Rebebe mokalimosho natango, aafekelwa pamwe naye yaali oya mangululwa

Konima yomvula noomwedhi mbali konima yokumangwa kwe, omuniilonga nale mombaanga nomufekelwa moshipotha shuukengeleledhi Nico Rebebe – ngoka tatu hokololwa oye omudhaninkandangala muufuthi woomiliona N$200 moshitayimbaanga shaBank Windhoek mOpuwo – ina ninga natango eindilo pambelewa opo a pewe ombooloha.

Rebebe okwi igandja kopolisi muMaalitsa 2024 konyala konima yoomwedhi mbali sho a kala ta kongwa, lwanima aafekelwa yalwe 15 oya mangwa po mekwatathano noshiningwanima shuufuthi shomomasiku 13 Januali 2024.

Sigo oompaka, aafekelwa owala yaali yomaafekelwa 16 - Megameno Ankoshi naRosalia Sheengala – ya pewa ompito yokwiifutila mo mondholongo. Oya pewa ombooloha yoodolla eyovi limwe kehe gumwe, momasiku 28 Mai 2024.

Mbaka yaali oya holokele nale lwahugunina mOmpangu yaMangestrata gwaPuwo momasiku ga5 gaNovemba 2024, noshipotha shawo oshu undulilwa komeho komasiku 19 Mai, opo omakonakono ga tsikile.

Ombaanga yoBank Windhoek oya lopotele tango kutya oshimaliwa shi li meni lyoomiliona N$2 osho sha yakwa po. Kakele, lwanima oya ka koleka kutya aafuthi mbaka oya li ya hala okuyaka oomiliona N$200, ihe molwokuyamukula meendelelo oya shonopeke omwaalu nguka. Oshimaliwa shoka sha monika po, ngele opwa monika sha, inashi popiwa natango, nomakonakono otaga tsikile natango.

Shi ikolela koolopota dhopolisi, Rebebe okwa tumine aafekelwa oyendji iimaliwa paelektronika, aafekelwa oyendji mboka aasitangombe yomoKavango Uuzilo. Oohandimwe mbaka anuwa oya hekelwa moskema yuufuthi mbuka neuvaneko lyiifundja kutya otaya kongelwa iilonga noya lombwela ya tote omayalulilo goombanga, hoka Rebebe a tumine iimaliwa shaa li pamulandu.

Oshikwawo, Rebebe okwi itaalwa a zi mombaanga nokakiti ke na oshimaliwa shoN$500 000 koomuma esiku lyoshiningwanima.

Pethimbo lyepulakeno lyoshipotha muNovemba, omukalelipo gwe gwopaveta e mu pewa kepangelo Natji Tjirera okwa thindi epangelo li manithe omakonakono. Oshifo shoNamibian Sun oshu uvite kutya Rebebe okwa dhiladhila oku ka ninga eindilo pambelewa lyokupewa ombooloha momwedhi muka.

Uufuthi

Shi ikolela koolopota dhonale, Rebebe nomukadhona gwe oya yi kohotela yondilo mOpuwo momasiku 12 Januali 2024 – esiku lya tetekele oshiningwanima shika shuufuthi. Nonande ohe ya mo olundji mohotela ndjika, osho sha li oshikando she shotango ta lala mo.

Esiku lya landula ethimbo lyongula, okwe ya kiilonga po07:00, noye a li a thiki piilonga tango esiku ndjoka. Lwopotundi onti-08:00, konima sho aaniilonga pamwe naye ye ya kiilonga, anuwa okwa yi a ka lande ombiila pokaatola kiikulya ke li lwopopepi – anuwa nelalakano "a ngungumaneke omadhiladhilo ge."

Sho a galukile mombaanga, Rebebe anuwa okwa tumu iimaliwa shi limbilika lwaali manga inaa dhenga oongodhi ndhoka kwi itaalwa kutya odhokuunganeka nkene iimaliwa tayi nanwa ko kaafekelwa yalwe moshilongo ashihe. Nopo ihe okwa kutha ko kolusheno oongodhi dhomombaanga nokudhanena woo uufano womombaanga.

Lwopotundi 11:30, okwa tseyithile aaniilonga pamwe naye kutya ota piti mo manga mombaanga. Okwa zi mo mombaanga nokakiti, hoka kwi itaalwa kutya omwa li oshimaliwa koomuma shetata lyomiliona. Nokuza mpoka okwa fadhuka po.

Rebebe okwi itaala kutya omiti dhe dhosuuka odha pu po sho a kala ta kongwa, shoka she mu thiminike a galukile mOpuwo, nokwa ka mangelwa kegumbo lyomukadhona gwe.