Oohauto dhepangelo 'odha teka nodha kulupa’

Oohauto odho nale nale, dhimwe dha landelwe konima yoomvula omilongo mbali noonkwawo oomvula omilongo mbali nasha, oohauto dhepangelo ihadhi longithwa, uule woomwedhi noomvula odhi li moongalashe omolwa iikwaniipangitho yaa po noshowo omikanda dhokolela opamwe nethimbo elelee lyokutegelela sha ngele sha mbestelwa nande shi kale oshishona sha fa okabiena, oomwedhi hamano otadhi vulu okupita po.

Shika shimwe shomiilanduli yoondjindikila dha tulilwe po mesiku 1 Febuluali 2018 ongonkambadhala yokukwata nawa oshimaliwa shokulanda iihauto yepangelo, shoka osha hokololwa molopota yokakomitiye kowina.

Oshiholelwa ongaashi uuministeli wuundjolowele koshitopolwa shaZambezi, owu na ko owala oambulansa ne okuyelekanitha nooambulansa 15 mo2016.

Aanambelewa muuministeli oya ti shika osha guma nayi omayakulo gawo gokweendelela ando moku ka tala aavu kuuklinika moshitopolwa ya falwe kiipangelo iinene.

Epombelo lyokomumvo lyokukeelela omukithi gwomalaria, oshowo opolohalama yomatuntilo oya kalekwa omolwa ompumbwe onene yiiyenditho.

Iikwakwa

Olopota yokakomitiye kiiyenditho, omatungo nomalukalwa kEgumbo Etiyali lyoPashigwana, oka holola kutya iihauto yepangelo yongashingeyi itayi inekelwa yo otayi pula ondilo okukaleka po.

Shika ohashi eta iiyenditho yi kale moongalashe dhepangelo shoka hashi eta oongalashe dhi kale noongunga dhomayovi nenge dhoomiliona.

Oombelewa dhepangelo, omauministeli, iikondo yepangelo niitopolwahogololo ayehe oya zimina kutya oongalashe dhepangelo kadhi na iikwaniipangitho ya gwana noka dhi na oonzo dha pumbiwa dhokugandja omayakulo gongushu.

Shi ikolela kolopota, oongalashe dhepangelo 11 moshilongo ashihe ongashikwawo“ iihauto oya thikama ya teka, yi na uupuko uushona nenge omikundu ominene dha pumbwa makeeninga.”

Oshikwawo, “oongalashe dhepangelo itadhi gwanitha po iinakugwanithwa yadho, oshoka ngashingeyi odha ninga omutenge omudhigu."

Okakomitiye oka holola wo ewiliko lya nkundipala lyoongalashe otali etwa kokwaa po komilandu dhokwiilonga nokwiigwedhela ko ku kwashilipalekwe oomakeninga otaa vulu okulonga nawa noomodela oompe dhiihauto.

Okuthikitha omitsalo niipumbiwanima yilwe ya simana okuza kiitopolwa okuya koombonge oonene kOvenduka ohaku lata molwa okwaa po komayakulo gopapoosa gokutuma iinima mpaka naampeyaka.

Elimbililo

Oondjindikila odha guma nayi eyakulo lyoshigwana nodha eta elimbililo enene kombinga yomalweendo gopambelewa gaanambelewa.

Moongalashe odhindji, aaniilonga oyendji itaa longo sha, oshoka kape na iikwaniipangitho yokupangelitha iihauto. Ombedhi ndjika oya pewa ombelewa yomambestelo gopashigwana kOvenduka, oshoka omuntu gumwe a awike ta tonatele oongalashe adhihe 11 dhepangelo moshilongo ashihe.

“Shika osha ninga endangalati mokweendeleleka okupangelwa kwiihauto oshoka embestelo lyuunima uushona, ngaashi okabiena, otali vulu li kuthe oomwedhi ndatu sigo hamano opo ka tumwe” olopota ya holola.

Omakemo oga gandjwa wo kokakomitiye kombinga yoongalashe dhopaumwene tadhi londeke oondando uuna tadhi pangele iihauto yepangelo.

Ondando yolweendo lwopambelewa yoodola N$3.50 mokilometa inayi yeleka iilonga tayi longwa yo itayi endele pamwe nethimbo okuyelekanitha niilandomwa niipumbiwanima yi na ondilo niifuta yohiila ya ya pombanda.

Mu Januali, epangelo olya tseyitha kutya otali ka landela aakwanepangelo ooToyota Fortuner 30 nooToyota Land Cruiser (V8) mbali.

Omuprima, Omupopiliko gwOmutumba gwoPashigwana, omupevi prima, aapresitende aakulu otaa ka pewa ooland Cruiser, ndhoka tadhi landwa koshimaliwa shoomiliona N$25.



– [email protected]