Iihulo pokati komusita naakwanegongalo ‘euvathano’

Yina yomusita omutungagumbo ngoka a mangwa po ohela molwa ekwatonkonga momukunda Onepandaulo mOshitopolwa shaMusati okwa ti omwanamati okwa yi miihulo ya uvathanwa naalundili ye, mwa kwatelwa omunaskola ngoka a li a hala oku ka landa onyama. Omusita omunamimvo 34, omutotipo gwongeleka Have Mercy Mission Ministries momukunda Onepandaulo, okwa mangwa po ohela momeho gaNamibian Sun, taku fekelwa kutya okwa kwata onkonga yatatu yomaakwanegongalo ye- yomimvo 17, 19 no24. Ayehe aalongwa poskola yopomudhingoloko, gumwe gwomondondo 10 nayakwawo yaali yomondondo 11. Omakwatonkonga oga ningwa mo 9, 16 no24 Febuluali. Komanda gwopolisi moshitopolwa shaMusati, Komufala Ismael Basson, okwa koleke okumangwa po. ‘Ina kuga’ MOmaandaha, Basson okwa ti omusita kali a mangwa po manga oshoka okwa li kee wetike, ihe sho Namibian Sun a li momukunda ohela, omuuvithi omo a adhika. Okwi ikala a fadhukile po, ta ti ina yona sha shi mu fadhukithe po. Meme gwe, Vinia Paulus, okwa fala omutoolinkundana pomwanamati, ngoka a li mongeleka komukunda gwopuushiinda. Shi ikolela kuye, mo 9 Febuluali, opwa li omuuhalo pongeleka hoka aagundjuka yopomudhingoloko ya gongala. Okwa ti oshihakanwa shomimvo 24 nasho osha li pomuuhalo. Lwanima, otaku hokololwa a yi kegumbo lyomusita po21:00. “Okwe mu dhengele noku mu pula oshimaliwa a ka lande onyama. Oya yi miihulo nokwa shuna. Esiku lya landula, meme gwe okwe ya ta hokolola ehokololo kutya [omukadhona] okwa kwata koonkondo,” Paulus a ti. “Inatu itaala ehokololo lye oshoka okwi ipatele mondunda yokulala [yomusita] ya ye miihulo. Kali ta kugu sho ta kwata koonkondo, omolwashike?” “Inandi itaala omalundilo ngoka,” Paulus okwa ti. Eithano lyeOmunaskola omunamimvo 19 anuwa okwa kwatwa onkonga konima sho a ka hehelele opena komusita. Omunamimvo 17 okwa popi omapopyo gokukwato onkonga komuuvithi konima sho aakiintu yalwe yaali ya zi mokalungu. Paulus, pokati mpoka, okwa gamene lela omwanamwati, ta ti okwiithanenwa moshilongayakulo shokuhunganeka nokulombwela aantu sho tashi ka holoka monakuyiwa. “Oha hunganeke nokupopya oshili,” okwa ti. Omusita, ngoka a popi naNamibian Sun manga inaa ya nopolisi, okwa ikala wo omalundilo gekwatonkonga. “Inandi fadhuka po. Ishewe inandi yona,” okwa ti manga inaa londa membamba lyopolisi. ‘Onda lala mondunda ye’ Omukulukadhi gwomusita, ngoka a ti oye Naveuye, okwa gamene omusamane gwe, ngoka a ti ita vulu okulonga iilonga iiwanayi ta popilwa. Okwa gwedha po ta ti iihakanwa otayi longithwa kaantu ya sila ondumbo ongeleka yomusamane gwe. “Febuluali aguhe onda lala mondunda yomusamane gwandje. Kali nande a fadhuka po noita ka fadhuka po oshoka ke na ndjo,” Naveuye a ti. Okwa gwedha po kutya oya hokana konima yoomvula mbali. Ongeleka oya ninga po oomvula heyali noya fa ya hokiwa kaanamukunda yamwe, yalwe oye yi tonde. “Oya hala owala okukakeka edhina lyetu. Aantu oye hole ongeleka. Omu na aakulupe oyendji haye tu yambidhidha,” Naveuye a ti. Olivia Angula, gumwe gwomaakwanegongalo, okwa ti aantu naa mone uuyelele womondjila noyaa tonde oongeleka dhiiveva.

Iihulo pokati komusita naakwanegongalo ‘euvathano’

Comments

Namibian Sun 2025-06-18

Please login to leave a comment

Iihulo pokati komusita naakwanegongalo ‘euvathano’

Comments

Namibian Sun 2025-06-18

Please login to leave a comment

Login