‘Fly’ Nakanduungile kokakambe a londeleko ongohela a li ko

Ngele tafaathanithwa nAanamibia oyendji, Dr Fillemon ‘Fly’ Nakanduungile – ngoka ngaashingeyi e li pondingandinga yoshipotha oshinene noshitilithi moshilongo  - okwa li andola ta lalakanene onkalamwenyo ombwanawa netumbalo meithano lye.

OmuNiipa konduko nokwa putudhwa kaavali haya longo, Nakanduungile okwa mana osikola yongula koGrootfontein omanga inaa ka tsikila eilongo lye koCuba hoka a li ta futilwa kepangelo. Okwa li e kiilongela uundohotola wuunamiti nokwali a zala eguwo momumvo 2013.

Mokugalukila kwe moshilongo,okwa li a longo iilonga oyindji iiwanawa monkalamwenyo: ondohotola yuunamiti yi na etegameno ewanawa monakuyiwa, e na oshinakugwanithwa shokupanga aavu  nokwa li a mono esimano molwa iilonga ye. Pethimbo ndika, oondjila dhe eenda odha  li tadhi gandja efano ewanawa kaagundjuka oyendji mboka taya lalakanene okukalongela oshigwana nawanawa.

Ashike ngomepathimo lyeho, momumvo 2025, he yaanona yane okwa ningi gumwe gomookalegetse mboka taya tilitha oshigwana nokushi kanithitha einekelo moshikondo shuundjolowele osho woo shuuyuuki.

Mongaanshingeyi ota fekelelwa iipotha ya yooloka yomakengelelo, okweendamevi omahangano omakwashilipaleki, iikoya yi kenyeneka mwa kwatelwa onkambadhala yedhipago yomweeti gwiihokolola mompangu yomOndangwa Justine Shiweda. Shiweda okwa kala pokati kegumbo noshipangelo unene sho a kala mesiloshimpwiyu lya kwata miiti sho a li a yahwa nokuponokelwa nuuzigo haufike shoka she mu etela omatando ga konda pugatano.

Uukwatya uuwanawa wa tameke okukana

Nando a longa miitopolwa ya yooloka yoshilongo, eithano lyuunamiti lyaNakanduungile olya kala unene lyuudha omakohololo gokwaaihumbatanawa nuudhudhu.

Omakonakono goNamibian Sun oga nongele kutya okwa li a longo moshilandopangelo, mwa kwatelwa ethimbo a li ta longo kohi yomundohotola a tseyika nawa Dr David Uirab.

Pethimbo ndyoka, otaku fofodholwa a li a tula mo omaindilo ga yooloka goshimaliwa gaashi goshili ge na sha nomakenko gaalumentu ngoka ga li inaa ga ningwa nandenande nelalakano anuwa opo a mone oshimaliwa okuza kehangano inaa li yama kepangelo ndyoka lya li ha li futu oondohotola metando kehe ya ninga.

Omaindilo ngaka goshimaliwa oga ka monika mo konale,Nakanduungile nayalwe oya li ya pulwa noya futithwa oshimaliwa shoka sha yonagula uukwatya we.

Lwanima, okwa ka longa moshipangelo shepangelo mOshakati okuza mo 2016 sigo 2018 ihe okwa ka za mo anuwa inaashi yela nawa shoka she mu kutha mo. Pethimbo lyeindilo lyokwiifutila mo mompangu, omukonakoni gopolisi mOshana chief inspector Antonius Gabriel okwa lombwele ompangu kutya aakonakoni oya kutha omahokololo maaniilonga yundjolowele aakuluntu mwa kwatelwa omukuluntu goshipangelo shi na sha nuulethimbo wa Nakanduungile miilonga.

Ota ku hokololwa anuwa sho a zi mOshakati, okwa ka longela koshipangelo kOnandjokwe momumvo 2019. Omahokololo galwe otaga ti moshipangelo omo tuu moka okwa kala nokulongitha nayi ombelewa, okwiihumbatela nayi aavu aaAngola, okukengelela omahangano omakwashilipaleki osho wo omukalondjigilile gokuya momafudho gaali pamulandu.

Omunambelewa a uva kombinga yomitotolombo dhika okwa ti: “ Okwa tameka okulonga mOnandjokwe mo-2019 ihe okwa thigi po iilonga muDesemba 2021 omanga inaa pewa omageelo molwa okwiihumbatanayi”.

Gabriel okwa lombwele ompangu kutya opethimbo olyo tuu ndyoka Nakanduungile ta fekelelwa a kengelele ehangano ekwashilipaleki lyo Sanlam Namibia nosho wo okukutha mo aavu shaa li paveta momusholondondo gwaavu ya tegelela omatando.

