Uuministeli wuundjolowele tau ka futa omiliona N$1.2 molwa uuhasha

Uuministeli wuundjolowele owa zimina okufuta oshimaliwa shomiliona N$ 1.2, tashi futwa aavali yokanona okakadhona ka valwa ka sa, omolwa uuhasha waapangi noondohotola mOshipangelo shEpangelo shaTjiwarongo. Yvonne naJacques Pollmann, aahokanathani, oya pula uuministeli wuundjolowele oomiliona N$4 mu Maarsa 2023, opamwe naminista yuundjolowele Dr Kalumbi Shangula, noshowo oondohotola yomadhina Felix Mutombo na ‘Biti’ (edhina ngaashi tali holoka moondokumende dhopaveta), oshoka oya silwa okamwanakadhona konima yoomvula ndatu ngaashingeyi.Okahanona oka valwa ka sa, oshoka anuwa oka sile oshimpwininika mela lyayina – nonande yina yokakonona a pula lwiikando oyindji opo a tandwe mbalambala opo a mone okanona. ‘Omupya’Dr Varnia Wicomb, ndohotola yopaunamiti ngoka a gandja uumbangi kompangu, okwa ti Yvonne okwa li e li metegelelo evalelwapeni, nokwa li e na okumona okanona momasiku 4 Maarsa 2022.“Yvonne okwa li high-risk patient, oshoka okwa li omukuluntu. Okanona kAakwa Pollmann osho omupya.”Okwa ti kutya “Omatokolo ga kundipala pethimbo lyomathulo oga ningwa okuza petameko elela sigo ethimbo lyoshitheta nolyokutandwa meendelelo.”Jacques okwa lombwele omupanguli kutya okwa pula Dr Biti lwiikando 16 opo a kwathele omukulukadhi gwe. “Oondohotola naapangi oya kala taye tu lombwele tu ngungumane, noya ti shaashi omukulukadhi gwandje opo ta mono lwotango, anuwa ke shi oshitheta.”Ehaluko Moshipotha shawo shika, Yvonne okwa hokolola kutya momasiku 6 Maarsa 2022, manga a li metegelelo evalelwapeni nota thetwa noonkondo, okwa taambelwa moombete mokanyothi mOshipangelo shEpangelo shaTjiwarongo.Okwa lombwele ompangu kutya oondohotola naapangi, mboka a li mesiloshimpwiyu lyawo, oya lata noowili dhi vule pomulongo nambali moku mu tanda.“Onda lombwela ndaa makele sha nenge ndi new sha, ishewe inaandi falwa kokathano(sonar) hela nda yile moombete. Omaindilo getu atuhe( gandje nomusamane gwandje opo ando ndi tandwe mbala inaga pulakenwa kaapangi, kaavalithi noondohotola,” Yvonne a dhimbulukwa. Okwa gwedha po kutya oshiningwanima shoka oshe mu halutha noonkondo.Molwa okuvulwa noonkondo, okanona kaYvonne oka hulitha. “Okanona oka si oshimpwininika, oka valwa itaka fudha nuuluyi owe ehama,” Osho tashi hololwa moombapila dhopaveta. Euvathano lyAakwapollman nuuministeli wuundjoloweleEindilo lyaahokanathani opo ya futwe oomiliona N$4 olya kwatela mo ofuto yakwalukehe, okuhaluka noonkondo, okukala muudhigu nomuuwehame, elunduluko monkalamwenyo niifuta yoshipangelo yokuya kaahungimwenyo opo aavali ya vule okutaamba ko eso lyokamwanakadhona kawo.Omupanguli mOmpangu yOpombanda yaVenduka, Beatrix de Jager okwa tokola mEtitano lya zi ko kutya ompangu oya taamba ko uumbangihokololo wa gandjwa ku Dr Wicomb kutya omiti dha pewa Yvonne odho dha geyeke oshitheta, shoka she eta ombepo yohapi yi shonopale kokanona, nonkalo ndjika kohugunina oye etitha eso lyokanona.Omupanguli okwa ti wo aahokanathani mbaka oye shi ulike kutya uuhasha woondohotola naapangi owo we etitha eso lyokamwanakadhona.

Uuministeli wuundjolowele tau ka futa omiliona N$1.2 molwa uuhasha

Comments

Namibian Sun 2025-06-18

Please login to leave a comment

Uuministeli wuundjolowele tau ka futa omiliona N$1.2 molwa uuhasha

Comments

Namibian Sun 2025-06-18

Please login to leave a comment

Login