Omupwidhi a yonagula omaliko goposkola yawo onkulu

Aapambele yomunuuvu gwopamadhiladhilo gwoomvula 20, ngoka anuwa a longele uushada oohauto dhaalongi yane yoposkola mpoka a li ha skola nale ongula yEtiyali, oskola ndjoka yi li popepi nOngwediva. Oya pe ombedhi aapolisi molwashoka oya opolisi oya kakadhala nokweenda kashona mokuya yi gandje ekwatho kaantu ye li muudhigu.Nonande olopota yotango yopolisi oya holola kutya omunuuvu okwiiyaka mOsaala 16 mOshipangelo shEpangelo shaShakati, moka a li ta pangwa uuvu wopamadhiladhilo wontumba, omukuluntu gwoshipangelo ta kwathele, Dr Johannes Shilongo, okwa yelitha kutya okwa pangwa mOmaandaha a zi kegumbo noka li moombete. Shilongo okwa gwedha po kutya omumati nguka omugundjuka, ngoka a hulile mOndondo 10, oshoka ine shi enditha nawa, opo a tsikile komeho. Mongashingeyi oku li moombete.Komanda gwopolisi moshitopolwa shaShana, Komufala Naftal Lungameni Sakaria, okwa ti kutya oshiningwanima shika osha ningwa lwoputundi 10:40 poprimaskola yaNiitembu momukunda Iikango moshikandjohogololo shaNgwediva.Sakaria okwa ti oonakuyonenwa omwa kwatelwa omukuluntuskola, aalongi yatatu nomukiintu gumwe omukalimo gwomukunda ngoka.Okwa fatulula kutya lwopotundi 10:40, pethimbo aalongwa ya li taya yi kekulo opo ya ye pokamulongo ya ka nwe otee, oya mono omumati omugundjuka te ya tsakaneke a yedha ombele yOkapi."Sho aalongwa ya thiki kekulo, oya mono omufekelwa ta matuka te ya kuyo e na ombele peke. Mbalambala aalongwa oya tondekele nokushuna moongulu dhawo, taya kugu nokunothela ko aalongi yawo noshowo omukuluntuskola gwawo," Sakaria a ti.Omukuluntuskola Gabriel Daniel mbalambala okwa dhengele Opolisi yaNgwediva opo yi ye yi ya popile.“Manga a li ta popi mongodhi, omufekelwa okwa yi mekulo nokwa pimpi mo nokutilahi mo etete lyaalongwa moombiga adhihe ndatu," Sakaria a holola.Konima yokutilahi iikulya, omufekelwa okwa yi kehala hoka kwa li ku iihauto yaalongi, nokutsa omataiyela giihauto yaantu itatu, a longitha ombele ye yOkapi. Okwa tsikile nokutatula omakende, omakende gokomeho yohauto noshowo iiparte yilwe yohauto, mwa kwatelwa uulikithi womohauto nomasipili gomooha, shika okwe shi ningi noshitenda shoka a teya kokapomba komeya.Uupwidhi mbuka owa tsikile sho omufekelwa a gama oskola kombinga yokuuzilo hoka a adha ohauto onkwawo yi li momuti ndjoka e yi longele uushada nayi sho omataiyela e ga tsu nokuga kutha omuku.Sakaria okwa ti aanamukunda oya yi molukongo lwomufekelwa nguka sigo opolisi yopalapala tayi thiki noku mu manga. Lwanima okwa falwa kOshipangelo shEpangelo shaShakati.Ekanitho painiwe lye etwa keyonagulo ndika natango inali tulwa kumwe.Sakaria okwa koleke kutya omatungo goskola inaga longelwa uushada nokape na omulongwa a monena po oshiponga. Nonande ongawo, omufekelwa ina mangwa po nenge a kale a kalelwa kopolisi sho e li moombete, omolwa onkalo ye yuukundi wopamadhiladhilo. UupwidhiMoonkundathana noshifo shoNamibian Sun Metitatu megumbo lye, Reginald Lekenata Johannes (62) okwa ti kutya uunkundi wopamadhiladhilo wokatekulu owa tameke omwedhi gwa zi ko sho ka taambelwa moombete mOshipangelo shEpangelo shaShakati. Ina vula okukoleka uunkundi wopamaludhilo wokatekulu kutya owoludhi luni ashike oka pewa omiti, noka tinda okudhi nwa.Omukulupe a lulilwa kuunkundi wokatekulu okwa fatulula kutya muule woomvula 17 a putudha nokukala nokatekulu, inaka ulika nale omandhindhiliko