Hengari nofekelwa omukwawo ya tindilwa obooloha

Ompangu oya li yu udha aakwanezimo yaafekelwa yaali noshowo yanakuningwa oshihakanwa (21), pethimbo minista omukulu guunamapya Mac Hengari (59) nomufekelwa omukwawo gwoomvula 30 ya holoka lwotango mOmpangu yaMangestrata gwaVenduka. Ayehe yaali oya tindilwa obooloha.Hengari okwa mangwa po mOlyomakaya konima sho taku hokololwa a li ta kambadhala okufuta oombumbo omukiintu gwoomvula 21, elalakano a kuthe mo oshipotha shekwantonkonga shoka ta tamanekelwa.Hengari ota ti ke na ondjo nande.Shi ikolela komukanda gwopaveta, Hengari nomufekelwa mukwawo, omumwayinamati gwanakuningwa oshihakanwa, oya tulwa miipandeko momasiku 26 Apilili konima sho ya li taya kambadhala okugandja ombumbo yoshimaliwa shoN$222 000 opo ya heke oshihakanwa shi kuthe mo oshipotha shoka sha patululilwa minista.Omumwayinamati gwanakuningwa oshihakanwa okwe ya moshilongo okuza kOndowishi opo a kale omupokati megandjo lyoshimaliwa shika, naayehe yaali oya kwatwa sho ya li taya kambadhala okugandja oshimaliwa.Aafekelwa mbaka yaali otaya tamanekelwa okuya oveta moshipala, mekwatathano nokutaaguluka Oveta yOkugongala shaa li paveta.Omukalelipo gwopaveta a kalela po epangelo Seredine Jacobs ohela okwe ya tindile obooloha, nomatompelo kutya okwa tila Hengari otashi vulika e ki idhope momakonakono gopolisi ngoka ge li metifa. Omufekelwa omukwawo, ngoka a kala kOndowishi, noita vulu okutumbulwa kedhina omolwegameno lyokamwayinakadhona, naye okwa tindilwa obooloha, oshoka ota vulu okufadhuka po. Jacobs okwi indile oshipotha shu undulilwe komeho manga Epangelo lya tegelela uuyelele tau zi koombangi mbali dhepangelo wu gongelwe wo wu pwe okulongekidhwa, noshowo okukutha uumbangi wulwe tau adhika moongodhi nookompiuta dhawo, mboka wa li inau fatulwa pethimbo lyepulakeno lyoshipotha oshikando shotango .Aafekelwa mbaka yaali otaya kala mokakuma moWindhoek Correctional Facility sigo taya ka holoka ishewe mompangu momasiku 3 Juni..Hengari okwa kalelwa po ku ahende Milton Engelbretch, omanga omufekelwa omukwawo okwa kalelwa po ku ahende Enos Mwakondange.Omahokololo omatilithi taga popilwa ominista onkuluHengari natango ota konenwa miipotha 11 mwa kwatelwa ekwantonkonga, ekwatombambyona nokuthiminika nakuningwa oshihakanwa a hoye mo epunda.Nonande Hengari kali a mangwa po nenge a hokololithwe molwiipotha mbyoka, ota tamanekelwa okukwata onkonga omukiintu nguka lwiikando oyindji okuza sho a li okakadhona koomvula 16 okuza mo2019 sigo omu Septemba 2024. Nakuningwa oshihakanwa okwa patulula oshipotha mu Novemba 2024, okwa lundile ominista kutya oye mu thiminike a hoye mo epunda.Hengari okwa kuthwa miilonga ku Presidente Netumbo Nandi-Ndaitwah omasiku omashona ga tetekele okumangwa po kwe. Nonande omahokololo ta popilwa omatilithi, Hengari oko a li kegumbo lyepangelo shoNandi-Ndaitwah a popitha oshigwana lwotango kombinga yonkalo moshilongo (Sona) momasiku 24 Apilili. Okwa li woo momutumba gwopashigwana natango mEtitano.Manga ina ninga ominista uule womwedhi gumwe, Hengari okwa li e na oopoosa oonene moshikondo shiikwaliko nomiiputudhilo yelongo lyopombanda. Okwa li omukuluntuwiliki gwoshiputudhilo shoNamibia Business School nokwa li omukuluntu nomunawino miikwaliko koNamibia Investment Centre.Minista omukulu okwa longele nale ongamushanga gwopaumwene gwomuprima Hage Geingob manga inaa ka ninga omukwatakanithi gwopoloyeka yOkolidji yokudheula aaniilonga mepangelo hoka a longo ko oomwedhi oonshona. MuMaarsa 2003 okwa li a ka tsikila eilongo lye koFrance.Omashongo mofamiliPokati mpoka, Zelna Hengari omukulukadhi gwe, okwa li miikundaneki konima sho ehangano lyoNamibia Wildlife Resorts (NWR) lya vene po oshipotha sho a li a patululilwa. Okwa li a pulwa a fute iifuta yopaveta tayi tengenekelwa poN$500 000 sho ine shi pondola okufutitha paveta ehangano lyoNWR oomiliona N$7.5 noshowo ominista onkulu yomidhingoloko Pohamba Shifeta nominista onkulu yomahangano gopapangelo Leon Jooste, omolwenyateko lyedhina lyeEnanathano olye ya po molweuvathano lyuule woomvula 30 noSun Karros ndjoka ya pewa oshinakugwanithwa shokutunga nokutamununa mo ehala lyoSesriem. Euvathano ndjoka oye e li shaina nonande lwanima olye ekelwahi oshoka olya taaguluka ooveta dhokumbestela. Hengari okwa tiwa okwa fundju kutya euvathano olye ya po paziminino lyewilikongundu lyoNWR.

Hengari nofekelwa omukwawo ya tindilwa obooloha

Comments

Namibian Sun 2025-05-01

Please login to leave a comment

Hengari nofekelwa omukwawo ya tindilwa obooloha

Comments

Namibian Sun 2025-05-01

Please login to leave a comment

Login