Omunambelewa gwaSanlam okwa ipatana ondjo miipotha yuulunga womanyandeko, ta ti “Ngame ohandi nyola owala omishangwalandu”

Omunambelewa omukulu gwaSanlam okwiikala iinyangadhalwa ayihe mbyoka taku tiwa oyi li uulunga womanyandeko woomiliyona dhiimaliwa ndhoka dha ningilwa ehangano ndika, pethimbo lyomalongekidho geindilo lye lyomboloha mEtitatu lyoshiwike sha piti mOmpangu yaMangestrata mOndangwa. Albertina Simaneka Simeon, gwomimvo 35, okwa hokolola mompangu kutya okwa li a longele Sanlam moshitayi shomOndangwa konyala uule womimvo omulongo, noshinakugwanithwa she osha li owala yokunyola omishangwalandu.

Pethimbo lyomalongekidho geindilo lye lyomboloha, omukalelipo gwe gwopampangu, Anthony Shapumba Simeon, okwa ekelehi omapopyo kutya Simeon oku shi omutamanekwa mukwawo, Claudia Martin, ngoka ta tamanekelwa uulunga womanyandeko wokwiilikolela konyala oondola dhaNamibia omiliyona yimwe niipambu iyali (N$1.2 million) okuza moSanlam. “Kandi mu shishi nandenande,” osho a hokolola.

Shapumba okwa pula wo ngele Simeon okwa pewako sha komaindilo gaMartin nenge ngele okwa li e mu kwathele mokushanga nenge mokutula iihako koofoloma nokoodokumende dhuulunga womanyandeko. Simeon okwiikala omapopyo ngaka. Ngame ihandi tula iihako koofoloma. Iilonga yandje oya li owala yokuunyola omishangwalandu ndele tandi dhi pe aaniilonga aakwetu miikandjo yilwe opo ya tule ko iihako. Sanlam iha pitike efutomo lyiimaliwa yuuwindji wu thike mpoka, onkene itashi vulika,” osho a fatulula.

Simeon okwiikala wo okutseya aatamanekwa yakwawo yalwe: Petrus Shikwaya, ngoka taku tiwa okwiilikolela iimaliwa ya thika pomayovi oma-N$ 154 000; Hendrina Shooya, ngoka taku tiwa okwiilikolela omayovi omi-N$ 43 277; naAbner Matheus, ngoka taku tiwa okwa iilikolela omayovi oma-N$ 200 000. Okwa hokolola kutya okwa li ha nyola omishangwalandu dhi vulithe pomulongo pethimbo lyesiku kehe onkene ita dhimbulukwa ngele okwa nyolela nando ooyene gwomadhina ngaka, hoka tashi ulike kutya ina monako sha kiiyemo nando oya gumwe gwomaakwathelwa mboka.

Mokati kaatamanekwa yakwawo, Simeon okwa zimine owala kutya oku shi mo Festus Amwaalwa okupitila mookuume kawo pamwe naaholike yawo. Okwa zimine kutya okwa nyolela Amwaalwa omushangwalandu ndele okwa yelitha kutya ina tula ko oshihako, ta ti uuthemba mboka owa li kondje yiilonga ye. Mokugandja uumbangi weindilo lye lyomboloha, Simeon okwa tseyithile ompangu kutya ye omuvali gwomuthika gwaana yaali ngoka pethimbo ndika ha zi nakuume ke, ishewe oye e li noshinakugwanithwa shesiloshimpwiyu lyayina ngoka ta ehama. 

“Ondi wete onkalo yomokalimosho ya thika ponyoka. Kamu na uupaumwene, na ohatu iyogele nokuli komeho yuuthano (cameras). Onda hala okuya kegumbo sigo oshipotha shandje sha kandulwa po. Meme ngoka ta ehama oku na ompumbwe yokusilwa oshimpwiyu nokufalwafalwa koshipangelo, shoka ihandi vulu ninga ngele ndi li muka,” osho a hokolola. 

Kandi na ondjo’

Onga gumwe gwomoonakuvalwa yaandjawo yahamano, Simeon okwa tsu omuthindo kutya oye awike omupaluthi gwegumbo lyawo. “Otandi indile opo ndi pewe ombooloha. Kandi na ondjo miipotha mbika na kandi na nando ontseyo yasha kombinga yayo,” osho a hokolola. Omunambelewa omukulu, ngoka pethimbo ndika e li mefudho lyaana ofuto na ota mono iiyemo yokomisi, okwa tseyithile ompangu kutya oku na owala oondola dhaNamibia dhi li omayovi gatano dhofuto yomboloha, molwashono ina nyola omishangwalandu dhasha okuza nkene a mangelwe po. 

Pethimbo lyomapulapulo ga kwata miiti kumpangu, omutamaneki Kristiana Erastus okwa popi kutya Simeon okwa landa oshihauto shoHaval niiyemo mbyoka ya kuthwa muulunga mboka ta tamanekelwa. Simeon okwiikala omapopyo ngaka, e ta ti ina landa oshihauto shasha. Erastus okwa popi wo kutya Simeon okwa tula iiyemo yuulunga mboka mokambo koFNB kokanona ke. Simeon okwa ipatana omapopyo ngaka, e ta popi kutya ye nokanona ke kaye na nando uumbo woFNB. 

Omutamaneki okwa tsu wo omuthindo kutya Simeon okwa lila Sanlam mokugandja omushangwalandu kuhe yokanona ke, ngoka e li wo omutamanekwa omukwawo, Japhet Kappa Taapopi, ngoka taku tiwa okwa iilikolela omayovi omu-N$ 18 750. “Inandi mu tula nande komushangwalandu gwandje. Okwa tula mo eindilo lyomushangwalandu ye mwene,” Simeon ta ipatana. Eindilo lyomboloha lyaSimeon naatamanekwa yakwawo yatano otali tsikile mOmpangu yaMangestrata mOndangwa.