Aanafaalama yokOnooli ya pewa omaloli

Aanafaalama aaniimuna kOnooli itaya ka longa we nuudhigu mokweenditha nokufala iimuna yawo kuutomeno, oshoka Meatco okwe ya landela omaloli gatano. Oomvula noomvula aanafaalama yomoshitopolwa shaKunene inaya kala naanaa haya fala oongombe dhawo kokatomeno kaMeatco moRundu omolwuukule (ookilometa eyovi) noshimaliwa shika osha li hashi zi mondjato yawo yene oshoka ka pwa li omaloli gepangelo ngoka ge lile po okufala oongombe dhawo. Osho ngeyi okatomeno kondilo komoRundu hoka ka tungwa noshimaliwa sha konda poomiliona N$120 otaku hokololwa kutya otaka longo owala kashona( oopelesenda 30% dhiilonga yako ayihe). Nonando ongawo onkalo otayi lunduluka ngashingeyi oshoka uuministeli wuunamapya mEtine owa gandja pambelewa omaloli gatano guunene wootona 30 noshowo omatemba ngoka ga landwa okupitila mOpolohalama yOkuyambidhidhadhaAaniimuna mEhala lyAayehe kOnooli koshimaliwa shoomiliona N$ 20.68 sha zi mOshiketha shoEuropean Development Fund. Minista yUunamapya, Inge Zaamwani oye a li omupopi omunene poshituthi shika shoka sha ningilwa mOngwediva. Zaamwani okwa ti omaloli ngaka otaga ka pupaleka omutenge ngoka gwa li komapepe gaanafalaama gwokukutha iimuna yawo mofaalama dhawo oku yi fala kuutomeno nokomahala hoka hayi kala yi ikalekelwa manga. “Oshinyangadhalwa shika shokugandja pambelewa omaloli nomatemba shoka tatu shi ningeni ngeyi otashi lalakanene okushonopeka oshimaliwa shoka aanafaalama haya longitha mokweenditha iimuna yawo okuza miigunda yawo okufala kuutomeno noshowo okuyi fala hoka tayi kala manga manga tayi konakonwa nokutalika ngele oyi na omikithi,” okwa ti. “Shika otashi kwathele aanafaalama ya dhane onkandangala onene nokukala oshitopolwa shomalandithilo giimuna nokukala aakuthimbinga mokumuna iimuna, shoka tashi hwepopaleke omahupilo getweni.” “Omaloli nomatemba ngaka otaga kala metonatelo lyehangano lyaMeatco, ehangano ndjoka tali kala nokulongela kumwe naanafaalama yokOnooli opo ku kwashilipalekwe omalongekidho gokufala iimuna oge li pauyuuki notaga kwatha aanafaalama ayehe.” “Omaloli ngaka otaga ka longithwa muutomeno auhe wokonooli ngaashi: Katima Mulilo, Eenhana, Oshakati, Outapi noRundu.” “Otandi indile Meatco a kwate nawa omaloli ngaka opo ga vule okukwathela oshigwana ethimbo ele, taga kwathele aanafalama monena nokomongula woo.” Okwa ti kutya Opolohalama yOkuyambidhidha Aananiimuna oye etwa po nelalakano okukutha po omainda nomashongo mokumuna oongombe nogo nee: uuniimuna, uundjolowele wiinamwenyo, uulithilo wa vuguka, okugwedhela onyama yetu ongushu, nokulanditha onyama yetu, shoka sha kala eshongo enene monakuziwa kaanafaalama yomevi lyaayehe konooli noshe ya imbi ya landithe onyama momalandithilo omanene. “Mokukwashipaleka kutya aanafaalama otaya vulu okwiinyenga memanguluko nokulondeka iimuna yawo nuupu, otatu pala ondjila ombanawa oshikondo shika nouuniimuna shi kala sha kwatela mo ayehe nosha kola,” okwa ti. “Nonande ongawo, onda hala okudhenga omuthindo kutya omaloli nomatemba ogo ageke inaga gwana. Onda hala okutsa omukumo aanafaalama ayehe ya longithe uunafaalama wopashinanena mboka tau kalele notau gwedhele keteyo ewanawa nowu na oshimpwiyu nevi lyetu.” “Ondjundo yashili yoshimpungu shika shetu shuuniimuna otayi ka monika owala uuna aanafaalama ya tembuka kokulongitha uunafaalama wonkulu yonale nokulongitha uutekinolohi nuunafaalama wopashinanena, mwa kwatelwa ekwato nawa lyuulithilo ndjoka hali kwathele iimuna yetu yi vale noyi tane nawa.” [email protected]