Swapo a kanitha omahogololo gomoSwakopo

Ekanitho lyomahogololo ngoka ga ningwa mondoolopa yaSwakopo omasiku ga piti koSwapo, otashi ulike kutya ongundu ndjoka otayi kanitha eyambidhidho momudhingoloko ngoka gwokomunkulofuta.

Omahogololo ga ningwa ehuliloshiwike lya piti , oga sindanwapo komuhogololwa gwongundu yoIndependent Patriots for Change (IPC) Louisa Kativa ngoka a mono omawi 3 625 nokupingenapo kansela nale kokatekete koIPC, Ciske Smith-Howard.

Kativa okwa dhengemo omuhogololwa gwoSwapo, Salomon Ndara Nehemiah, ngoka a mono omawi 3 122 oshowo omuhogololwa gwongundu yoLandless People's Movement's (LPM) Hilaria Tangeni Musheko, ngoka a mono omawi 1 362 votes.

Omupeha minista nale gwelelo lyoondoolopa nomagumbo, Gerhard Tötemeyer okwa popi kutya Kativa okwa mono eyambidhidho enene omolwa oshinakugwanithwa she onga mayola gwondoolopa yaSwakopo.

“Okwa longo nawa onga mayola na okwa mono ehogololo lyopaumwene enene. Aahogololi nale yoSwapo kaya uvite ombili ihe inaya pyakudhukwa okuhogolola ongundu yimwe nopehala oya kala owala inaya hogolola na onga oshizemo aahogololi aashona ya kutha ombinga momahogololo ngoka ga ningwa,” Tötemeyer apopi.

Rui Tyitende okwa holola kutya Swapo ina dhiminwapo natango omolwa oshikumungu shofishrot shoka sha etitha aaniilonga yomomeya oyendji ya kanithe iilonga yawo.

Ondungu oya kanitha woo iipundi oyindji moPaliamende sha landula omahogololo gomomvula yo 2019.

“Otashi ulike kutya Swapo natango okuli muupyakadhi omolwa oshikumungu shofishrot. IPC nonando oku na iikumungu ye yomeni, aantu natango otaye mu hogolola. Ngele shoka osho tashi ka ningwa momahogololo go 2024 opo tashi ka ulika natango ihe iizemo mbyoka hayo yokweethitha onkalo yi kale ngaaka. Swapo natango ina taambako kutya ota shuna pevi.”

Ndumbah Kamwanyah okwa popi kutya Swapo ota kanitha eyambidhidho unene koondoolopa dhokomunkulofuta.

“Ondoolopa yaSwakopo oya kala neyambidhidho enene lyaSwapo, nekanitho lyaSwapo kondoolopa hoka otashi ulike etumwalaka enene. Otashi ulike kutya aahogololi yokondoolopa ndjoka inaya dhiminapo Swapo omolwa omukalo ngoka uungaunga nofishrot.”

Okwa popi kutya nonando omwalu gwaahogololi ogwa li omushona osha ulike kutya eyambidhidhi lyoongundu dhompilameno otali londo pombanda , na okwa gwedhapo kutya ngele ito ningi nawa, aahogololi otaye ku geele.

Hoze Riruako okwa gwedhapo kutya omawi ga likolwa kongundu yoIPC oshowo LPM otashi ulike kutya omahwahwameko gawo otaga longo moshitopolwa shErongo.

Omahogololo gomeni

Swapo okwa ningi woo omahogololo gomeni mehuliloshiwike lya piti okuhogolola aakwatakanithi yiitopolwa oshowo aakuthimbinga momutumba gwomahogololo mongundu.

Moshitopolwa shaKhomas, Elliot Mbako okwa sindana onga omukwatakanithi natango gwongundu ndjoka moshitopolwa, omanga Martha Namundjebo-Tilahun a hogololwa onga omudhiginini gwiiniwe naQueen Kamati oku li omunambelewa omupe gwomauyelele nomakwatathano.

Moshikoto, Armas Amukwiyu okwa shuna tanago pehala lye onga omukwatakanithi omanga Saara Ndahepuluka Shikokola a hogololwa a ninge omunambelewa omupe gwomauyelele nomakwatathano nAndreas Shipa okwa hogololwa a ninge omudhiginini gwiiniwe.

Moshitopolwa shaHardap, Joplin Gontes okwa hogololwa a ninge omukwakakanithi gwoshitopolwa, Riaan McNab omunambelewa omupe gwomauyelele nomakwatathano naEdward Wambo omudhiginini gwiiniwe.

Mohangwena Fillemon Josua omukwakakanithi gwoshitopolwa, Tuyeimo Nathingo omunambelewa omupe gwomauyelele nomakwatathano Selma Kawiwa omudhiginini gwiiniwe.

MoKavango East, Ottilie Shinduvi omukwakakanithi gwoshitopolwa Bonifatius Kudumo omunambelewa omupe gwomauyelele nomakwatathano.

MoKunene, Julius Kaujova omukwakakanithi gwoshitopolwa naFonnie Katjingisiua omudhiginini gwiiniwe.