Oopate dhomomalukanda gaNdangwa dha ningi dhomamanya

Elelo lyondoolopa yaNdangwa olya hwepopaleke oopate momalukanda gahamano pankambadhala yokugwedhela ongushu oopate dhetu nokukwatha meendathano( ekwatathano) lyaakalimo. Shi ikolela komupopiliko gwelelo lyondoolopa yaNdangwa, Petrina Shitalangaho-Mutikisha, opoloyeka oya tamekwa muMai noya manithwa muJuni. “Opoloyeka ndjika inayi tala owala koopate ashike otayi lalakanene wo okunkondopeka eliko lyondoolopa okupitila mokuhwepopaleka oshikondo shiiyenditho okupitila momayakulo noondongelwa tadhi thiki nawa. Omayakulo gopaulumompumbwe otaga ka enda nawa molwa oopate dhi li nawa, shoka tashi hupitha oomwenyo nokushonopeka eyonagulo lyomaliko,” Shitalangaho-Mutikisha a ti. Omalukanda ga mono ohenda ongaashi Onantsi, Uupopo, Ondiiyala, Omakulukuma, Omashaka nOkangwena.

Olupandu

Shitalangaho-Mutikisha okwa ti opoloyeka, ndjoka ya pula elelo N$800 000, otayi lalakanene okukutha po omashongo ga taalela aakalimo, aahingi naafaalelwa mboka, mvula namvula, yi idhidhimikile oopate oombwinayi, unene pethimbo lyomvula. “Oshinyangadhalwa shika otashi lalakanene okuhwepopaleka oopate nomakwatathano nomaendathano momalukanda ngaka, unene pethimbo lyomvula. Uupate womamanya owa tegelelwa wu kuthe po omukundu gwa taalelwa kaakalimo nokaaniihauto omolwa oopate oombwinayi,” okwa fatulula. “Okuya po kwoopate dhomamanya otaku hwepopaleke oopate dhetu, notaku ningi okweenda kwaakalimo okupu noya kale megameno. “Olupandu lwaakalimo otalu ulike esimano nondjundo yoshinyangadhalwa shika. Okutala kwaayihe, opoloyeka ndjika oyo onkatu ombwanawa yokuhwepopalitha onkalo yaakalimo momalukanda.” Okwa ti oopoloyeka dhomonakuyiwa otadhi ka kwatelwa mo omapendulopo ga gwedhwa po, ngaashi oosystema dhomatondokelo gomeya nomeya gohanya, ku hwepopalekwe natango onkalo momalukanda ngaka.

[email protected]