Ya hala Namdeb a thuwepo okufuta iishoshela yepangelo

Omahangano gokumina okawe moshilongo ohaga futu iishoshela yiiyemo yoopresenda 55, kwa gedhwa oopresenda 10 dhetumo pondje lyokawe inaka kwewa. Kutya Namdeb oha futu ingapi, oshi li oshiholekwa.Epangelo oliikolelela noonkondo okuza memino lyokawe. Olopota yOmbanga yaNamibia oya holola kutya otaku tengenekwa emino lyokawe tali etele oshilongo oshimaliwa sha thika poobiliyona 17.4 kondando ndjoka tayi longithwa okuza poobiliyona 202.8 kwiikwatelelwa kondjele yiilongomwa yomoshilongo. Omvula ya piti, oshikondo osha yambidhidha eliko lyoshilongo noobiliyona 18.2.Sho a gandja uuyelele uushona kombinga yeindilo ndyoka, omupeha amushanga gwoMUN moshitayi shomUumbugantu, Hashondali Kakuti okwa popi kutya shoka otashi kakalekapo iilonga yehangano ndyoka, lyokufula okawe.Ehangano lyaaniilonga oli na einekelo kutya ngele eindilo lyawo olya ziminwa nena shoka otashi ka pa Namdeb ompito a vule okutsikila niilonga. “Oonkundathana odha ningwa nelelo yondoolopa yaRange oshowo uuministeli wiikwamina naamboka wemona. Otwa hala ekuthopo lyiifuta mbyoka li kale lyuule woomvula ntano nenge heyali. Otwa pumbwa iimaliwa mbyoka tayi ka longithwa miinyangadhala yilwe yokukalekapo iilonga. Ngele pwaahena shoka nena otatu pumbwa iimaliwa okuza kepangelo,” Kakuti a popi. Pahapu dhaKakuti, uuministeli wemona otawu nongonona omikanda dhiiyemo dhaNamdeb okuza momvula yo 2011. “Opo eindilo ndyoka li ziminwe olya pumbwa ezimino lyokabinete nomatompelo ngoka ogo ga etitha tu ye moonkundatha namushanga gwoSwapo, Sophia Shaningwa. Ngele osha ningwa nena otashi ka totapo oompito dhiilonga dhili po 200 okuya po 300. Otatu shi ningile woo ekalepo lyoomina, na oshiikolelela kepangelo okutokola ngele Namdeb oku na omwenyo nenge ahowe,” Kakuti a popi. Omunambelewa omupopiliko gwaNamdeb Shangelao Ndadi okwa popi kutya otaya ningi oonkundathana naakuthimbinga kombinga yonakuyiwa yomina ndjoka, nopahapu dhe oya taambako eindilo lya ningwa kehangano lyaaniilonga.Omaindilo ga faathana ogali ga ningwa momvula yo 2009 omolwa onkalo yopaliko yankundipala ndjoka yali ya etitha Namdeb a kuthe miilonga aaniilonga 600, oshowo momvula yo 2013. Omupopiliko gwuuministeli wemona, Tonateni Shidhudhu, ina yamukula komapulo ngoka a ningilwa.OGONE TLHAGE

Ya hala Namdeb a thuwepo okufuta iishoshela yepangelo

Comments

Namibian Sun 2025-07-16

Please login to leave a comment

Ya hala Namdeb a thuwepo okufuta iishoshela yepangelo

Comments

Namibian Sun 2025-07-16

Please login to leave a comment

Login