Omufekelwa moshipotha shedhipago moNamibia ina tumwa ko natango okuza koAngola

Epangelo lyaNamibia natango okwa tegelelwa li indile epangelo lyaAngola opo li tume moNamibia omulumentu ngoka a halika kopolisi yaNamibia omolwa oshipotha shedhipago.

Omufekelwa ngoka okwa yi ontuku moAngoka sha landula edhipago lyaNaimi Ngambo Kalenga (23) lya ningilwa momukunda Sikali moKavango West iiwike iyali ya piti.

Omukomeho gwopolisi yaNamibia, Sebastian Ndeitunga okwa popi kutya omufekelwa okwa tulilwa miipandeko moAngola.

Ndeitunga okwa popi kutya etumo ko lyomufekelwa ngoka koAngola otali ka ningwa okupitila muuministeli wuuyuuki uuna oombaapila adhihe dha pu okulongekidhwa.

Ndeitunga ina popya kutya otashi ka kutha ethimbo li thike peni omanga omufekelwa ngoka ina holoka mompangulilo yaNamibia.

Namibia naAngola kaye na etsokumwe li li miilonga li na sha nepingakanitho lyaafekelwa, ihe Ndeitunga okwa popi kutya otaya ka longitha nokukwatelwa komeho komilandu dhi na sha nomatumo gaafekelwa miilongo yopondje dhoSouthern African Development Community (SADC) oshow African Union (AU).

Oshiningwanima shoka osha ningwa ongula yomasiku 16 gaAguste nuumvo. Pahapu dhaNikolaus Kupembona, omukwatakanithi omukonaakoni gwiimbuluma moshitopolwa shoka, omufekelwa okwa li mekwatathano lyopahole nanakusa na oye na aanona yatatu.

Omufekelwa okwa tete nekuya nakusa na okwa hulithile pehala lyoshiningwanima.

Omanga inaya ontuku omufekelwa okwa tete nekuya yina yanakusa kepepe lyokolumoho sho yina a li a yi kombashu hoka ya li sho uuvu oonkugo.

KENYA KAMBOWE