“Otwa vulwa okulya to i tapula”. Aashomeya ya ningi omunyanyo gopambili

Ondoolopa Oshomeya ndjoka ya tseyikanawa nuuyamba wongopolo, oyi li pokukanitha esimano lyawo sho aakalimo kohi yehangano lyedhina Tsumeb Aitsama Madan Development Project, ya ndjika oonyala mevi mokufuta iifuta yaamuni.

Etokolo ndika olya kuthwa konima yoomvula tadhi hokololwa kaakalimo kutya elelo lyondoolopa kohi yaangoka a li ta longo peha lyaCEO gondoolopa, Frans Enkali, olya li ta li longitha nayi oshimaliwa, mu na uulingilingi wa lundalala, nelelo lyaana naakwashigwana.

Momukandakemo gwawo ngoka ya gandja kelelo lyondoolopa yaTsumeb Omaandaha, aakalimo mboka ya li ya thikama po mongungu yaakokele osho wo aagundjuka oya gandja etokolo lyawo lya hugunina. “ Gwanithiipo shoka tatu pula muule womasiku ga heyali giilonga ngele hasho itatu ka futa nando osha komaakulo gamuni.”

Shoka sha geyitha unene aakwashigwana, uulethimbo woshikakothimbo sha Enkali shoka sha kala nokulelepekwa.

Omukandakemo otagu ti elelo lyondoolopa ota li nana nondatu pashimaliwa molwa ondjambi tayi pewa Enkali.

Aakalimo otaa ti elelo lyondoolopa olya futa iimaliwa ya konda N$250 000 molwa omauwanawa gegumbo, omalweendo osho wo ongodhi yopeke komunambelewa ta longo peha lyomunambelewa omukuluntu gwelelo ngoka a longa mombelewa ndjoka oomvula dha konda pundatu.

“Shika otwe shi tala ko osho ehepeko mokufuta omauwanawa gaEnkali omanga ondoolopa tayi mono iihuna,” dha shangwa momukandakemo.

Aakalimo otaya pula minista gomayambulepo giilando niitopolwa yokuushayi Sankwasa James Sankwasa, a kuthe onkantu nziya opo a ulike omuwiliki goshikondo ta kalelele ye a hulithepo omilandu dha landulwa dhokukuta CEO omupe ndhoka yu uvite kadhili pamautho nopamilanduveta.

Tsumeb Aitsama Madan Development Project otayi finyaafinya wo omifango dhokulanda nokulanditha hadhi landulwa kelelo lyondoolopa moka aakalimo taa ti ootendela ohadhi pewa ashike ookuume naapambele, yo kayeshi aakalimo yomondoolopa.

Omukandakemo ogwa totha mo kondandalunde otendela ndjoka ya pewa Kweni-Pewa Trading Cc., moka aakwashigwana taya ti nayi kale ya hulithwa po.

Aakalimo otaa ti ehangano ndika ota li kwatakanithwa nakansela melelo lyondoolopa gongundu yo Affirmative Repositioning (AR), Sem Nghuulikwa, ngoka wo e li omunashipundi gwelelo lyondoolopa yaTsumeb.

“Oongeshefa dhomondoolopa odho nadhi talike tango mokupewa ootendela opo dhi vule okuyambidhidha aapembele yawo,” ongundu tayi ti ngaaka, yo tayi pula opo ootendela adhihe melelo lyondoolopa shi kale ashike dha nuninwa aanangeshefa yomondoolopa sigo omina yokuhengumuna iitenda ya tameke okulonga meudhililo.

Aakalimo otaa pula wo omayamukulo kombinga yoshimaliwa shoomiliona N$11 ndhoka dhaa shiwike shoka dha longithwa ta ku fofodholwa dha futwa omuyaluli gwiiniwe a za pondje, shoka sheeta aakalimo ya kale yu uvite osha nika uulingilingi.

Shika osha landula konima sho oshimaliwa shoomiliona N$6 taku popiwa wo dha li dha futwa omuyaluli gwiiniwe gopondje pethimbo lyelelo lyaEnkali.

Ondoolopa tayi kanitha ongushu

Omanyenyeto moTsumeb itaga nyenyeta ashike iilonga mombelewa ihe otaga nyenyeta wo omeya nomapandaanda. Nonando okwa li kwa longithwa oshimaliwa shoomiliona N$30 mokutunga ondama yomeya yedhina Tsumeb Tupperware, aakalimo onkene taya nyenyeta yaa na omeya ga yela gokunwa.

Omukandakemo otagu pula wo kutulwe meendelelo oowili dhomeya dhuukalata lyo elelo li dhime po wo oondjo dhomeya dhonale unene tuu dhaakulupe naakwanaluhepo.

Ongundu otayi pula wop u patululwe oshitayi shombelewa yelelo lyondoolopa mNomtsoub yi kale nokuyakula aakulupe osho wo aayambidhidhwa, osho wo puhulithwe po ehangano lyedhina African Personnel Services (APS) li pingenwepo kaakwashigwana mboka taya kala nokutala nkene omakuto gaaniilonga taga ningwa.

Omashongo omanene

Molwa oomina dhoka dha pata sheetwa kuukundi weliko, aakalimo oyu uvite ya fay a ekelwahi kepangelo.

Omukandakemo otagu lesha tagu ti: “ Otatu pula epangelo li tule po oshimaliwa putotwe oopolojeka tadhi etapo oompito dhiilonga, dhi vule okuhupitha ondoolopa yetu paliko.”

Omukandakemo ogwa li gwa taambiwa ko komutiyali mayola gondoolopa Lisken Elisabeth Klaasen, ngoka a tseyithile aahololimadhilaadhilo kutya elelo lyondoolopa otali ya moonkundathana opamwe naaleli yongundu yo the Tsumeb Aitsama Madan Development Project shi na sha naashoka tashi pulwa kongundu.

[email protected]