Shanghala a kaleke iilonga yompangulilo yopamuthiguluwakalo mOndonga

Ominista yUuyuki, Sacky Shanghala okwa kaleke nokukutha miilonga iilonga yOndonga Traditional Authority Community Court (OTACC)moombelewa dhopOnethindi . Minista Shanghala okwa gandja woo elombwelo kuamushanga gwelelo lyopamuthigululwakalo lyaNdonga,Nepando Amupanda opo a gandje uuthemba kookansela yelelo lyopamuthigululwakalo ndyoka mboka ya tidhwa miilonga omvula ya piti, opo ya vule okuya momatungo gompangulilo.

Ookansela mboka ya tidhwa miilonga ngashiingeyi otaya longele mOnethindi, onga aapanguli naakonaakoni yiipotha yopamuthigululwkalo melelo ndyoka.

Shoka osha ningwa, sha landula sho omutumba ngoka gwa li gwa pumbwa okuningwa kuShanghala noongundu mbali dhelelo lyoshilongo shoka, gwa kaliwa owala kongundu yimwe, sho ongundu ndjoka tayi kwatelwa komeho kuAmupanda ya li ya tseyithilwa kutya omutumba ngoka otagu ningwa ongulohi yEtine.

Omutumba ogwa ningwa ongula.

Momasiku 21 gaMei, omupeha omukomeho gwoompangulilo Amalia Nathaniel, okwa tseyithile oongundu ndhoka mbali dha topokauka kutya Shanghala okwa hala okuninga omutumba nayo momasiku 24 gaMei mOndangwa.

Oyendji yomiilyo yompangulilo yopamuthigululwakalo mOndangwa, ookansela mboka ya tidhwa miilonga kOmukwaniilwa Immanuel Kaluluma Elifas, muJuli gwomvula ya piti.

“Alikana tseyithilweni kutya Minista Shanghala okwa hala okutalela po Tatekulu Omukwaniilwa Elifas Kauluma momasiku 24 gaMei. Minista okwa hala woo okuninga omutumba nangoye oshowo Josef Simaneka Asino potundi 10 yokongulohi mohotel yomOndangwa, shi na sha niikumungu melelo lyoshilongo. Kwashilipaleka kutya owa kalelwapo kaantu kaye vulithe puyane mboka yeli aapanguli ngele aakonaakoni yiihokolola na oye li momushangwa gwopapangelo nenge mboka kwa ningwa omalongekidho ya kale momushangwa gwopapangelo,” ombaapila yaNathaniel ya holola.

Okwa lopotwa kutya nonando ongaaka Shanghala okwa ningi omutumba ngoka potundi onti-10 yongula.

Konima yomutumba okwa yi koombelewa dhelelo lyoshilongo shaNdonga, hoka a tsakanene naAmupanda.

Konima yomutumba ngoka, esiku olyo tuu ndyoka, Shanghala okwa shanga ombaapila ta popi kutya okwa kutha oonkondo iilonga yompangululo yaakwashigwana mOndonga, nuuministeli otawu ningi omakonaakono.

"Sho nda talelepo oombelewa dhelelo lyoshilongo shaNdonga mEtine lyomasiku 24 gaMei, otandi gandja elombwelo mpaka kutya: Momaandaha gomasiku 28 gaMei, omakonaakono oga pumbwa okuningwa koshikondo shoompangulilo shopamuthigululwakalo, taga kwatelwa komeho komunambelewa omupeha omukomeho gwoshikondo shoka, Amalia Nathanael, ta yambidhidhwa komunambelewa omuyakuli mombelewa moshikondo shoompangulilo dhopamuthigululwakalo. Iilonga ayihe yoompangulilo yoOTACC otayi kalekwa sigo etseyithilo ndyoka tali ka pewa oshigwana,” ombaapila ndjoka ya shanga.

Shanghala okwa tsikile kutya omolwa omananathano pokati kaaleli melelo ndyoka, oshigwana ngashiingeyi osha ngwangwana nokweetitha Ompangulilo yaMangestrata gwaNdangwa yi kale yi a iilonga oyindji omolwa iipotha mbyoka yali tayi vulu okupulakwenwa moOTACC.

Okwa tsikile kutya ngele elelo lyoshilongo shoka kali na we ehalo lyokukala nompangulilo yopamuthigululwakalo nena okwa pyakudhukwa okuninga etseyitho nokushitula momushangwa gwopapangelo.



“Ngele potundi onti:11 mEtitatu (nena) inandi yakula ezimino lyopamushangwa kutya aapangulili naakonaakono yihokolola otaya pitikilwa momatungo goompangulilo moka hamu longelwa koOTACC moombelewa dhoOTA mOndangwa, nena otandi ka konga ehala mpoka OTACC taya tamekele iilonga yawo.”

Sho a ningilwa omapulo, Amupanda okwa koleke kutya okwa li a hiwa komutumba naShanghala ihe ina kala momutumba ngoka.

“Inandi kala momutumba ngoka molwaashoka ehiyo olya popi kutya omutumba otagu ningwa potundi onti:10 kongulohi ihe ogwa ningwa ongula. Ond ali nda pyakudhukwa okuya komutumba ngoka kongulohi ngaashi ehiyo tali popi. Kandi uviteko natango kutya omolwashike Shanghala a hala okuningaomutumba nangame pamwe nookansela mboka ya kuthwa iilonga omanga pe na oshipotha natango shi Ii mompangululo, shoka itashi pondje ompango?” Nepando a pula a geya.



Okwa gwedha po kutya nale okwa li a tindi okupitikila ookansela mboka ya tidhwa miilonga opo ya ye mompangulilo yopamuthigululwakalo molwaashoka ina pewa elombwelo.

“Ngashiingeyi Shanghala okwa li mpaka mEtine na okwa kutha po okashina kokukwata omawi komompangulilo, na otandi ya pitika ya ye meni lyetungo lyawo. Ngame inandi tulwa momushangwa gwopapangelo na kandi na uuthemba wokukala nomaliko gompangulilo yopamuthigululwakalo, ihe molwaashoka iinima oyi li mombelewa yoOTA moka nda ulikwa komukwaniilwa onga omukwateli komeho gwiinima, itandi ya pitika,” Amupanda a popi.

Shanghala okwa popi kutya OTACC oyi na iilongitho nomaliko gongushu ya thika pooN$400 000.

ILENI NANDJATO