‘Itandi taamba ko ondjo kayishi yandje’ - Shikwaya ta ti

Omufekelwa gwedhipago Petrus Shikwaya okwa tseyithile ompangu yaMangestalata yaNdangwa mEtitatu kutya ‘ita geelelwa oshinima ineeshi longa,’ pethimbo eindilo lye lyombooloha lya tsikile komeho gaMangestalata Kaeren Kleopas. 

Shikwaya oku li gumwe gwomaalumentu yaatamanekwa yahamano taya fekelelwa edhipago lyOmutamanekinkuluntu gwOmpangu yaNdangwa, Justine Shiweda. Okwa popi oohapu ndhika pethimbo a li ta pulapulwa ishewe kuhahende gwe, Murray Shikongo, konima sho a li a pulapulwa muule kOmutamaneki gwEpangelo, Yeukai Kangira. Ompangu oya uvu kutya omishangwa dha zi moongodhi dhopeke otaku fekelwa tadhi ulike omakwatathano pokati kaShikwaya na hekulu, Abner Matheus, ngoka Epangelo tali popi kutya oye a tula po omulandu gwedhipago lyaShiweda.

Koonzo dhuumbangi mboka wa tualwa komeho gompangu, Shikwaya naMatheus oya popi uule woondagula 81 mOshiwike sha zi eti-21 lyaSepetemba omvula ya zi ko, noondagula 17 meti-29 lyaSepetemba. Ompangu oya uvu wo kutya Matheus otaku fekelwa a li a dhengela Shikwaya ongodhi meti-17 lyaOktoba, eshiku moka Shiweda taku popiwa a li a yahwa nokutilwa aasiti.

Pethimbo lyomapulapulo gomuule, Shikwaya okwiikala edhiladhilo lyoku hangana nelalakano lyokudhipaga Shiweda. “Inandi hangana nelalakano lyokudhipaga. Onda gandja owala iimaliwa pamalombwelo gaAbner Matheus,” okwa lombwele ompangu.

Kangira okwa popi kutya okambo kobaanga hoka ke na ekwatathano naShikwaya oka li ka longithwa okutuma o-N$1 200 miifuta iyali yo-N$600, iimaliwa mbyoka Epangelo tali popi kutya oya li ya longithwa okulanda uuzigo (aasiti) shoka taku fekelwa sha longithwa meponokelo ndyoka.  

Shikwaya okwa ti ye kena ontseyo ngele iimaliwa mbyoka a tumu oya li ya longithwa shike, nokwa popi kutya okwa tumu owala iimaliwa pamalombwelo hekulu. Epangelo olya gwedhako wo kutya Shikwaya okwa li a tumu oo-N$4 950 meti-17 lyaKotoba omvula ya zi ko, esiku lyeponokelo, ya tuminwa omuntu ngoka sigo oompaka e li omufekelwa ngoka ta kongwa kopolisi.

"Okutuma kwandje kwoshimaliwa osha li owala pamalombwelo gaAbner Matheus,” ta ti.

Epangelo olya popi wo kutya Shikwaya okwa li a landa ohauto yoSuzuki opo e yi pe Lukas Nekwiyu onga omagano, ngoka taku fekelwa e na ekwatathano nelando lyaasiti ndjoka ya li ya longithwa meponokelo ndyoka. Konima, oshitukutuku shoka osha ka ya moshiponga sha ningilwa monooli yaNamibia. Shikwaya okwa tindi omapopyo ngoka, nokwa ti kutya osheenditho shoka okwa li e shi landa konima sho a li a holokelwa nokwa indilwa kuhekulu gulwe, Abner Samuel, ngoka a li e na elalakano lyoku yi longitha miilonga yomopate yokaYango. 

Kangira okwa popi wo kutya Shikwaya okwa li a tumu iimaliwa yomahooli gohauto ndjoka ya li ya fala oaasiti kOndangwa. Samuel okutamanekwa piikalekelo moshinima shefukilo lyokwiilikolela oo-N$253 000 okuza koSanlam, oshimaliwa shoka Epangelo tali popi kutya osha li sha pitithwa mokambo kobaanga kaShikwaya.

Epangelo olya popi wo kutya oshimaliwa shi vulithe pomiliona yimwe shoka shi na ekwatathano nelongo lyuulingilingi moSanlam osha pitithilwa mokambo kobaanga oko tuu hoka. Shikwaya okwa tsikile nokupopya kutya okwa li Aamwalwa ka li shi sha nongele okambo ke oka li taka longithwa miilonga yuukolokoshi, nokwa popi kutya, Matheus okwa li oye te ka longitha, ye ina tseya sha kombinga yiifuta mbyoka yaa li pamulaundu. “Itandi geelelwa oshinima hangame nde shi ninga,” Shikwaya a endulula. 

Shikwaya naatamanekwa pamwe naye otaya tsakaneke iipotha ya kwatela mo edhipago, okuhangana nelalakano lyokudhipaga nosho wo okuya omulandu gwiilonga yuuyuki moshipala moshikumungu shedhipago lyaShiweda, ngoka a li a hulitha muFebuluali konima sho a yahwa nokuponokelwa nuuzigo woaasiti megumbo lye.

Ompangu yeindilo lyombooloha onkene tayi tsikile.