Omulongi a tidhwa miilonga molwa okudhenga omulongwa

Omulongi poprimaskola yaHashiyana mOngwediva moshikandjolongo shaMpundja okwa tidhwa miilonga molwashoka otaku hokololwa a ehameke omulongwa gwomondondo ontiheyali sho e mu pula a yeluthe oshipundi mombanda ethimbo lya konda powili yimwe.Mombilive ya nyolwa mo28 Kotomba 2021, amushanga omukuluntu muuministeli welongo Sanet Steenkamp okwa nyolele omulongi, Petrus Ndeulita, okupitila momukuluntuskola gwawo, ta holola kutya ota tamanekelwa omuyonena.Ndeulita okwa monika ondjo nokwa kuthwa miilonga ku Steenkamp pambilive tayi hulitha po iilonga ye mepangelo konima yiiwike iyali ya piti Namibian Sun okwe shi kundana. Kuyele mu Juli 2024, Steenkamp okwa lombwele Ndeulita okupitila momukuluntuskola ta kwathele Agenes Nghipondoka kutya ombilive otayi mu tseyithile kutya Ombelewa yOmuprima pamathaneko gOkakomisi kAaniilonga mEpangelo, oya zimina kutya na ze mo mIilonga yEpangelo. “Esiku lyoye lyahugunina miilonga esiku ndyoka to yakula ombilive ndjika. Shi ikolela kompango D.II yomuniilonga mepangelo omuniilonga ngele okwa thigi po iilonga yepangelo, molwa etompelo kehe, ota ka futwa omasiku koomuma mesimaneko lyomasiku gefudho ge, ashike itaga gandjwa manga inoo za miilonga,” okwa ti. Steenkamp okwa ti ofuto yomasiku ge otayi longekidhwa payalulo lyongushu yoshimaliwa koomuma ndjoka hayi yalulwa noformula ngaashi tayi holoka mompango yaaniilonga yepangelo. Eyono lyotangoMombilive ye yopetameko mo 2021 Steenkamp okwa lombwele Ndeulita kutya okwiitaala omutamenakwa okwiiningi e na ondjo momuyonena nguka na nanyolele uuministeli muule womasiku 14 okuza kesiku lyokutamenakwa kutya okwa zimina nenge okwa tinda nongele okwa hala na fatulule pamushangwa eyono ta tamanekelwa. “Ngele ezimino nenge etindo pamushangwa inali yakulwa muule wethimbo lya gandjwa, otashi ka talika ko ongo a monika ondjo momuyonena ngaashi ta tamanekelwa netokolo lya gwedhwa po otali ka ningwa shi ikolela komilandu dha tulwa po,” okwa ti. Ehepeko lyomulongwaSteenkamp okwa nyenyeta kutya Ndeulita okwa ndopa okukala omuvali sho omulongwa e li poskola. Okwa ti okwa ndopa okusimaneka uuntu womulongwa nomauthemba ge gopakotampango, a sitha ohoni nokuhepeka omulongwa nokwa dhenge omulongwa nenge e mu geele negeelo kehe lilwe tali shundula omulongwa. Okwa ti Ndeulita okwi ihumbata momukalo omuwinayi notagu lengitha shoka sha sitha ohoni epangelo manga e li miilonga.A tindi okushaina Mu Novemba 2021, Steenkamp okwa tseyithilwa kutya Ndeulita okwa tindi okushaina ombilive ye. Okwa tseyithile Namibian Sun mOmaandaha kutya okwa haluthwa ku nkene kehe shimwe shu ungaungiwa nasho nokwa tokola kaa shaine ombilive. Okwa lundile omukuluntuskola omukulu Amon Ndeitwa kutya ote mu thindile kongudhi.“Omukuluntuskola nomukalo ngoka hi ihumbata. Iinima yimwe mbika oyopambepo. Opwa li ethimbo nda tokola ndaa ye koskola oshoka onda li nda haluka nolyo ethimbo nda tokola kutya itandi shaina. Omukuluntuskola okwa li ta hepeke aalongi poskola,” Ndeulita a ti. Okwa ti konima yokutinda kwe okushaina, poskola opwa ningwa oshigongi mo 22 Apilili 2022 nomatokolo ga kwata miiti oga ningwa a tidhwe inaa pulakenwa.“Onda kengelelwa molwa ondumbo. Omukuluntuskola (Ndeitwa) okwa lombwele ndje anuwa ota talitha ndje. Yo (Omukuluntuskola) oya li ya hala okukakeka edhina lyandje oshoka onda li tandi yi moshipala uundikushi a li ta longitha poskola,” okwa ti. Ndeulita okwa popile omukalo gwe molopota yegeelopukululo a gandja komukuluntuskola kutya okwa li ta kambadhala okupukulula omulongwa ngoka olundji ha faula oskola netompelo tali uvikiwa ko. Okwa tindi wo kutya okanona hoka ka geelelelwe oke li muukundi molwa okudhengwa huka.“Ongomulongi, onda ndhindhilike okufaula kwe hoka ku li ngaashingeyi pomasiku 22. Mokukonakona nawa onde mu pula kutya omolwashike nokwa gandja omatompelo ogendji ngoka gamwe ogu ukila ko (omanga) gamwe aawe,” okwa ti.Nghipondoka okwa tindi okutya ko sha nokwa tumu Namibian Sun komutalelishikandjo nenge komukuluntuwiliki gwelongo Pauline Shapumba. Shapumba okwa ti ke na uuyelele wothaathaa moshikumungu shika nokwa ti ye omupe moshitopolwa.Ndeitwa okwi ikala kutya ota kongo Ndeulita nokwa ti kutya osha yela kutya aalongi inaa pitikwa okudhenga aalongwa moskola. “Inandi mu tuma a longithe omukalo kehe gokudhenga. Okudhenga nelalakano lyokweehameka shoka she etela okanona uunkundi. Ndeulita ina eta ohenda mokulombwela omulongwa a yeluthe oshipundi mombanda uule wowili manga te ka dhenge po komaako. Shika oshiwinayi notashi kala ngiini ethindilo kongudhi ngele ope na uumbangi wepango. Kandi na oonkondo dha sha dhokutidha aaniilonga miilonga’ okwa ti. – tuyeimo@namibiansun.com

Omulongi a tidhwa miilonga molwa okudhenga omulongwa

Comments

Namibian Sun 2025-04-28

Please login to leave a comment

Omulongi a tidhwa miilonga molwa okudhenga omulongwa

Comments

Namibian Sun 2025-04-28

Please login to leave a comment

Login