Aafekelwa yahamano ya taalela oshipotha shedhipago konima yeso lyomweeti gwiipotha mOndangwa a hulitha.

Aatamanekwa yahamano ngaashingeyi otaya tamanekelwa eso lyomweeti gwiipotha mOndangwa Justine Shiweda noya tegelelwa ya holoke mompangu yaNdangwa momasiku 16 Maalitsa. 

Tango oya li taya pangulilwa onkambadhala yedhipago nokulonga monanguwi pwaa ha dhimbululwe oonkambadhala dhika, ashike oshipotha osha li sha lundululilwa moshipotha shedhipago konima Shiweda a mana oondjenda Olyomakaya omolwa oshiponga mbyoka a li ningilwa pethimbo lyeponokelo lye.

Aafekelwa oyo Lukas Mekondjo Nekwiyu, a tseyika nawa 'Mane'; Mateus Mewiliko Abner, a tseyika nedhina limwe 'Cota Smith'; Petrus Nadhipite Uusiku; Nghilifavali Johannes, goshilukadhina 'Giver'; Petrus Shikwaya, ngoka wo e shiwike 'Kuxa' osho wo omundohotola gopaunamiti gomoOndangwa Fillemon ‘Fly’ Nakanduungile.

Omweeti gwiihokolola Yeukai Kangira okwa lombwele ompango Omaandaha kutya oshipotha shonakmbadhala yedhipago sha taalela Fillemon ‘Fly’ Nakanduungile osha lundulilwa moshipotha shedhipago lyoshiningilawina nokulonga shaa monanguwi pwaa monike osheetithi sheso. 

Eindilo lyokwiifutila mo lyaNakanduungile olya li lya undulilwa komasiku 16 Febuluali konima omupanguli magestrata Mutwa Billy Lutaka a li inaa holoka kompangu omolwa omauwanawa ge gomalweendo ga li inaa ga futwa opo a vule a ze kOtjiwarongo hook a kala. 

Shika osha ningi oshikando oshitiyali ngaashingeyi sho eindilo ndika lya undulilwa komeho molwa tuu omatompelo ga faathana.

Kangila okwa lombwele ompangu kutya Lutaka okwa enda iikando iyali ta longitha oshimaliwa she mwene. Ta ti ombelewa hayi longo nomauwanawa ngaka opo yi ipyakidhila nokulongekidha omauwanawa gomalweendo ge osho wo oshimaliwa sholefa nomulalo, opo a vule okuholoka kompangu.

Mangestrata okwa ti okwa pyakudhukwa okuya molweendo ethimbo kehe opo e ye a ninge etokole lyoshipotha shampa uuna nduka omauwanawa ga futwa.

Nakanduungile oku li mondjedhililo kezulonkalo koGrootfontein molwa etokolo lyoshipotha shokupewa ombooloha inaa li ningwa. Omupanguli Veruka Njembo oye a puulakene iihokolola Omaandaha.