guunkundu wopamadhiladhilo sigo omomwedhi gwa zi ko, moka ya fekele kutya oka tameka okuhila omapangwe.Okwa dhimbulukwa kutya ongula yOsoondaha, okatekulu oke mu pula kutya okwa yaguma shike ongulohi. Naasho a yamukula kutya inaya yaguma nande, okatekulu oke mu lombwele kutya oka yaguma anuwa omutondi e ka lombwele ka dhenge yinakulu.Johannes ina pupa ko koohapu dhokatekulu nokwa ka longa mepya lye, nokwa li a lombwele okatekulu ka kale megumbo. Kakele, lwanima okwa lombwelwa kutya okatekulu oka li kaandja mushiinda, noka tindila ko to inaa ka hala okugalukila kegumbo oshoka anuwa oka tila okufalwa koshipangelo ka ka wendwe, nonande okuwendwa kake ku hole nande.“Okwa ti, ‘Aawe, itandi yi ko kegumbo oshoka oku na iiluli, nomwa hala mu fale ndje ndi ka wendwe.’ Onde mu shilipaleke kutya itandi mu fala koshipangelo, ihe natango okwa tindi okuya kegumbo,” Johannes a hokolola nokulila.Inaya mona ekwathoSho onkalo ye ya nayipala, otaku hokololwa kutya okwa tameke ta dhenge aakwanezimo. Johannes okwa ka konga ekwatho kopolisi yopopepi ndjoka ya li peinda lyomoondjila pOshiko, ihe okwa ti kutya aapolisi kaya li ye na ohauto manga.“Inatu mona mpoka u uka notwa shuna kegumbo. Ongula yOmaandaha, otwa dhengelwa ongodhi tayi hokolola kutya okwa monika tu uvitha kopate, noohauto tadhi mu kunduluka nuukeka. Ondi indile aamwayina ye ke mu konge. Nopethimbo ndjoka, okwa li pendiki lyoostola pOshana Mall, ta piyaganeke aantu mboka taya nana oshimaliwa shawo puuboba (ATM). Natango, otwa dhengele opolisi, nomoshikando shika natango, oya ti kutya kaye na ohauto. Opolisi ya tya ngiini yaa na iihauto?” okwa pula.Komatango gesiku ndjoka, okwa tseyithilwa kutya okatekulu oka li taka longele uushada ohauto yaantu pokandingosho ke li lwopopepi.Okwa lombwele okatekulu kamwe ke ku mu (omufekelwa) tale ko. Nonande e shi pondola mokumanga, oonkambadhala dhe ndhika odhe mu thigi a lumatwa komulungu gwopevi, ngoka gwa mangwa nomalapi ngashingeyi. Ofamili oye mu eta kegumbo yi tegelele opolisi, ndjoka ye ke ya po02:00 opo yi mu fale koshipangelo.Kakele, omufekelwa okwi iyaka moshipangelo nokugalukila kegumbo. Johannes natango ishewe okwa dhengele opolisi opo e yi lopotele kutya okatekulu oki iyaka mo moombete, ihe natango oye shi endulula kutya kaye na oshihauto manga.“Ando oyi ile pethimbo, ando ina longa iilonga mbyoka a longo,” okwa popi nokuyemata.Eyamukulo lyopolisiKomufala Sakaria okwe ekelehi omapopyo kutya opolisi inayi kwathela sha, okwa ti kutya oya kwathela aakwanezimo mbaka aluhe sho ya dhengele opolisi.Okwa holola kutya omaliko gopolisi oga dhigupalelwa oshoka olundji otaga longithwa ga ka kwathele aakwanezimo yaanuuvu yopamadhiladhilo.“Aakwanezimo yaanuuvu yopamadhiladhilo naya kwashilipaleke kutya aapambele yawo otaya nu omiti dhawo nawa opo onkalo yawo yaa nayipala. Oshikumungu shika tashi indjipala unene. Nonande otu uvite uukwawo wanankali naakwanezimo ya lulilwa, oshili oondjika kutya aasilishimpwiyu yaavu itaya itula mo mepango lyaavu yawo. Ohaya tegelele sigo onkalo ya nayipala. Ohatu kwathwa ngaashi tatu vulu, ihe otu na iikwaniipangitho tayi nyangwanyangwa,” Sakaria a ti.

Omupwidhi a yonagula omaliko goposkola yawo onkulu

Comments

Namibian Sun 2025-05-01

Please login to leave a comment

Omupwidhi a yonagula omaliko goposkola yawo onkulu

Comments

Namibian Sun 2025-05-01

Please login to leave a comment

Login