Kapia a ponokele aaleli yoongundu dhoompilameno

Oshilyo shoSwapo nomupevi minista omukulu gwiilonga Paulus Kapia, ngoka a monika ondjo moshipotha shuulingilingi nokwa futithwa N$60 000, okwa ponokele aaleli yoongundu dhoompilameno Panduleni Itula naJob Amupanda. Okwa ponokele woo omukondjelimanguluko nakusa Hidipo Hamutenya molwashoka a thigile po ongundu tayi pangele. Ta popitha Aakwaswapo poshigongi shawo mOlyomakaya ga zi ko kOniipa, Kapia okwa ti oongundu dhoompilameno otadhi pukitha Aanamibia, ta ti oyendji mboka ya thigile po oSwapo oya galukila mo mongundu. Okwa ponokele woo Augustus Jafet, mayola omukulu gwaNiipa ngoka a tidhwa moSwapo konima anuwa sho a tokola okukutha ombinga momahogololo twa taalela gookamunsela ongomuulikwa i ithikamena po.

Mokavideo ka andjagana, Kapia okwe ekelehi omapopyoo kombinga yenwethe mo lyoongundu dhoompilameno, ta ti Swapo oyo ashike ongundu yopapolitika tayi vulu okutsakanitha nokugwanitha omauvaneko gawo.

“Olye ta dhimbulukwa oRDP? Oyu uvanekele aantu uupomba womagadhi momagumbo. Otwe ya dhenga mo mo2009, nomauvaneko gawo inaga ka gwanithwa. Tse [Swapo] ihatu uvaneke oshinima itatu shi vulu,” okwa ti.

Okwa ponokele woo elelo lyanakusa Hamutenya lyoRDP, ta ti etokolo lye okuthiga po Swapo ka li a tala nawa.

“Pethimbo ndiyaka, okwa tile ota fulu okanala ka za koRuacana sigo okoZambezi. Onde mu pula, ‘Kanona, oto ehama?’ Lwanima okwa ka galukila moSwapo, naasho a mana oondjenda, otwe mu fumvike kOmawendo gOmapendafule,” Kapia a ti, nokwiipukapuka komutse.

Okutaukila muAmupanda, Kapia ta ti omuleli gwongundu yoAffirmative Repositioning (AR) okwa “ngwangwaneka aagundjuka” sho a lundulile ehangano mongundu yopapolitika.

“Ngashingeyi aantu otaya galukile moSwapo. Ohenda shili. Otse twe mu longitha — moouniversiti dha tungwa po kuSwapo,” okwa ti.

Kapia okwa nyana Itula, omukondjithi gwaSwapo ongomuulikwa i ithikamena po, okwa ti ye ota longo nuufudhime.

“Oha ti, ‘Namibia osho ashike oshilongo tu na,’ ashike okwa li a ya koBritain momimvo dhomilongo hetatu nasha. Ngashingeyi okwa hala okungwangwaneka aantu,” Kapia a ti.



‘Omupogoli a monika ondjo’

Mokuyamukula komapopyo gaKapia, omupopiliko gwaAR George Kambala okwe mu ula kutya ye “omupogoli a monika ondjo” ngoka ke na uuthemba wokulombwela aantu kombinga yopolitika.

“Oha fundju noye omupogoli a monika ondjo ngoka a pumbwa owala okudhana amagoesa muumbashu. Ota kambadhala owala okupandika kelelo lyoSwapo lyongashingeyi,” Kambala a lombwele oshikundaneki shoNamibian Sun.

Kapia gumwe gwomwaamboka ya monika ondjo moshipotha shuulingilingi shoSocial Security Commission noAvid investment, moka oomiliona N$30 ndhoka dha li dhi na okupungulwa dha longithwa nayi.



‘Ootakati oonkulu’

Omunawino miikwapolitika Ndumba Kamwanyah okwa ti omapopyo gaKapia itaga kumitha omuntu, ta ti omukalo nguka ogwe omukulu nopomathimbo a li mewawa lyaagundjuka moSwapo (SPYL) .

“Oyo opolitika ye ndjoka — okuponokela aantu peha lyokukundathana kombinga yaashika naashiyaka. Osho a li a tseyika ngaaka nopomathimbo sho e li mewawa lyaagundjuka moSwapo,” Kamwanyah a ti.

Okwa ti kutya okuponokela aantu paumwene otashi vulika ku sithe uunye aahogololi.

“Aanapolitika naya ulike omakandulo po gomikundu ngoka taya ka eta moshigwana. Otashi limbilike kutya natango ongundu tayi pangele oya pitika aantu ngaashi Kapia, mboka ye na omadhina ga kaka, ye ya popile ko pethimbo lyiikonga yomahogololo nonande pe na aantu ye na omadhina ga yela taya vulu okupopitha oshigwana,” okwa gwedha po.

Kapia, ngoka a lombwele aakwashigongi kutya “Swapo iha ningi omauvaneko itee ga vulu”, okwa pewa uusama molwonkandangala a dhana moshipotha shuulingilingi shaAvid – oshipotha shoka sha tsikila okwiimba okuya nawa komeho kwe papolitika.

— [email protected]



— [email protected]