 “Konima sho sha monika, okwiikutha miilonga omanga inaa ya komutumba gokomitiye hayi ungaunga nomaihumbato, ta ti ota shuna kosikola,” omukonakoni ta ti ngaaka.

Konima sho a zi mo miilonga yepangelo, Nakanduungile okwa li a longo koshipangelo ko Ongwediva Medipark okathimbo okahupi, hoka a kala ha longo ko owala uuna a dhengelwa a ka longe uuna sha pumbiwa. Oonzo odha ti okontalaka ye ine yi pewululwa we omolwa taku fofodholwa keeshi omwiinekelwa no sha eta opo a ze ko koshipangelo hoka wo.

Oshiyolithi

Okwa ka tameka wo iilonga moshipangelo shopaumwene mOndangwa uule woomwedhi ndatu- oshipangelo shika oshina omilandu dha nyaya kegonga uuna tashi ya pomaihumbatonawa nokulonga moshili oshili elalakano lyasho. Omahokololo gomompango otaga ulike kutya okwa li a tidhwa miilonga konima ta fekelelwa a taamba ofuto okuza komumvu omwaAngola molwa omakonakono gombinzi nokulongitha iizemo yomumvu gulwe opo yi faathane naambyoka yomumvo ngoka e mu futu. Oshinima shika osha li sha monika moo manga uupyakadhi inaa wu holoka.

Onzo yimwe ye mu tseya nawa oya ti: “ Okuza mpoka opo a zi a ka patulule okapangelo kemwene, hoka a kala ta ningile iinima ‘iiyolithi’ mbyoka ya popiwa mompangu.

Iininima ‘iiyolithi’, yeetwa mompangu kaayeti yiikoholola pethimbo lyoontamanana dhokwiifutilamo omwa kwatelwa okugandja ondunda ku kuume ke ngoka e li mondholongo, omupolisi omukulu Abner ‘Kapilili’ Mateus moka ha ya ka ningila iihulo nohondakadhona ye. Mateus okwa li a thindikilwa kundohotola a fa a li tayi a ka pangwe.

Okumangwa po omolwa eponokelo lyanika oshiponga

Oshinima oshinene sha gwitha uunamiti waNakanduungile mokana osho a li a tulwa miipandeko momasiku omi-25 Novomba 2025 shi na sha neponokelo li nyanyalitha lyaShiweda. Opolisi oye mu kwatakanitha noompangela osho wo etulomiilonga monkambadhala yedhipago osho wo eponokelo lyuuzigo lya li lya ningwa momasiku 17 Kotoba 2025, ndyoka lya thigi omweeti gwiihokolola noshiponga shanika okufaalela omwenyo gwe.

Aayeti yiihokolola oya ti okwa dhana onkandangala monkambadhala yokugandja ombumbo yoshimaliwa sho N$100 000, opo Mateus a pewe ompito yokwiifutila mo, ihe osha ponyo. Aakonakoni wo oye mu kwatakanitha nuukengeleledhi woshimaliwa shomilliona N$1.2, shi na sha noofuta dhomakwashilipaleko okuza kehangano lyo Sanlam Namibia, mbyoka yimwe yomiimaliwa ta ku fekelwa ya futwa momaalulo gokombaanga gaapambele ye.

Okwa li a tindilwa ompito yokwiifutila mo nomantompelo kutya okwa nika okufadhukapo oshoka oha endagula okuya koAngola, okwaahena omaliko golela moNamibia osho wo uutile kutya otashi vulika a ye omakonakono moshipala ngoka kwi ipayakidhilwa nago. Eikwatopomutima ndika olya eta opo a lundululilwa kondjedhililo kOshaanda konima sho pwa holoka okafofodholo kutya ota ningi oompangelo dhokufuta oombumbo aapolisi a wape okwiiyakamo mondjedhililo mOndangwa.

Aayeti yoontamanana oya ti Nakanduungile- ngoka a tindi iipotha ayihe ta tamanekelwa- okwa longelakumwe naaponokeli ya Shiweda, ngoka a li e mu shi nawa nokwa li e mu tumine etumwalaka kongodhi ye konima yomasiku goshiningwanima. Ota ku hokololwa ta ku ti otashi vulika oompangelo dhika dha li dha ningilwa megumbo lye mOndangwa nondha li dha kwatelwa komeho kuMateus okuziilila mondholongo.

Shoka sha li eithano lyokuhupitha oomwenyo sha shituka oonkambadhala dhokudhipaga osho wo uudhudhu womonanguwi. Onga gumwe gumaafekelwa ya hamano ya holoka mompangu, oondjila dhaNakanduungile okuza koshipangelo okuuka koompangulilo dha shutikutha eithano lye ndyoka lya kala lyuudha oontamanana.

Aafekelwa pamwe naye oyo Lukas Nekwiyu, Petrus Uusiku, Nghilifavali Johannes naPetrus Shikwaya.