Ompangu oya gandja elombwelo kopolisi yi paluthe aanandholongo momasiku gompangu

Ompangu Yopombanda yaShakati oya gandja elombwelo kopolisi yomiitopolwa yaNdangwa, Omungwelume nOshakati opo yi kwashilipaleke kutya aatamanekwa mboka ye li mondjedhililo otaya pewa iikulya yongula, yomutenya noyuulalelo momasiku ngoka taya holoka kompangu, konima sho kwa holoka omalimbililo kutya oonakweedhililwa ohaya kala esiku alihe momasiku gompangu kaaye na sha shokulya. 

Melombwelo lya gandjwa momasiku 23 Juli, Omupanguli Johanna Salionga okwa gandja elombwelo kaakuluntu yiitaasi yopolisi mboka yatatu opo ya kwashilipaleke kutya aatamanekwa otaya mono iikulya manga inaya holoka mompangu osho wo methimbo lyokuholoka kompangu momasiku agehe tage ke ya. 

Elombwelo ndika olya landula omalimbililo kutya aatamanekwa otaya zi mo moondjedhililo dhopolisi manga iikulya yongula inayi gandjwa, nohaya galuka ashike konima sho iikulya yongulohi gandjwa nale, shoka tashi ya thigi kaaye na sha shokulya muule wesiku alihe. 

Elombwelo ndika olya gumu aatamanekwa yahamano mboka ya tamanekelwa ekuthombinga moshipotha shiimbuluma mOmpangu Yopombanda yaShakati. 

Ombelewa yaAmushanga omukuluntu oya pewa elombwelo yi thikithe ookopi dhoombapila dhelombwelo ndika kaakuluntu yiitaasi yopolisi yaNdangwa, Omungwelume noShakati opo ku kwashilipalekwe kutya osha gwanithwa po. 

Etokolo ndika olya zi konima sho hahende gwomOshakati, Wilmarie Horn-Bronkhorst, a pendutha omaipulo guunkundi woonkalo dhaanandholongo mboka ye li moondjedhililo dhopolisi, a popi kutya yamwe ohaya thiki kompangu ya sa ondjala noya nkundipala noonkondo inaaya vula okukutha ombinga pauyuuki miihokolola. 

“Otwa ka undilila ompangu Yopombanda yimwe komeho netompelo kutya aatamanekwa oya li ya nkundipala kondjala. Oshikando shahugunina ya lile oshali ohela potundi 17:00. Shika inashi uka kuuntu,” osho a nyola metseyitho lyokepandja lyokomalungula. 

Okwa popi kutya aatamanekwa, unene tuu mboka taya kuthwa kiilando yilwe, olundji ohaya faula iikulya yongula noyomutenya manga inaya holoka kompangu, nolundji ohaya faula wo uulalelo molwaashoka iikulya yongulohi ohayi gandjwa manga inaya shuna mo moondjedhililo dhawo.

“Okuthiminika omutamanekwa a kalele ompangu esiku alihe inaa lya otashi teya po uuthemba wawo wopakotampango, unene tuu uuthemba wesimano lyuuntu nosho wo womapngu yi li pauyuuki kohi yEkotampango,” osho a yelithile o-Namibian Sun. 

Horn-Bronkhorst okwa indile Uuministeli wIipambele yOmeni, Onkalelo yAakwashigwana, Egameno nEkalekopo lyOmbili opo wu gandje elombwelo kaakuluntu yiitaasi yopolisi ayehe opo ya kwashilipaleke kutya aatamanekwa otaya mono iikulya momasiku gokuholoka kompangu.  

Oshinakugwanithwa shesiloshimpwiyu 

Menyenyeto lyopampangu lya monika ko-Namibian Sun, Horn-Bronkhorst okwa nyenyeta kutya aatamanekwa mboka ye li moondjedhililo dhopolisi oye na uuthemba wopakotampango nowopaveta opo ya pewe iikulya ngele taya ka holoka kompangu, nokwaaya pa iikulya uule wesiku alihe otashi vulu okuteya po uuthemba wawo wuuntu. 

Nonando Ekotampango lyaNamibia inali utha lela uuthemba wiikulya meukililo, okwa popi kutya oshinakugwanithwa shEpangelo otashi zi megameno lyopakotampango, mwa kwatelwa etegameno lyokwaapewa omuntu ondjo, uuthemba wesimaneko lyondjayi nuuthemba wompangu yili pauyuuki. 

“Molwaashoka oye li kohi yesiloshimpwiyu nekondololo lyEpangelo, epangelo otali humbata oshinakugwanithwa shokusila oshipwiyu omukalo gwokuya palutha,” osho a popi, ta gwedha po kutya okutindila aatamanekwa iikulya yo inaya pewa ondjo otashi thikama onga egeelo manga inaku ningwa etokolo notashi dhinitha ompango yokwaagandja ondjo. 

Okwa tsikile wo kutya ondjala otayi vulu okunkundipala oonkondo dhomutamanekwa dhokugandja elombwelo kuhahende gwe, okulandula iihokolola nokukutha ombinga yo-pauyuuki megameno lye. 

Horn-Bronkhorst okwa popi kutya Opolisi yaNamibia oyo yi na oshinakugwanithwa, kohi yOveta yOpolisi, shokugandja iikulya kaatamanekwa mboka ye li moondjedhililo dhopolisi nenge taya kuthwa okuza nokushuna koompangu. Pethimbo olyo tuu ndoka, oshinakugwanithwa shika ohashi yi kOshikondo shOndholongo yaNamibia uuna omutamanekwa a tokolelwa ondholongo. 

Okwa londodha kutya omukalo nguka otagu vulu okweeta iizemo iiwinayi koshikondo ashihe shuuhahende nuuyuuki woshigwana. 

Ondjala yethimbo ele otayi vulu okweeta eundulilo komeho lyiipotha, okunkundipala kwoonkondo dhokutinda omaindilo gombooloha, nokweeta epangelo li ningilwe iihokolola yokukongela iiyemo yuuthemba wopakotampango nosho wo okufinyafinywa kOmbelewa yOmutseyipanguli, osho a popi. 

Oshinima shika osha holoka miipotha oyindji opo ya pita yompangu. Pethimbo lyeindilo lyombooloha yOmundohotola Fillemon 'Fly' Nakanduungile petameko lyomumvo nguka, hahende gwe Smart Elago okwa lombwele Ompangu yaMangestrata yaNdangwa kutya omugamenwa gwe iha mono iipalutha ya gwana ngele ta ka holoka kompangu, shoka tashi etitha egwopevi lyosuuka mombinzi ye nosho wo etelele. 

Omupopiliko gwOpolisi, omupevikomufala Kauna Shikwambi, ina yamukula komapulo sigo ethimbo oshinyplwa sha gandjwa koshinyanyangidho.