Nakuholama Malima a futu ooyina oomilliona N$1.5m

Omunangeshefa Malima ngoka a ka holeka omufudho anuwa okwa futa oshimaliwa shithike poomillion N$1.5 yina osho wo yinagona,mboka ya ningi aafekelwa aapeke moshipotha sha Namcor naEnercon no ya holoka mompangu mOvenduka Omaandaha, sha landula dho ya li ya mangwa po mehuliloshiwike. 

Yina yaMalima Martha Antindi (56), osho wo yinagona nokuli omukwatheli gwe gopaumwnene Johanna Mundjego (33), oya holoka lwotango komeho gomupanguli Olga Muharukua.

Otaya pangulilwa okukala ye na mo olunyala miilonga yaali paveta patotwapango tayi kondjitha uulingilingi, okulikola oshimaliwa momikalo inaa dhi yela osho wo uufuthi. 

Antindi ngoka e li omufekelwa omu-13 omanga Mundjego okwa holoka onga omufekelwa omu-14. Malima ngoka a ka holeka omufudho muJuli 2025, ota kongwa shi na sha niipotha yekengelelo, uulingilingi, okulikola oshimaliwa momikalo inaa dhi yela osho wo okukala e na olunyala miilonga yaa li paveta, ayihe mbika otayi kwatakanithwa nelundulolo lyiimaliwa yehango lyoNamcor Petroleum Trading and Distribution okupitila mehangano lyo Enercon Namibia nagalwe.

Shi ikwatelelwa komweeti gwiihokolola, oonzo dhoshimailwa dha zi Namcor Petroleum Trading and Distribution odha li dha futwa Enercon Namibia nodha li dha topolelwa oongeshefa dhapambathana nongeshefa Eco Trading and Eco Fuel Investment omanga inaa dhi thika kuAntindi naMundjego.

Aalongelipamwe taa fekelwa 

Omweeti gwoshipotha otati Antindi nokamwana mana oyo ooyene yongeshefa yedhina Eco Fuel Investment CC moka kehegumwe e na mo oshipambuliko sho-50% nokwa li a mono oshimaliwa shi thike pomiliona-N$1,5 pokati kaJuli 2022 naNovomba 2023.

Mundjego wo ta fekelelwa a mona oshimaliwa shithike lwopomiilion N$1.5 pethimbo lya faathana nepangelo oli uvite kutya iimaliwa mbika oya futwa okuza kongeshefa yoEnercon Namibia okuya komaalulo gombaanga yoEco Tradingomanga inaa yi futwa kuye.

Antindi okwa taalela ko oshipotha sha gwedha po shuufuthi woshimaliwa N$172 000, moka aayeti yiipotha taya fekele oya za koonzo dhoshimaliwa shoNamcor okupitila mehangano lyoEnercon Namibia nomahangano galwe.

Omanga Mundjego a taalela wo oshipotha shuufuthi woshimaliwa shithike po N$227 000, moka epangelo li inekela okwe yi likola momukalo gwa faathana ngaashi Antindi.

Omweeti gwoshipotha Menencia Hinda, okwa tindi yap ewe ompito yokwiifutilamo, ta ti iipotha aafekelwa ya taalela iinene naafekelwa okuninwe uumbanda ya fadhukepo. Ta tsu omuthindo kutya oshikumungu shika oshili kombinga yiimaliwa yoshigwana onkene okumangulula aafekelwa itashi kala muuwanawa woshigwana. 

LaEtitano lya yi, opwa li wo pa tulwa miipandeko Heidi Boois, omuniilonga omukulu mombaanga yo Bank Windhoek noshipotha she osha undulilwa komasiku 28 Febuluali. Shika osha ningwa opo a mone ompito yokuninga eindilo lyobooloha, nomukalelipo gwe gopaveta Kadhila Amoomo a mone ompito yokuninga eindilo ndika ta tamaneke emangopo lye ndyoka ta li ka lya li pamulandu.