Oprogramma yoTulongeni ya tulwa miilonga mOmusati

Presidende Hage Geingob, okwa tula miilonga oprogramma tayi ithanwa ‘Operation Tulongeni 2017’ ndjoka ya nuninwa okutsa omukumo aanafaalama ya tameke okulonga omapya gawo sha landula omuloka ngoka gwa tameke.

Oshiyetwa po shoka osha tulilwa miilonga mepya lyaMatheus Iilonga momukunda Onamundindi moShikandjohogololo shaOngongo mOshitopolwa shaMusati.

Omuleli okwa lombwele mboka ya kala poshituthi shOka kutya elongo lyomppya oshimwe shomiilalakanenwa ye sho ta kondjitha kutya iinaku pumwa omuntu ta lala nondjala.



“Otandi tula miilonga oprograma ndjika opo ndi ganje uumbangi kutya otwiitula mo ngiini sho tatu popi kutya kape na ngoka a pumbwa okulala nondjala, na otatu adha owala omathikilo mwaashoka tta tu lalakanene uuna tatu longo nuudhiginini,” Geingob ta ti.

Ngoloneya gwaMusati, Erginus Endjala okwa hololele paufupi omuleli omupyakadhi ngoka ga taalela aanafaalama naanamapya mOnooli yoshilongo.



Okwa popi kutya okutameka mo-2008, Uuministeli wUunamapya owa tula miilonga oprograma yokuyambidhidha aanamapya paifuta opo ya vule okupululitha omapya gawo.

Okwa popi kutya aanamapya ohaya topola nepangelo iifuta mbyoka molwaashoka okupulula okwa ninga ondilo na ohaya mono woo omakwatho goombuto dhokukuna. Okwa popi kutya nonando ongaaka ompumbwe yomambakumbaku yi li omukundu ngoka gwa taalela oshitopolwa.

“Momusati omu na omambakumbaku gepangeloo geli 20 ngoka taga kwatha iikandjohogololo 12. Ohatu gandja embakumbaku limwe koshikandjo kehe. Epangelo ohali kwatha woo nomambakumbaku gopaumwene ihe natango inaga gwana,” ngoloneya ta ti.



ILENI NANDJATO