He gwokanona kaa ke ko osho a zi mokalungu

Omuniilonga gwiilonga yakwalukehe mOmbaye, Theofelus Nghidinwa (31), okwa popi kutya okwa longitha konyala iimaliwa yi thike poondola dhaNamibia omayovi omulongo muule woomvula dhontumba mokusila oshimpwiyu omwanamati ngoka a li i itaala kutya o gwe, ihe okwa ka ndhimbulula owala kutya okanona hoka ka kena esiku ka valelewe konima sho omukiintu ngoka a li omuholike gwokokule a kwatwa po moshiwike sha piti, ta tamanekwa kutya okwa yaka po okanona kaantu mOshakati hoka e li tati kutya o ke. 

PaNghidinwa, omuholike gwe gwokokule omukulu , Veronika Timoteus (26), okwa toto po iifundja kombinga yekaleko lyokanona haka, moka a kala he mu tumine omathano oomvula odhindji nokutaamba eyambidhidho lyopashimaliwa omanga a kala nokwiimba Nghidinwa opo kaatsakaneke okanona hoka.

Ekotokelo ndika otaku fekelwa lye ya puuyelele konima sho Timoteus a kwatwa po moshiwike sha piti kopolisi, notafekelwa kutya okwa yaka po okanona mOshakati. Opolisi otayi fekele kutya okwa yaka po okamatyona hoka manga ka li ka thinda kegumbo okuza kosikola yopevi yaShakati (Oshakati Primary School), moka e ka koola po, ta siikile oshipala shako nokuka humbata po, ta lombwele uunona ukwawo mboka wa li po kutya okwa ehamekwa nokwa pumbwa eyambidhidho lyopaunamiti.  Lwanima, otaku fekelwa kutya okwa longitha edhina lyokanona hoka kutya okawo naNghidinwa konima sho a thiminikwa opo a gandje uushili kutya okanona hoka oko ke li. 

Sho a popi noshifokundaneki shoNamibian Sun uunambo, Nghidinwa okwa hokolola shoka a faathanitha noomvula odhindji dhekengelelo lyopaamaiyuvo nolyopashimaliwa. Okwa popi kutya ye naTimoteus oya tsakenene okupitila mukuume kawo momvula 2018, noyali ya tameke omukwatathano gopaihole  momvula ya landula ko. Okwa kala naye uule wokathimbo mOmbaye petameko lyomvula 2020 manga inee mu kundaneka lwanima kutya oku na etegelelo. Ka ya li ha ya zi pamwe pethimbo a ningi omapopyo ngoka.

"Okwa lombwela ndje kutya okwa mono okanona muNovemba gwo-2020," osho a popi. 

Inaa vula okuya molwomangambeko go-COVID-19, Nghidinwa okwa popi kutya okwa kala owala i inekela omauyelele nomathano ngoka Timoteus a kala he mu tumine. Okwa gwedha ko kutya okwa li wo a tseyithile yina kombinga yoetegelelo nevalo lyokanona, moka a kwashilipaleke ofamili ye kutya okanona oke mwene. 

"Meme okwa pula ndje kutya omolwashike nda teya omukiintu omagulu ngame inandi mu lombwela," osho a popi. 

Neitaalo kutya okwa valitha, omazimo agehe gaali oga luku okanona hoka pamuthigululwakalo. Ezimo lyahe olya hogolola edhina Tangomwene Boy, manga yina ngoka a hula ko nale e mu luku Elago-Niklaus Munashimwe Meemwenyo.  

Nghidinwa okwa popi kutya okwa kala ha tumu iimaliwa ethimbo nethimbo yokusila okanona ke oshimpwiyu, ye okwa kala ha zi kOmbaye iikando niikando, ta yi kuumbangalantu waNamibia netegameno lyokutsakaneka okanona hoka lwotango. 

"Momvula 2021, tse na  tatekulu otwa li twa thiki mOwambo notwa ningi omalongekidho opo tu tsakanene naye mOshikuku, ihe ina holoka po. Ethimbo kehe tandi thiki kOwambo, opwa kala owala ha pu holoka omatompelo galwe ngoka taga imbi ndje ndi mone okanona hoka," osho a popi. 

Sho omalimbililo ga tameke okwiindjipala, okwa hulitha po okutuma iimaliwa momvula 2022, ihe okwa ka tsikile ishewe momvula ya landula ko. Shimwe shomomashongo omanene ngoka tsakaneke, okwa popi kutya o pethimbo yina a hulitha muAprili 2024. 

"Onda li nde mu indile opo e ye nokanona koshituthifumbiko shameme, ihe okwa tindi ye lwanima okwa popi kutya ota ka pula yaandjawo. Ina galukila ndje we oku za mpoka," osho a popi. 

