Namibian Sun

Einekelo okumona oshimaliwa shoomiliyona 600 shoka sha kana mehangano lyoGovernment Institutions Pension Fund (GIPF) olya kana.

Shoka osha landula sho Omupanguli-Ndjai, Martha Imalwa a koleke kiikundaneki mEtitatu lyoshiwike shika, kutya iimaliwa mbyoka oya kanene.

Imalwa okwa li ta popi pethimbo lyomutumba gwiikundaneki ngoka a ningi moshilandopangelo, moka a popi kombinga yiipotha iinene moshilongo yi na sha nekano lyiimaliwa ngaashi GIPF, ombaanga yoSME Bank moka iimaliwa ya kana nokuyakwamo moshilongo.

Okwa popi kutya omakonaakono gokumona kutya iimaliwa mbyoka oyuuka peni, oga ningila aakonaakoni oshidhigu, ta dhenge omuthindo kutya omatokolo gokupangula ogwiikwatelela kuumbangi mboka wu li po.

Imalwa okwa popi kutya nonando oshipotha shoka shoGIPF osha patululwa momvula yo 2009, omakonaakono moshipotha shoka oga tameke owala momvula yo 2012.

Oshimaliwa sha thika poomiliyona 600 odsha kuthwa mo mehangano lyoGIPF nokugandjwa po momukalo goongunga okupitila moDevelopment Capital Portfolio (DCP) na osha pewa omahangano ga yooloka ngoka gamwepo kage na niikoti yongeshefa.

DCP okwa longa pokati komvula yo1996 no 2006.

Nonando okwa shanga momambo ge oongunga dhoomiliyona 600 dhoka itadhi vulu we okumonika, GIPF okwe shi pondola okuninga iiyemo ya thika poomiliyona 146 okuza momapungulilo ge. Pahapu dhaImalwa, omakonaakono oga tala komahangano geli po 20 nombelewa ye oya tindi okupangula omahangano ge li 18 ngoka taga kwatakanithwa nekano lyiimaliwa mbyoka.

Nonando aniwa oya tokola okupangula andola ehangano eti 19, olya mbangalota nokutulamo eindilo lyembangoloto, na otaku ka landulwa oohandimwe.

Nonando ongaaka ina popya omadhina molwaashoka omuntu ngoka ina holoka natango mompangu, sho kwa li tegelelwa a holoke mompangu yopashitopolwa mOshakati momasiku ga 3 ga Kotomba nuumvo.

Pahapu dhe ehangano e ti 20 natango otali konaakonwa.

Imalwa okwa popi kutya omapeko moshipotha shoka oga pewa ombelewa ye kopolisi nepeko lya hugunina olya gandjwa omvula ya piti, nonando oshipotha shoka osha tulwa momvula yo 2012.

Okwa popi kutya oshipotha shoka oshi na oombaapila odhindji sho shi na omapeko ga thika po195. Okwa popi kutya etokolo ihali ningwa komuntu gumwe, na oli na okukala li li mondjila.

Okwa yelitha woo komaupyakadhi ngoka ya kala ya taalele pethimbo taya ningi omakonaakono moshiptha shoGIPF, ta popi kutya oshiputudhilo osha tameke tashi pungula momahangano kage li momusholondondo gwomahangano gokupungula moomvula dho 1990.

“Uumbangi owa holola kutya epungulo lyotango olya ningwa momvula yo 1996, ngashiingeyi dhilaadhila nduno to konaakona okuza momvula ndjoka sigo oomvula dho 2000.”

Paveta aniwa oondokumende otashi uthwa dhi pungulwe uule woomvula ntano, shapo ongele pe na omakonaakono taga ningwa, Imalwa a lombwele iikundaneki.

“Omolwa ethimbo ndyoka lya pitipo sho kwa ningwa omaindilo gomikuli naasho kwa gandjwa, oondokumende dhimwe itadhi vulu okumonika. Ope na woo uupyakadhi welunduluko lyaaniilonga.”

Imalwa okwa popi kutya mboka ya gandja omikuli oya holola kutya omolwa oondokumende dhoka kadhi po itaya dhimbuluka kutya oshike sha hooka po, yamwe oya hulitha woo.

Imalwa okwa popi kutya omatokolo ogendji kutya omolwashike itaku vulu okupangulwa, omolwa ompumbwe yomaumbangi, naakonaakoni oshe ya ningila oshidhigu, sho aanambelewa mboka ye na woo oohahende dhawo dhopaumwene.



SME Bank

Omupanguli-ndjai okwa gumu woo kombinga yoshikumungu shombaanga yoSME Bank ta popi kutya oshipotha shoka natango otashi konaakonwa.

Okwa popi kutya oshipotha shoka inaga gandjwa natango kombelewa ye opo a ninge etokolo molwaashoka inashi manithwa okukonaakonwa.

Ombaanga ndjoka oya patwa, konima sho ombaanga onene moshilongo, Bank of Namibia ya ningi eindilo mOmpangu yoPombanda opo ombaanga ndjoka yi patwe sha landula ekano lyiimaliwa ya thika konyala poomiliyona 200, mbyoka kwa lopotwa ya gandjwa kiiputudhilo yaSouth Afrika ya yooloka.

Imalwa okwiipopile kutya omapopyo taga ningwa kutya ota gamene aanenentu naanapolotika mboka ye na mo olunyala mekano lyiimaliwa mbyoka kage shi goshili. Okwa popi kutya ye ita vulu okugamena omuntu ngele oku na shoka a ninga sha puka, molwaashoka naye ota vulu okupangulwa.

ELLANIE SMIT