Namibian Sun

Okwa lopotwa kutya Namibia okuli shimwe shomiilongo mbyoka yi na omwaalu guli pombanda gwiilwitho inayi pitikwa, sho e li ponomola ontiyali momusholondondo gwiilongo mbyoka yi li mongundu ndjoka.

Uuyelele mboka owa hololwa pethimbo mpoka omukomeho gwopolisi yaNamibia, Ndjai Sebastian Ndeitunga, gandja ekunkililo po aakwashigwana kaya longithe oondjembo dhawo pethimbo lyiituthi yomatango omanene, nenge iituthi yontumba, ta popi kutya osha nika oshiponga noonkondo, na oshi li epogolo lyoveta.

Ndeitunga okwa popi kutya opolisi oya ndhindhilika kutya aantu otaya umbu oondjembo pethimbo lyiituthi yomatango omanene nenge pethimbo taya tyapula oohango.

“Omukalo ngoka otagu yi pondje Oveta yIilwitho Ontiheyali yomOmvula yo 1996, nakehe ngoka taka monika ondjo mepogolo lyoveta ndjoka, otaka taalela oshilanduli,” Ndeitunga a popi.

Olopota ompe ndjoka ya pitithwa kombinga yiilwitho iishona tayi ithanwa 'Trade Update 2018 - sub-Saharan Africa in Focus', Namibia oku li ponomola ontiyali momusholondondo gwiilongo mbyoka yi na omwaalu gwiilwitho yi li pombanda noonkondo sho e na iilwitho yi li po 200 000, omanga South Africa e li ponomola yotango sho e na iilwitho mbyoka ya shangithwa yi li poomiliyona ndatu. Malawi okwa lopotwa e na iilwitho yi li po 12 500, sho oye e li pevi lyomusholondondo ngoka.

Olopota ndjoka oya holola kutya Namibia oku li shimwe shomiilongo mbyoka hayi e ta moshilongo omwaalu guli pombanda gwiilwitho, sho eeta moshilongo iilwitho yongushu yoomiliyona shaUS$3.4.

Uuyelele mboka owomvula yo 2013 sigo 2015.

Aalandithi yiilwitho iishona kuNamibia oya hololwa kutya Botswana (34%), South Africa (33%) oshowo Zambia (15%).

South Africa oye omulandithi gwiilwitho oyindji yongushu yoomiliyona yooUS$62.3, omanga Côte d'Ivoire, Kenya oshowo Central African Republic (CAR) yeli momusholondondo gwiilongo itano yi li pombanda.

Olopota oya holola kutya Namibia okuli ponomola ontine momusholondondo gwiilongo mbyoka ya landa iilwitho iishona oyindji mosub-Saharan Africa kongushu yoomiliyona dhaU$32.2 moshikako shomvula yo2013 okuya mo 2015.

Elando lyiilwitho moNamibia okuza pondje yoshilongo olya londo okuza poomiliyona dhaUS$5.4 okuya poomiliyona dhaUS$22.6.

Olopota oya holola kutya Namibia okwa ningi omulandi lwotango gwiilwitho iishona omunene momvula yo 2015.

Aalandithi aanene yiilwitho kuNamibia oya hololwa kutya Russia (77%), United States (10%) oshowo Germany (7%).

Russian Federation okwa landitha iilwitho yongushu yoomiliyona dhaUS$17.5 kusub-Saharan Africa momvula yo 2013 okuya mo 2015.

South Africa oye omulandi omunene sho a landa iilwitho yongushu yoomiliyona dhaUS$126.1 omanga iilongo yimwe mbyoka yi li pamwe naye momusholondondo ongaashi Cameroon, Côte d'Ivoire oshowo Malawi.

Uuyelele ngele iilwitho mbyoka ya landwa miilongo mbyoka ohayi longo tuu, inawu monika wu li mondjila.

Oshiholelwa ongaashi kutya DRC, Mali oshowo Namibia oya lombwee aaningi yomapekaapeko kutya iilongo yawo ihayi longo ooholo nenge iipangelitho yoondjembo ndhoka ihe oonzo dhimwe odha holola kutya ohaku longwa iikuti yoondjembo miilongo mbyoka iyali.

Pamuthigululwakalo inaku mangulukwa okupopiwa kombinga yiilwitho menenevi lyasub-Saharan Africa.

Opolisi yaNamibia oya li ya gandja uuyelele kuyele nuumvo kutya oya gandja omikanda dhokukala noondjembo dhi li po 50 000 muule woomvula omugoyi dha piti, nomikanda dhi li po 6 000 ohadhi gandjwa kehe omwedhi.

Oomvula dhika okwa holola omaipulo nomalimbililo kombinga yaantu mboka ye na oondjembo na osha holola uutile kombinga yegameno lyoshigwana.

Opolisi oya li ya ningi eindilo nokugandja ompito yesilohenda opo mboka ye na oondjembo kadhi oombaapila yedhi gandje kopolisi momvula yo 2016.

ELLANIE SMIT