelewa yangoloneya otayi ka tunga okinda momukunda nguka, konima sho aakalimo ya keme kutya uunona 28 ohau longelwa mondunda ya dhikwa niiti.Hamutumwa okwa dhenge omuthindo kutya ookinda odha simana oshoka ohadhi longo uunona noku wu longekidhila okuya moskola yongula. Okwa popi kutya Oshiketha shOmapendulopo gAagundjuka osho oshilongitho tashi kondjithitha onkalo yokwaa niilonga mokati kaagundjuka moshikandjohogololo.

Aakalimo yomEshii ya pewa omboola yomeya

Comments

Namibian Sun 2025-12-10

Please login to leave a comment

Aakalimo yomEshii ya pewa omboola yomeya

Comments

Namibian Sun 2025-12-10

Please login to leave a comment

Subscription Required to Access Content ×

Login

Subscription Required to Access Content