Ongushu yaakiintu nayi kalekwe po-Standard Bank

KENYA KAMBOWE

Uuntu nongushu yaakiintu oya pumbwa okugamenenwa po kutya otashi pula shike, pahapu dhomukomeho gwoshitayi shombaanga yoStandard Bank mOutapi, Geroldus Kazondunge.

Kazondunge okwa popi ngaaka mEtitatu lyoshiwike sha piti, pethimbo ombaanga yoStandard Bank ya gandja ooshapi yehala lyokutegelelela aakiintu mboka ye li momategelelo, mondoolopa ndjoka. Ooshapi ndhoka odha pewa oshipangelo shepangelo mOutapi moshitopolwa shaMusati.

Etungo ndyoka lya li ya tungwa po tango neyambidhidho lya gandjwa kaakuthimbinga ya yooloka, olya kala monkalo yakulupa noonkondo, na olya kala itali vulu okulongithwa.

Shoka osha etitha aakiintu mboka ye Ii momategelelo ya tegelela okupulumutha, ya dhengele ootenda dhawo kohi yomuti popepi noshipangelo.

Kazondunge okwa popi kutya omolwa onkalo ndjoka, ombaanga yawo ya tokola okulongitha oshimaliwa sha thika pooN$300 000 opo ku longulilwe omaatungo ngoka, nokugatula pamuthika gwa gamenwa.

“Otwa pumbwa okugamenena po ongushu yaakiintu ethimbo kehe. Ombaanga yoStandard Bank otu na etumba noonkondo sho twa wapaleke ehala ndyoka lyaakiintu yiihumbata, opo ya kale megameno,” Kazondunge a popi.

Etungo ndyoka oli na oondunda dhokulala ne, ndhoka tadhi vulu okukala naantu 24 poshikando. Oli na woo uundunda wokwiiyogela nuundjugo. Ngoloneya gwoshitopolwa shaMusati, okwa pandula Standard Bank omolwa oonkambadhla dhe ndhoka a ningi opo ku wapalekwe nokutulwa pamuthika gwegameno etungo ndyoka.

Nonando ongaaka Endjala okwa gandja uusama kaaniilonga yoshipangelo shaOutapi sho inaku wapalekwa omudhingoloko gwehala ndyoka. Okwa popi kutya nonando ombaanga oya longitha iimaliwa oyindji mokutungitha ehala ndyoka, oshituthi she gandjo lyooshapi osha ningilwa momudhingoloko inagu yogoka.

Okwa pula aanambelewa yoshipangelo opo ya kwashilipaleke kutya ehala ndyoka olya wapalekwa, sho taka talela po ishewe ehala ndyoka.

Endjala okwa popi kutya oshinakugwanithwa inashi kala owala momake gepangeo olyo li sile oshisho aakwashigwana ihe aakuthimbinga ayehe naya dhane onkandangala, ngaashi sha ningwa kuStandard Bank.