Etukuko lyomukithi gwepulu mOshikoto

Uuministeli wUunamapya wa koleke etukuko lyomukithi gwepulu moshikandjohogololo shaNehale lyaMpingana mOshitopolwa shaShikoto. Shi ikolela ku ndohotola gwiinamwenyo omukuluntu Dr Johannes Shoopala, omukithi ogwa tukuka nokulopotwa tango momasiku 12 no13 Novemba mofaalama yimwe moshikandjo shaNalusheshete shoka shi li kohi yombelewa yuunamapya nuumiimuna yOmuthiya State Veterinary Office. Lwanima okwa ti oongombe dhimwe odha lopotwa dha kwatwa kepulu wo momidhingoloko dhopopepi. Shoopala okwa ti sigo opo mpaka, iimuna 24 oya lopotwa yi niwe kepulu mbyoka hayi wendelwa piigunda ngaashi, Edhilankono no 1, Kanepolo Post naPetenena Post, omanga oongombe hetatu dhi na otaku hokololwa dha sa. Okwa ti omukithi gwepulu ohagu taandelekwa kuupuka mbok hagu dhipaga oongombe poompito dhimwe ndhoka dhi na iitumbuka nenge iipulu koshipa nokiitopolwa yilwe kolutu, olundji ohagu taandele ngele ongombe ya lika komapuka. “Aanafaalama otaya kumagidhwa ya wende oongombe dhawo opo ku keelelwe nokudhipaga omapuka ngaka. Ongombe tayi ehama otayi vulu okupewa oovitamine, ooantibiotika noshowo omiti dhokumweneka uuwehame opo ku kondololwe omikithi omikwawo dhoombakiteli tadhi vulu okutukuka wo, ngaashi shu uthwa koondohotola yiinamwenyo.Shoopala okwa ti opo ku hulithwe po etaandelo lyomukithi nokukwashilipaleka oongombe moshitopolwa shika otadhi kutha ombinga momalandithilo mekwatathano nOveta yUundjolowele wIinamwenyo, oshikondo shuukalinawa wiinamwenyo osha tula po oompango dhi na okwiiyuthwa kudho. “Einyengo lyiimuna okuza koofaalama dha gumwa komukithi nguka okuya kiitopolwa niitopolwa okwa pitikwa shampa owala oongombe kadhi na omandhindhiliko gomukithi nodha wendwa omasiku 21 manga inadhi tembuka ngele otadhi ehama.”Oshikwawo, oongombe tadhi ya muulithilo nenge miitopolwa niitopolwa mwa tukuka omukithi nguka nadhi wendwe nokutembuka konima yomasiku 21 dha wendwa.“Oonkambadhala dha tumbulwa pombanda inadhi kwatela mo oongombe itaa dhi ehama ndhoka tadhi ka tselwa shampa dha thiki hoka dhu uka.” Shoopala okwa ti oshikondo shuukalinawa wiinamwenyo otashi indile elongelokumwe lyaanafaalama opo ku kwashilipalekwe kutya uunamafalama miitopolwa moka omukithi gwa tukuka onkalo otayi ka shuna ko nawa mbala ngaashi tashi vulika. Aanafaalama otaya vulu okudhimbulula nuupu omukithi nguka omolwa iipulu mbyoka hayi kala koshipa, unenene moshipala, mothingo, mepunda, komagulu nenge koshitako nokoshawo.Iitumba iikukutu nolundji oyi thike pamwe. Iitumba ohayi ehama nomathimbo gamwe ohayi vulu okuninga iilalo. Lwanima, iipulu ohayi ningi omakoko ngoka haga kala koshipa oomwedhi noomwedhi nongele ongombe ya aluka, ohayi kala niiyadhi yepulu.Endhindhiliko ekwawo olyo uupyu wa londa noonkondo, mboka hau vulu okulondoloka muule womasiku ashike ohau vulu okulonda ishewe. Shika ohashi landulwa kokuziya omayeye nokuza omahodhi momeho nomanino momayulu. Ongombe ohayi kanitha oonkondo nohayi tameke itayi li we, shoka hashi etitha yi kanithe oshiviha meendelelo noonkondo.

Etukuko lyomukithi gwepulu mOshikoto

Comments

Namibian Sun 2025-08-05

Please login to leave a comment

Etukuko lyomukithi gwepulu mOshikoto

Comments

Namibian Sun 2025-08-05

Please login to leave a comment

Login