Ya dhini oompango dhelelo lyopamuthigululwakalo

Omukalelipo gwopaveta gwelelo lyUukwanyama, Silas Kishi Shakumu, ngoka ta kalelepo elelo ndyoka okwa popi kutya ongundu ndjoka otayi e ta evundakano unene momudhingoloko gwaShikunde oshowo Omundaungilo moka taku popiwa kutya otaya ulike ooyene yomikunda nokugandja evi shaheli paveta. Elelo otali popi kutya ongundu ndjoka tayi e ta evundakano otayi kwatelwa komeho kuThomas Haihambo, oshowo elenga nale mOngha George Hikumwah naamboka aniwa otaya langele ooyene yomikunda momukunda ngaashi Omundaungilo, Oshipala, Ondwi, Onamungondji, Omhalapapa nEpasha. Okwa lopotwa kutya oya langeke ooyene yomukunda pwaahena epitiko okuza kelelo lyoshilongo shoka, naashoka osha popiwa pethimbo lyomutumba gwiikundaneki ngoka gwa ningilwa pOmbala yUuwanyama, mOmhedi, mEtitatu lyoshiwike sha piti. Mboka ayehe oya falwa kompangu kelelo lyoshilongo, ihe oya holola ohokwe opo oshikumungu shoka shi kandulwepo pondje yompangu na ooya uvaneke kutya itaya ka tsikile we naashoka ya kala taya ningi. Etsokumwe ndyoka olya ningwa palombwelo lyompangu, ihe elelo lyoshilongo shoka olya popi kutya ongundu ndjoka otayi tsikile nokuya pondje elombwelo lyompangu ndjoka, paku langeka natango ooyene yomikunda nokugandja evi. Mboka taya patanekwa oya tumbulwa komadhina kutya Haihambo, Hikumwah, Ndadi Martin, Lydia Namidi, Wilpard Nambahu, Ndeunyema Ndove, Hashikutuva Nghidipo, Moses Ndilenga, Nghifindaka Nghifikwa, Hashipembe Erastus, Nambala Lydia, Mweshitila Jonas, Selma Kaumanwa, Sesilia Naghama oshowo Haukongo Fanuel. “Kehe ngoka wa pewa omukunda nenge evi kaantu mboka shi tseya kutya uliko lyoye nenge evi ndyoka wa pewa kali li pamulandu. Aantu mboka inaya ulikwa kelelo lyUukwanyama na oya pewa elombwelo kompangu opo ya hulithepo shoka taya ningi,” Shakumu a popi. Okwa tsikile kutya ongundu ndjoka oya totwapo omvula ya piti, konima sho elelo lyUukwanyama lya sindanapo mompangu oshipotha pokati kelelo nooyene yomikunda yatatu nale, mboka ya tidhwa miilonga mo 2013. Hikumwah okuli gumwe gwoomwaamboka ya tidhwwa miilonga, na oyali ya fala Omukwaniilwa gUukwanyama, Queen Mwadinomho Martha ya Kristian Nelumbu, kompangu. “Oya totopo wo oshihako shawo shelelo lyUukwanyama, shoka haya longitha mokuninga omatokolo gawo ngoka kage li paveta. Otwa fala kompangu oshikumungu shoka ihe okupitila maakalelipo yawo yopaveta oya tokola opo oshikumungu shoka shi kandulwepo pondje yompangu.”

Elelo olya popi kutya otali ka katuka oonkatu dhopaveta omolwa iilyo mbyoka yi li 22 ya dhini etokolo lyompangu ndyoka lya ningwa. Oonkambadhala okuninga ekwatathano naHikumwah odha hulile uunyengwi, sho ongodhi ye yopeke inayi yamukulwa.



ILENI NANDJATO