Proteas wag nie lank vir hul tweede kans in Windhoek

Vandat die nasionale senior manskrieketspan op 11 Oktober vanjaar vir Suid-Afrika op sensasionele wyse in Windhoek geklop het, het aanhangers dalk reeds begin wonder wanneer die Proteas eendag na Namibië sal terugkeer om weer die FNB Eagles die stryd aan te sê. Zane Green se grenshou van die laaste bal het verseker dat die tuisspan die eerste ontmoeting ooit teen ‘n volwaardige Suid-Afrikaanse span beklink het, wat boonop die inhuldigingsgeleentheid van die blinknuwe FNB Namibië Krieketstadion (NCG) was. Krieket Namibië se uitvoerende hoof, Johan Muller, het die afgelope week nie net vir Gary Kirsten as 'n hoofkonsultant vir Namibië onthul in hul voorbereiding vir die ICC T20 Wêreldbekertoernooi nie. Muller het ook 'n oorsig gegee van die 2026-kalender wat op die FNB Eagles wag. Die jaar sal 'n driehoekige T20-reeks teen Zimbabwe en Suid-Afrika insluit wat gedurende Augustus en September in Windhoek aangebied word, met die Proteas wat daarna agterbly vir nog 'n T20-reeks van drie wedstryde teen Namibië. Kirsten sal die Eagles bystaan in hul voorbereiding om na verwagting op 24 Januarie reeds na Indië vir die T20 Wêreldbeker te vertrek. Hul opwarmwedstryde daar sal onder meer ‘n geskiedkundige eerste internasionale ontmoeting met Wes-Indië insluit. Tydens die Wêreldbeker is die Namibiërs in Groep A geloot om teen Nederland (10 Februarie in Nieu-Delhi), twee dae later teen die heersende titelhouer Indië in Nieu-Delhi, teen die VSA (15 Februarie in Chennai) en teen Pakistan (18 Februarie in Colombo, Sri Lanka) opgeweeg te word. Drie Afrika-spanne sal in die T20 Wêreldbeker meeding. Zimbabawe se Chevrons, waarskynlik met Sikandar Raza as kaptein, is in Groep B saam met Australië, Ierland, Sri Lanka en Nepal geplaas. Suid-Afrika – die verslane finalis in 2024 se eindstryd – bevind hom in Groep D saam met Nieu-Seeland, Afghanistan, die Vernigde Arabiese Emirate en Kanada. Eendagkrieket In die eendagformaat (50 boulbeurte) se pad na Wêreldbeker-kwalifisering sal afrigter Craig Williams se manne steeds ‘n paar posisies op die puntelys van die ICC Wêreldbeker Liga Twee-reeks (WCL2) wil klim om sodoende ‘n ekstra hindernis in hul pad vry te spring. In die WCL2-reeks sal Namibië in April ‘n driehoekige mini-toernooi in Windhoek aanbied waaraan Skotland en Oman ook deelneem, met twee ODI’s tussen elke span. Skotland sal daarna agterbly vir ‘n T20-reeks teen die gasheerspan. In Meimaand volg nog ‘n driehoekige WCL2 mini-toernooi in die VSA, waar Namibië en die Verenigde Arabiese Emirate die besoekers sal wees. Die derde WCL2-toer van die jaar sal die Eagles se bepalings in die algehele reeks (2024-2026) afsluit wanneer hulle en Nepal in Nederland gaan speel. Volgens Müller word beplan dat die Namibiërs as ‘n opwarming vir die Nederland-toer ook ‘n vinnige draai vir ‘n wedstryd of twee op die eiland Jersey gaan maak. In Juniemaand is ‘n inkomende toer deur ‘n Indiese staat na Windhoek ook in die vooruitsig.