Unam Ogongo a dhana oshituthi sheteyo lyolwishi

Oshitayi shoUniversiti yaNamibia mOgongo osha dhana oshituthi shokomumvo sheteyo lyolwishi mo2025 shoka she ya nomalunduluko omape muunamapya nosha kwatha oshigwana. Oshituthi osha dhanwa kohi yoshipalanyolo “Okukwatha aanafaalama ya longe olwishi molwomahupilo taga kalelele.” Moshipopiwa she, Unam vice chancellor Kenneth Matengu okwa ti oshituthi shika ihashi tyapula owala eteyo ewanawa lyolwishi ihe ohashi tyapula woo shoka sha pondolwa po mokulonga iikulya ya gwana, mokunkondopeka oshigwana shokiitopolwa yokuushayi noshowo okutaamba ko elunduluko lyonkalo yombepo. “Nuumvo, otwa yambekwa nomuloka omuwanawa. Nonande omuloka nguka ogwa hepeka nokululumika yamwe kiitopolwa yimwe, omuloka ogwe tu dhimbulukitha kutya olwiishi oshikunonwa shi hole omeya noonkondo—olwishi olwo oshikunwa tashi vulu okwe eta oompito dhomahupilo nokupalula oshigwana,” Matengu a ti. Okwa holola kutya eteyo lyolwiishi ohali nawapala omvula namvula, epya ndjoka lya kunwa olwiishi olya lyuunene woohekta 4.1 mo2024 ashike monena (2025) olya ninga lyuunene woohekta 6.7. Eteyo olya tegelelwa li indjipale okuza pootona 15 okuya pootona 19, notatu pandula ekwatho lyehangano lyoDebmarine Namibia. Oshikuku shoondjuhwa shoskola nasho osha nenepala, ngashingeyi oondjuhwa dhetu ohadhi tendula uuyuhwena 5 000 momvula, ashike otwa tamekele nuuyuhwena 370 momvula. Matengu okwa pandula ekwatathano nelongelokumwe ewanawa pokati kepangelo lyaJapan okupitila mehangano lyoJICA noshowo ehangano lyaDebmarine Namibia. Shika osha kwatha opo oshitayiskola shaGongo shi ninge endiki enene lyuunamapya nolyomapekapeko. “Putse, omapekapeko ohaga tulwa miilonga. Aailongi, aanafaalama naanaskola ohaya longwa nokupewa iilongitho mbyoka ya pumbwa opo ya tsikile nonkalamwenyo ndjika hayi lunduluka mbala,” okwa ti. Matengu okwa dhenge omuthindo uunamapya nuuniimuna monena kawu shi owala wokulonga opo tu mone iipalutha ashike owa kwatela mo oshindji. “Owo uunongononi, owo ongeshefa nowo uungomba. Ethimbo ndika olyeni,” okwa ti. Matengu okwa tsu woo aalongwa omukumo opo ya ninge omaindilo gokutaambelwa moshiputudhilo shaUnam mo2026. Okwa pandula woo epangelo sho lya tseyitha kutya elongo lyopombanda otali ka kala lyoshali, ote shi ithana “osho onkatu ombwanawa tayi ka kwatha Aanamibia oyendjiyendji.” Oshituthi osha hulu neindilo opo tu longeni: omapya ngoka ga yelulwa natu ga kuneni olwishi, longitha olwishi wu mone oshimaliwa, longitha oowino dhoye wu kale nuuhupilo uuwanawa. “Shika kashi shi owala eteyo ihe osho etyapulo lyeyokomeho, lyoompito tadhi monika po noshowo elongelokumwe,” Matengu a ti. Ta popi peha lyehangano lyoDebmarine Namibia, Godfrey Ngaisiue okwa ti oku uvite etumba mokumona “eteyo ewanawa shili moonkambadhala dhetu dhomadhiladhilo omape muunamapya nuuniimuna nomokulonga iikulya tayi gwanena oshilongo shetu.” “MoDebmarine Namibia, otwi itaala kutya elongo olyo oshipatululo shonkalamwenyo ombwanawa. Otwa kwatha oshitayiskola shaUnam Ogongo noshimaliwa sha konda po N$750 000 okuza mo2022-ongoshinakugwanithwa shetu shokukwatha oshigwana, okulongela kumwe niigwana tayi yambuka po, twa tala kuundjolowele, kelongo nuuhupilo wu li nawa tau kalelele.” “Epya ndjoka lya li lyoohekta 4.1 ngashingeyi epya enenenene lya ninga lyoohekta 8.65 noohekta 6.7 odha kunwa olwishi nolwa vala nawa,” Ngaisiue a ti. “Inatu ninga owala omapungulolongitho opo iilongitho yi landwe – otwa kwatha aantu notu uvaneke pamwe opo tu longe iikulya tayi tu gwanene atuhe moshilongo.”