Ugandese bouler sluit by WHS Old Boys aan

Twee laaste wedstryde vir elke span word Saterdag en Sondag gespeel voordat die semifinale van Krieket Namibië se premierliga vir die eendagspel (50 boulbeurte) sal volg.

ATG WHS Old Boys verwag vandag die aankoms van die naatbouler Juma Miyagi, hul aanwins van Uganda se nasionale span.

Die 22-jarige Miyagi was in 2024 ‘n lid van die Uganda-span wat vir die eerste keer aan die ICC T20 Wêreldbeker in Wes-Indië deelgeneem en hul eerste oorwinning teen PNG gesmaak het het.

Twee jaar tevore het hy sy senior internasionale T20-debuut tydens ‘n toer na Namibië gemaak.

Leon Fouché, voorsitter van WHS Old Boys, sê: “Juma Miyagi sal ongetwyfeld baie bydra tot ons span, kluboefeninge en tot die premierliga as geheel. Old Boys was nog altyd ‘n voorloper in die opheffing van die vlak van Namibiese krieket en hierdie is nog 'n wonderlike inisiatief.”

Ingevolge die regulasies sal Miyagi minstens twee ligawedstryde moet speel om vir die uitklopfase van die kompetisie in aanmerking te mag kom. Old Boys speel Saterdag teen CCD Tigers en die volgende dag teen Trustco United.

(Volledige wedstrydbepalings is op bladsy 2).