Oveta onkulu yokugamena iindulukomwa yopaunkulungu oya “Kwandjeka” aahikingalo nonando ye shiwike nawa

Nonando aahikingalo Aanamibia ya pitithe oongalo tadhi nywitha omatsi, hadhi dhanwa nawa kooradio osho wo komalungula, oya holola kutya oveta tayi gamene iindulukomwa yopaunkulungu itayi endele pamwe nethimbo onkene osha ninga oshidhigu okulikola oshimaliwa nokumona aayambidhidhi yopamuthika gwolela shoka tashi thindile aahikingalo moluhepo.

Omuhikingalo David Shikalepo a tseyika nawa Exit Rockaz okwa lombwele Namibian Sun tati uupyakadhi uunene aahikingalo ya taalela eyooloko pokati kokukala omuhikingalo e shiwike nawa nawa niiyemo mbyoka ha mono.

Ota ti: Aanamibia oye na omukalondjigilile gokwaa ha landa oongalo. Oongalo oye dhi hole shili, ohaa dhi pulakene nohaadhi paathana ihe ihaya landa. Osho nee tashi eta uupyakadhi”.

Ta ti aahikingalo oyendji ohaa longitha oshimaliwa oshindji okweetapo oongalo, okwiitseitha koshigwana show o momalweendo, yaa na nando omukumo gokumona oshimaliwa sha kola.

Okwa gwedha po wo ta ti: “ Monkalo nee yongaashingeyi yomalungula, ando oko nee ta tu monene nawa iiyemo ihe ngaashingeyi otwa ninga twa fa omaboolota popate ngoka kehe gumwe ha lesha oshali”.

Ombululu yokumona oshimaliwa oya thita

Oshilyo shehangano lyaahikingalo nokuli omunduliki goongalo Sula Kyababa okwa ti osheetithi oshinene shuupyakadhi mbuka ooveta dhoshilongo, unene tuu ndjoka tayi gamene iindulukomwa yopaunkulungu. Okwa tsu omuthindo ta ti oshidhigu okukala “omuntu wu shiwike nawa nawa ndele owa kwandja”, shoka tashi hepeke unene aahikingalo pankalathano.

Okwa gandja omaiuvo ge ta ti:” Aahikingalo moNamibia ihaa ningi oshimaliwa. Shika ohashi vulika shi ya thiminike ya longithe nayi iingangamithi, omalovu nenge nokuli ya tameke okuyaka”.

Kyababa ota ti: “ Namibia ota longitha oveta yokugamena iindulukomwa yopaunkulungu yonkulu yonale, shika otashi ti aahikingalo Aanamibia ihaya mono oshimaliwa oshiwanawa okuziila moongalo dhawo dhoka dhi li komalungula”.

Okwa holola omaiuvo ga nkene mboka haya nduluka oongalo taya humu komeho monkalo ooveta dhatya ngeika. “Omolwashike ndi na okutula oshimaliwa shandje mongeshefa, ta ti ndulukile aahikingalo aape oongalo dhawo omanga ndishishi kutya oshimaliwa tandi longitha itashi ka galukila ndje?”

Kyababa okwa nyana wo onkalo ndjoka yokutala ashike kiituthi iinene peha lyokutala kokuninga omalunguluko gokolela.

“Othanekwaveta yokugamena iindulukomwa yopaunkulungu oya simana unene. Onolwashike ta ku tondokelwa nokugalula oshituthi shoNAMAs omanga othanekwaveta ye ethiwa?”

Omashongo guundjolowele wopamadhiladhilo

Exit Rockaz okwa holola olunkeno kombinga yuundjolowele wopamadhiladhilo mboka ta ti monkalo yongaashingeyi owu li muupyakadhi shoka aahikingalo otaa kambadhala okwiikaleka ando taya monika ya fa ye li monkalo ombwanawa momeho goshigwana ihe yoyene oye li muudhigu uunene.

Ota ti: “ Uuna wu na uudhigu wopashimaliwa, nomaiuvo gokukala wuuvite oshitalenti shoye sha fa tashi lyatelwa pevi, aantu ohaa ka konga omanyanyu shaampoka taye ga adha. Onde shi mona sha ningwa kaantu ndi ya shi, nonduuviteko oonkalo dhawo.”

Onkene ota gandja eindilo opo aahikingalo, uuministeli womithigululwakalo nuunkulungu, oshigwana ashihe shaNamibia osho wo ehangano lyo Namibian Society of Composers and Authors of Music (Nascam) noohandimwe ya konge ekandulepo lyomikundu dhika.

Ta tu omuthindo ta ti: “ Otwa pumbwa okwathele meendelelo moonzo dhuundjolowele wopamadhiladhilo, ehungomwenyo, ezulonkalo osho wo oshikumungu shuupyakadhi wopashimaliwa.”

Nascam ta tsu omuthindo kokuninga omayooloko

Omunashipundi gwongunduwiliki yehangano lyoThe Namibian Society of Composers and Authors of Music (Nascam) Joseph Tuhafeni Ailonga, okwa tsu omuthindo omunene pokuninga eyooloko pokati kohika oongalo onga ongeshefa osho wo koonkalamwenyo dhopaumwene dhaahikingalo.

Sho a pulwa a tye kosha kombinga yomuhikingalo Kaboy Kamakili ngoka opo a zi mondjedhililo nokuli pondje molwa obooloha ndjoka a pewa shi na sha niipotha ta tamanekelwa yuufuthi, osho wo omuhikingalo Young T ngoka ta fekelelwa a li ta hingi a kolwa, Ailonga okwe shi yeleke kutya Nanscam iha ti kosha kiinima yapamba oonkalamwenyo dhopaumwene dhaahikingalo osho wo mbyoka ya pamba oveta.

Mokutala ngele opena ekwatathano pokati komaihumbato gaahikingalo noshikumungu shiiniwe ya taalela, Ailonga okwa longitha eyele ta ti:

“Ngele omuhikingalo okwa kwata ta hingi a kolwa, shoka itashi ti ando omuhikingalo ngoka ke na iimaliwa. Ndjoka onkalo owala ye yopauntu onga omuntu ndele ka shi shi iimpwiyu yetu.’

Etegameno lyelunduluko

Exit Rockaz okuna etegameno ndino kutya ontotwaveta yokugamena iindulukomwa yopaunkulungu ndjoka ya kala nokukundathanwa uule nethimbo opamwe noothanekwaveta oonkwawo, otayi eta po elunduluko.

Ota ti: “ Othanekwaveta otayi kala ashike yi na oonkondo ngele ya yi miilonga.”

“Onda hala okumona sheya puuyelele kutya iifuta hayi futwa aahikingalo ngele oongalo dhawo dha longithwa odha topolwa pauyuuki, nomuhikingalo a kale ta vulu okumona shoka a tegelela nuunake. Ontotwaveta oya pumbwa okukala yi na omayego.”