Uulingilingi omolwa evi otawu teya po SADC

JEMIMA BEUKES

Uulingilingi wa kwatela mo aaniilonga yepangelo, aaleli yopamuthigululwakalo, aakwaniilwa, oombaanga oshowo omahangano omanene oyimwe yomiinima tayi shunitha monima egandjo lyevi kwaayehe nekwatonawa lyevi miilongo yomuumbugantu waAfrica.

Shoka osha popiwa kaatseyinawa miikumungu yekwatonawa lyevi, mboka ya gandja omaiyuvo gawo pethimbo lyomutumba gwevi ngoka gwa ningwa kuyele mOvenduka oshiwike shika.

Dr Fatima Mandhu, omukomeho gwoshikondo moZambia’s university school of law, okwa popi kutya pauyelele mboka ye na oye na aaleli yopamuthigululwakalo oshowo aanambelewa yevi mboka haya futwa koombaanga oshowo omahangano ngoka omikanda dhuumwene wevi dhawo hadhi manwa mbala nokuzinimwa mbala.

Mandhu okwa popi kutya oshizemo shuulingilingi osha nika oshiponga noonkondo.

Okwa yatsikile kutya uulingilingi otawu dhana woo onkandangala sho aaleli yopamuthigululwakalo taya gandja omavi koohandimwe pomahala ngoka inaya pitikwa okupewa omavi.

Uulingilingi owuli omukundu omunene moLesotho, omutseyinawa gwevi, Malopo Ntaote, a popi kutya sigo onena kape na oshindji sha ningwa mokuya moshipala iilonga yuulungilingi.



Okwa popi kutya pe na woo aanambelewa yomavi mboka taya dhana onkandangala muulingilingi mokugandja evi.



Johnson Kampamba gwaBotswana okwa popi kutya otaya dhengelwa pevi kompumbwe yomulandu guli nawa, ekateko megandjo lyevi oshowo ekalekepo lyomauyelele.

Okwa popi kutya uulingilingi owuli woo omukundu omunene

Okwa popi kutya ope na aluhe oontamanana pokati kaaleli yopamuthigululwakalo kombinga yoongamba dhevi omolwa ompumbwe yuuthemba yuumwene wevi.

Manyatsi okwa popi kutya oonkondo dhaaleli yopamuthigululwakalo dhimwe odha tula pevi mokati kaakwashigwana omolwa omananthano gekondjelo lyoongamba shoka sha kutha po esimaneko mokati kaaleli yopamuthigululwakalo.