Oshikumungu shuukwaniilwa waUkwangali shoomvula 11 sha potokonoka

Oshikumungu shuukwaaniilwa waUkwangali shethimbo ele osha potokonoka sho epangelo lya taamba ko Eugen Siwombe Kudumo ongomukwaanilwa gwAakwangali. Kudumo okwa kala omukwaniilwa okuza 2013 konima sho a langekwa, nonande uukwaniilwa we opo wa taambiwa ko kepangelo mOlyomakaya ga zi ko sha ningilwa pombelewa yoshilongo poKahenge moKavango Uuninginino, Ominista yomapendulopo giilando nomikunda James Sankwasa, ngo a li omuyenda omusimanekwa, okwa ndjandjukununa oprosesa nkene ye ende opo Kudumo uukwaniilwa we wu taambiwe ko kepangelo. Sankwasa okwa lombwele aapulakeni kutya oshikumungu shuukwaniilwa waUkwangali osha landulula omufango gwonkatu ndatu: omukwaniilwa (hompa) ta lele oshilongo okuulike ngoka te ke mu landula melelo; ezimo lyaawa taye mu taamba ko nenge taye mu tindi; nongele ezimo lyaawa itali uvathana opo ihe tapu ithanwa Omukuluntu e ye a potokonone omukundu. “Ogwo omuthigululwakalo ngoka, naKudumo osho u ulikwa ngaaka nokutaambwa ko kezimo lyaawa. Oshinakugwanithwa shOmukuluntu hakulundulula omatokolo gaantu uuna pe na euvathano, ashike okupotokonona uuna pwaa na euvathano,” okwa ti. Okwa dhenge omuthindo kutya Aakuluntu yamwe ohaya nyengwa okupotokonona uupyakadhi mbuka. “Aakuluntu yamwe inaya gwana okukala poopoosa mpoka,” Sankwasa a ti, okwi indile oshigwana shi kwasilipaleke kutya “Aapotokononi taya opalele” oyo ya pewa oshinakugwanithwa shokulela opo ku kalekwe po omithigululwakalo nokusimanekitha edhina lyelelo lyopamuthigululwakalo. Minista okwa kwandjangele woo kombinga yenanathano ekulukulu pokati koondhikwa mbali dhaawa ndhoka tadhi nanathana nokweeta etopoko. Oondhikwa ndhika odho Aabarada aawa yAakwamangondo moAngola noshowo ondhikwa yaawa Aakwamarwa moNamibia. Sankwasa okwa ti epangelo olya taamba ko Kudumo osho uukwaniilwa we owa taambiwa ko kezimo lyawo lyaawa tali adhika moNamibia ngaashi oveta ya tulwa po tayi ti. “Okutaambwa ko huka okwa kandula po omukundu nguka,” okwe shi tumbula, ta ti ombili nelongolokumwe nali pangele moshigwana. Moshipopiwa she shokutaamba ko esimaneko ndika, Kudumo okwa uvaneke kutya ota ka gamenena po oohedhi dhoohekulu noohekulululwa nokulela nawa ayeheyehe. “Otandi ka kwashilipaleka kutya omithigululwakalo dhetu odha simanekwa nodha kalekwa po notandi yambula po Aakwangali,” okwa ti. “Natu longele kumwe konima yetopoko ndika lyethimbo ele.” Ta popi noshikundaneki shoNamibian Sun pombala yuUkwangali ohela, ngoka ta popile ko ezimo lyaawa Wawelya Muyenga okwa ti oshigwana osha li nondjuulukwe yokutyapula pombala yawo, okwa ti: “Ndika ethimbo twa kala twa tegelela ethimbo nuule. Oshigwana osha yuuluka okutsakanena nokutyapula etaambe ko nesimaneko lyomuleli gwetu nuuthiga wetu.’’ Omunambelewa omukuluntupitithi gwehangano lyoNTB Sebulon Chicalu okwa lombwele oshikundaneki shoNamibian Sun kutya elongelokumwe lyezimo lyaawa yUkwangali newilikongungundu lyehangano oyo yimwe yomoonkambadhala dhokukwatakanitha uuthiga wopamuthigululwakalo neyambulopo lyoshikondo shomapashiyono. “Omalelo getu gopamuthigululwakalo nuuthiga wetu owo uuyamba wetu unene, hakoshigwana ashike shomuhoko gwontumba ihe nomoshilongo ashihe koonono,” okwa ti. “Mokulongela kumwe nomalelo gopamuthigululwakalo, otatu vulu okukwashilipaleka kutya omithigululwakalo dhetu moNamibia odha gamenenwa po nokutseyika kuuyuni auhe. Shika oshi na sha nokweeta po oompito dhokutyapula omithigululwakalo dhetu notadhi longithwa ongompito yokwiimonena sha shomondjato, shokugandja oowino nuunongo kumboka taye wu pumbwa noshowo ekuthombinga lyaagundjuka moshikondo shomapashiyono.” Chicalu okwa gwedha po kutya ehangano lyoNTB otali ka kwatha elelo lyoamuthigululwakalo lyUkwangali mokutalatala omikalo ndhoka tadhi opalele nokukalela dhokuhumitha komeho omithigululwaklo dhawo omanga taku yambulwa po oshimpungu shomapashiyono moKavango Uuninginino. Elongelokumwe ndika pokati kelelo lyopamuthigululwakalo nehangano lyoNTB olya tegelelwa okukwandjangela kombinga yesimano lyomalelo gopashigululwakalo itaku talwa owala kelelo newiliko, shoka tashi ningi omithigululwakalo ogwo oshitsa shopokati ngele tashi ya kehumokomeho nokiinyangadhalwa moshikondo shomapashiyono. [email protected]