Ye vulithe po 120 ya kanitha iilonga popoloyeka yaWu

KENYA KAMBOWE

RUNDU



Konyala aantu ye li pe 120 oya kanitha iilonga yawo mEtiyali moRundu sha landula omananathano pokati komunangeshefa Omuchina, Stina Wu, oshowo omutungi ngoka aakonaakoni yaaniilonga ya mono kutya otaya futu aaniilonga yawo oondjambi dhili pevi noonkondo.

Aaniilonga mboka ya li taya longele ehangano lyoNorthernland Civil Engineering, ndyoka lya pewa iilonga kehangano lyaWu lyedhina, Helmsman Group opo li tunge opoloyeka yomagumbo, oya zi miilonga shalandula omagandjo guusama pokati komahangano ngoka gaali miipathi yopolisi oshowo aanambelelwa aakonaakoni yaaniilonga.

Northernland okwa monika ondjo sho ina gandja omambale gokguamena aaniilonga ye, mboka haya futwa oondjambi dhili pevi noonkondo.

Ehangano olya popi kutya otali futu aaniilonga oondjambi dhili pevi molwaashoka ehangano lyaWu, lyoHelmsman Group oli na oondjo dhawo.

Okwa holola woo kutya ehangano ndyoka otali longitha evi ndyoka inali pitikwa okutungithwa, ndyoka aaniilonga aakonaaakoni yomaatungo ya popi kutya otali tula pevi ongushu yomagumbo.

Kape na etsokumwe lyopambaapila pokati kehangano lyaNorthernland Civil Engineering oshowo Helmsman Group, na oyali owala ya ningi etsokumwe lyopakana, opo Northernland Civil Engineering a manithe opoloyeka ndjoka, sha landula sho ehangano ndyoka lya li lya pewa opoloyeka tango lya tidhwa nokuthiga natango aantu oyendji kaaye na iilonga.

Opoloyeka ndjoka yaWu tayi ithanwa Sunshine Village, otayi tungwa moKaisosi pondje yaRundu.

Aakonaakoni yaaniilonga oya talelepo ehala ndyoka mEtitano ye li pamwe nopolisi na oya mono kutya Northernland ita gwanithapo ompango opo aaniilonga ye ya kale ya gamenwa, nomizalo dhiilonga tadhi ithanwa personal protective equipment (PPE).

Metiyali, omukomeho gwehangano lyoNorthernland Civil Engineering, Immanuel Shilongo okwa yelitha kutya omatompelo sho aaniilonga ye kaye na omizalo dhokwiigamena omolwaashoka moostola dhomomudhingoloko kamu na omizalo ndhoka, na oya tumu okuza koondoolopa dhimwe nomizalo dhoka odha thiki owala mOmaandaha.

Aanambelewa oya shunako kehala ndyoka na oya holola kutya oya nyanyukwa noopresenda 80 na oya gandja e yo komeho kuNorthernland Civil Engineering a tsikile niilonga yopoloyeka ndjoka, ihe nonando ongaaka aaniilonga oya nyenyeta kombinga yoondjambi dhili pevi, shoka sha etitha natango omakonaakono omatiyali ga gwedhwapo momambo gehangano ndyoka.

Sha landula omakonaakono gomambo, omukonaakoni gwaaniilonga, Dennis Nghitomoka okwa dhidhilike kutya aaniilonga yokukwathela otaya futwa oshimaliwa shooN$12 mowili omanga ompango tayi pula oondjambi yooN$16 mowili. Aaniilonga yokutunga otaya futwa N$25 mosquare metre kehe omanga ompango tayi utha N$34.21 mowili kaatungi ya pyokoka, omanga aatungi ya pyokoka kashona taya pumbwa okufutwa N$22.34 mowili.

Nghitomoka okwa pula Shilongo kutya omolwashike ta futu aaniilongaa oondjambi inadhi ihwapo, moka a yamukula kutya na ku ya pa okondalaka iteya futu sha gwana na oya tokola okufuta aaniilonga oondjambi dhoka.

Sho uuvu eyamukulo lyaShilongo, Wu okwa thikama nokupopya nkene ta futu Northernland Civil Engineering ta popi kutya haye e na okupewa uusama ngele aaniilonga itaya futwa ngaashi oveta tayi popi.

Shilongo okwa popi kutya Helmsman Group oku na oondjo dhawo dhiimaliwa oyindji.

Oontamanana odha dhigupala, sha etitha Wu a dhengele ongodhi oshikondo she shiiyemo opo a yelithe omanga Shilongo a kutha mo omikanda dhe dhombaanga opo naye a koleke omapopyo ge.

Wu okwa popi kutya oha futu ehangano ndyoka iikwatelela kuumbaapila womafutilo mboka ha pewa, nonando okwa ndopa okuholola uumbangi mboka sho e wu pulwa.

Sha landula oontamanana dhoka (Helmsman Group oshowo Northern Civil Engineering) oya ningi omutumba konima yomiyelo dha pata, nokonima yominute oonshona aaniilonga oya tseyithilwa kutya okwa tokolwa okukaleka etsokumwe ndyoka, sha etitha ekaanitho lyiilonga kaaniilonga mboka.