Shifeta a tulapo omulandu omupe

Ominista yomidhingoloko, Pohamba Shifeta oya gandja etseyitho kutya iilikolomwa ayihe yopaiyemo okuza muukongo oya pumbwa okupitila momayalulo goombaanga dhuuministeli opo ku vule okukalekwapo uuyelele womondjila, yo iimaliwa mbyoka yi vule okulongithwa shoka ya nuninwa.

Shifeta okwa gandja elombwelo ndyoka mehuliloshiwike lya piti, pethimbo kwa patululwa pambelewa osasiyona moBuffalo moBwabwata National Park.

Okwa popi kutya oomiliyona ohadhi gongelwa omvula kehe okupitila muukongo momahala giinamwenyo ga gamenwa. Iimaliwa mbyoka oya li ya pumbwa okukwathela mokuyambulapo aakwashigwana ihe kape na omayambulepo taga ningwa.

“Ito vulu okulya pehala lyayakweni, oshinima shoka nashi hule,” Shifeta a popi.

“Iimaliwa tayi likolwa okuza muukongo nayi longithwe moopoloyeka dheyambulepo lyoshigwana.

Shifeta okwa popi kutya iimaliwa ayihe mbyoka tayi monika okuza muukongo otayi ka tulwa momayalulo goombaanga dhuuministeli, opo yi vule okupewa oopoloyeka dheyambulepo lyoshigwana ndhoka dha shangithwa nuuministeli.

Okwa popi kutya uuministeli otawu ka kuthako ekondololo lyiimaliwa mbyoka na otayi ka mangululwa owala okupewa oopoloyeka dhoka shiishangitha nuuministeli.

Minista okwa popi kutya oBwabwata National Park oya ningi oomiliyona 5 komvula ihe kape na omayambulepo gasha taga monika.

Shifeta okwa popi ngaaka konima owala yiiwike sho aakwashigwana yaaSan Khwe ya holola omaiyuvo gawo omolwa ompumbwe yomayambulepo momudhingoloko gwawo moBwabwata National Park.

Oya oya holola omaiyuvo gawo pethimbo lyomutumba gwa ningwa nomupresidende moRundu. Shifeta okwa li a kala momutumba ngoka ihe ina vula okumona ompito a yamukule.

KENYA KAMBOWE