Oolita 90 000 dhomahooli dha yakelwa moshilongo

Ngoka ta longo onga omunambelewa omutseyinawa gwopaliko moshikondo shiikwamahooli muuministeli wiikwamina, Abednego Ekandjo, okwa popi kutya uuministeli otawu ningi omahwahwameko nelongo lyoshigwana omolwa elanditho lyomahooli gaali paveta sigo omomasiku 12 gaSepetemba nuumvo.

Ekandjo okwa popi kutya omahwahwameko ngoka taga ningwa kohi yoshipalanyolo 'Educating the public on Petroleum Products Act, Requirements and Safety Hazards Associated with Petroleum Storage and Handling' oga nuninwa elongo kombinga yelanditho lyomahooli gaaheli paveta moshilongo oshowo uupyakadhi wopaliko nomudhingoloko mboka tawu vulu okweetithwa kelanditho ndyoka. Ekandjo okwa popi kutya omahooli ngoka olundji ohaga landwa okuza moAngola na otaga landithwa momahala ngaashi Oshikango moshitopolwa shaHangwena, Oshana, Omusati oshowo miitopolwa iyali yaKavango. Okwa popi kutya monena okwa kwatwako oolita dhomahooli dha thika po 90 000 nuumvo.

Egandjo lyomauyelele moshigwana olya ningwa moondoolopa ngaashi Omaruru oshowo Khorixas omanga momasiku 12 gaSepetemba omauyelele ngoka taga ka gandjwa mOpuwo.

Natango egandjo lyomauyelele nooyene yoosasiyona dhomahooli, otali ningwa moshitopolwa shaKunene nena.

Sho a popi nonzo yoonkundana yoNampa, omunambelewa omupopiliko muuministeli wemona, Tonateni Shidhudhu okwa popi kutya elanditho lyomahooli ngoka otali yi moshipala ekoko lyeliko lyoshilongo onkene okwa pumbiwa elongelokumwe naakuthimbinga ayehe.



NAMPA