Moshiwike sha piti, Nghidinwa osho a tsakaneke okanona hoka konima sho Timoteus ta ku fekelwa a zimine oku ke mu thikithila. Okwa landele okanona iikutu noongaku manga inee ka fala komukunda gwezimo lye moshikandjohogololo shEtayi moshitopolwa shOmusati, moka aakwanezimo ya taamba okanona kayo nenyanyu onga okatekulu kawo. 

Ashike, okwa ndhimbulula mbala iinima yimwe itayi tsu kumwe.

"Pamayalulo gandje ngoka nda tseya, omumwandjei oku na okukala e na oomvula hamano, ihe okanona hoka oke na oomvula heyali ko oka tameka nale osikola," osho a popi.

Omalimbililo oga tsikile ishewe unene sho okanona ka holola omulumentu gulwe onga he. 

"Okanona oka lombwele ndje kutya he oku li kiilonga," osho a popi. 

Esiku lya landula, konima sho Timoteus a shuna nako, yinagona gwaNghidinwa okwe mu tseyithile kutya okanona hoka oka lopotwa ka kana osho wo kutya Timoteus okwa kwatwa po komiya dhashinana. 

Lwanima opolisi oya ka talela po egumbo lyezimo lye onga oshitopolwa shomakonakono ngoka taga ningwa.

Nghidinwa okwa popi kutya okuza mpono okwa kongo nokumona omishangwa dhokombaanga nadhilwe ndhoka tadhi ulike iimaliwa mbyoka a kala ha tumine Timoteus pokati koomvula odhindji. 

Nando omishangwa ndhoka dhopambelewa odha ulike oofuto dhomwaalu gwathika pomayovi N$ 3 830, ota ti konyala okwa tuma iimaliwa yi thike po-N$ 9 000, mwa kwatelwa oofuto ndhoka dha ningwa okupitila moonomola dhoongodhi dhaantu yalwe konima sho Timoteus a ti kutya ke na we ongodhi yopeke. 

"Onda li nokuli nda futu kombaanga opo yi nyanyangidhe omishangwa ndhoka opo ndi dhi pe opolisi," osho a popi. 

Okwiitaala kutya ha ye awike e li oshihakanwa moshiningwanima shika.

"Onda uvu kutya otu li yane twa pita miiningwanima ya faathana. Aalumentu yaali oya gandja nale omawi gawo kopolisi. Gumwe gwomuyo otaku hokololwa kutya naye oku li omupolisi gwomOpuwo," osho a tompele. 

Nando okwa hokolola kutya oku li muupyakadhi owundji wopamadhiladhilo, Nghidinwa okwa popi kutya ke li molukongo lwokushunithila uuwinayi. 

"Itandi ti kutya na ye kondholongo. Onda hala owala iimaliwa yandje yi galuke," osho a popi. 

Okwa gwedha ko kutya opolisi oye mu pandula sho a kala mekankamo pethimbo lyuupyakadhi mbuka awuhe.

Pakathimbo, omuwiliki gwomakonakono giimbuluma mOshana, Komufala gwopevi John Matongwe okwa popi kutya aakonakoni oya mona kutya omufekelwa okwa li a pe opolisi uukwatya wiilombo petameko.  

"Edhina lyolela lyomufekelwa olyo Veronika Timoteus, omukiintu gwoomvula omi-26 gwomomukunda Ohalilya mOshitopolwa shOmusati. Shika osha kolekwa komumwayinakadhona gwanakufekelwa, konima sho omufekelwa a li i itumbula kopolisi nedhina lyiifundja onga Agnes Nankama," osho a popi. 

Matongwe okwa popi kutya aakonakoni oya kongo sigo ya thiki megumbo moka omufekelwa otaku fekelwa a tokelwa nokanona hoka, oya kutha ko omapopyo goombangi osho wo okuninga omulandu gwomathano gokuulika uumbangi. 

Opolisi oya yi wo positola yoPep mOshikuku opo ya ka konge uumbangi womokathano kekondololo (CCTV footage), ihe oye ya okutseya kutya ositola kayi na uuthano mbuka wekondololo. 

Okwa popi kutya okanona oka konaakonwa koondohotola moshipangelo shepangelo shaShakati noka monika ke li monkalo ombwanawa yuundjolowele.

Matongwe okwa popi wo kutya Timoteus oku li ta kongwa mOshitopolwa shaKunene shi na sha noshipotha shopambelewa shuufuthi komugandji gwiilonga gwe shoka sha lopotwa kOpuwo osho wo sha shangithwa kohi yonomola Opuwo CR 21/06/2026. Omalongekidho oge li metifa opo a lundululilwe hoka ngele omilandu dhopampango dhe shi pitike. 

 Timoteus okwa holoka lwotango mOmpangu yaMangestrata yaShakati, moka a tindilwa ombooloha. Oshipotha osha undulilwa komasiku 16 gaSeptemba 2026 opo opolisi yi tsikile nomakonakono ga gwedhwa po.