Osekundoskola Atshipala ya pata uule wiiwike iyali omolwuupyakadhi womeya gonyanata

Osikola yOsekondele yAtshipala, mOshikandjo skola shaElim, oya pata uule wiiwike iyali omolwuupyakadhi womeya gonyata shoka sha thiminike aalongwa ya ze mo moongulunongelo.

Aavali naatekuli mboka ya kwatathana noNetwork Media Hub oya lopota kutya aanona yawo inaya ya kosikola okuza meti 8 Juli 2026. Oya holola euvonayi lyawo omolwefaulo lyomakwatathano okuza kosikola shi na sha naunake iilonga yosikola tayi tameke ishewe.

Osikola oyi na aalongwa taya tengenekwa po-800, noyendji yomuyo oye li momuhandjo.

“Pethimbo ndika, aalongwa inaya pewa iilonga yokegumbo, ashike oya tegelelwa ya shange omakonakono gawo gopokati meti 27 lyaAguste. Osikola oyi li nale muupyakadhi welongo tali kanda omapunya. Aanona yetu oya pumbwa ya shune kosikola meendelelo,” omuvali a limbililwa ta popi. 

Walderich Iipinge, omukuluntusikola, owa koleke ko-NMH kutya aalongwa oya tumwa komagumbo omolwuupyakadhi womeya gonyata. 

Okwa popi kutya uupyakadhi mbuka owu li po uule woomvula ndatu. Paunongo waIipinge, oombapila odha tumwa kuUuministeli wIilonga nIiyenditho, mboka wu na oshinakugwanithwa shesiloshimpwiyu lyiitungomwa. 

“Onkalo ndjika oya kwata ethimbo ele noonkondo. Osikola yetu oyi na omuhandjo, nominino dhokuthipa mo omeya itadhi longo nawa. Otashi tula uundjolowele waalongwa moshiponga. Nokuli muJuni, otwa hupu ashike tatu nana nondatu omolwomukalo gwomeya taga ende kashona noonkondo. Uupyakadhi mbuka owa pumbwa etalo lyomeendelelo,” osho a popi. 

Iipinge okwa tsikilile ko kutya oopomba adhihe dhosikola itadhi longo nodha pumbwa oku pingenwa po.

Okwa yelitha kutya aaniilonga okuza kuUuministeli wIilonga nIiyenditho opo ye li posikola taya longo opo ya shunithe ominino ndhika miilonga, nomeya otaga monika taga ende pondondo yi li hwepo.

“Inatu tuma aalongwa komagumbo osho twa hala; oya li onkalo ya pumbwa okuningwa. Otwa tegelela okutseyithila aavali opo aanona ya galuke meendelelo unene tuu sho ominino dhomeya gonyata taga tameke okulonga nawa, molwashono omakonakono gopokati ogeli popepi,” osho a popi.  

Omulongwa gumwe okwa holola omalimbililo shi na sha nokumanitha etendolongo, ta popi kutya nonando oshilongwa shUunamapya osha manithwa, iilongwa ngaashi Physical Science, Omwaalu, nUukwashito inayi manithwa natango. 

Mokuyamukula, Iipinge a kwashilipaleke kutya osikola otayi ka etapo ompangela yokulongekidha ethimbo lyelongolo ndyoka lya kana uuna aalongwa ya galuka. 

Oonkambadhala dhokumona eityo okuza kuPaulus Kashiimbi, Omukuluntuwiliki gwElongo mOshitopolwa shaMusati, inadhi za uupondoli pethimbo lyenyanyangidho lyoshinyolwa shika.