Opoloyeka yokutunga okapale koshinanena moNdangwa ya yambidhidhwa kuNFCPT

ONamibia Fish Consumption Promotion Trust (NFCPT) oya gandja N$300 000 kElelo lyOndoolopa yaNdangwa li ya yambidhidhe mokutunga okapale komaudhano koshinanena koomiiliona N$240.Sigo okonena, ondoolopa oya gandja ko oomiliona N$25 kopoloyeka ndjika okuza 2017, noomiliona dha konda N$16 odha tulwa poshitaafula momumvo gwoshimaliwa 2024-2025 .Ondoolopa oya tengeneka opoloyeka tayi ka pula oshimaliwa shoomiliona N$240 okuthika ko2030.Omukuluntupitithi gwoNFCPT Victor Pea ohela okwa ti ehangano lyawo oli itula mo mokuyambula po aagundjuka, unenene aanaskola.“ONFCPT oya tala keyambulopo lyaanaskola okupitila mokugandja omakwatho ogendji koshikondo shelongo nokuunona wu li moluhepo,” Pea a ti.“Onkene, otwi itaala kutya okuyambidhidha opoloyeka ndjika, otatu kwatha ondoolopa nokweeta mo uupale womaudhano wa pumbiwa unene, mboka tau ka longithwa unene kaanona naagundjuka. Shika otashi kwatha aanona yetu ya adhe omalalakano gawo meudhililo, hamokwiilonga owala ihe nomomaudhano wo, shoka moompito odhindji hashi endele pamwe nokwashilipaleka aagundjuka otaa mana oskola ongaantu yongushu( ye na oowino odhindji).”Endiki lyaayeheOkapale komaudhano ta ka tungwa ngashingeyi otaka ka kala ehala lyaayehe, ke na omaudhano gi ili nogi ili haga dhanenwa mo ngaashi okunuka (pole vault), okudhaadhiga( discus), ontanu, okuumbila egonga kokule (javelin),okuumba (shot put), okumatuka nokuyanda omandangalati mondjila (steeplechase), okunuka (triple jump), etanga lyookompadhi nohockey.Okapale komaudhano ota ka dhanenwa wo omaudhano galwe ngaashi obasketball, etanga lyomokambamba, ovolleyball, otennis noboksa.Okapale kiipundi 20 000 ota ka yakula aakwiilongo noshowo Aanamibia ya za kiitopolwa niitopolwa.Omukuluntupitithi gwElelo lyOndoolopa yaNdangwa Ismael Namugongo okwa ti okapale ota ka lundulula onooli yaNamibia nota ka kala ongonyeka yokudheula omanyakwa gomaudhano gomonakuyiwa nogo aagundjuka naadhani yomoshitopolwa.“Otatu lalakanene okukala niinyangadhalwa yomaudhano ya dhenga mbanda ya unganekwa mOwambo, otatu kambadhala okugandja ompito kaadhani yomaudhano ga yooloka mOwambo ya yakule aayenda yospana yopashigwana ngele yorugby, yokutondoka noyokatanga komokambamba. Itaa shi ningilwa shike? Otashi vulu okuningwa noshi na uuningilo,” Namugongo a dhenge omuthindo.“Shika osha fa oshidhigu, ashike otwi itaala otatu vulu oku shi ninga, unenene nomayambidhidho agehe tatu pewa komahangano gi ili nogi ili moNamibia," okwa ti. “Otwa pandula oNamibia Fish Consumption and Promotion Trust sho ye tu yambidhidha , notandi indile omahangano galwe agehe, mwa kwatelwa uuministeli womaudhano, wu yambidhidhe opoloyeka ndjika," Namugongo i indile.“Ongepangelo lyopashitopolwa, otatu vulu owala okutameka, ashike omahangano galwe niikondo yepangelo nage ye mo noku tu yambidhidha ngaashi oNamibia Fish Consumption and Promotion Trust ye shi ningi nena nayalwe mboka ye tu yambidhidha monale.”kenya@namibiansun.com

Opoloyeka yokutunga okapale koshinanena moNdangwa ya yambidhidhwa kuNFCPT

Comments

Namibian Sun 2025-09-18

Please login to leave a comment

Opoloyeka yokutunga okapale koshinanena moNdangwa ya yambidhidhwa kuNFCPT

Comments

Namibian Sun 2025-09-18

Please login to leave a comment

Login